Titus 1 - Sura Magali Nuntu Ngkatuwu

Petabea 1:1-4

¹ Anaku Titu! Yaku i Paulu, maʼuki sura seʼi sambaʼa watua i mPue Ala pai suro i Yesu Kerisitu. Yaku ndapilisi pai ndapokau da mantulungi waʼa ntau anu ndapilisi i mPue Ala da naka maroso peaya ndaya ntau seʼe. Yaku woʼu da mamponinika tau seʼe da naka naincani kamonco anu napaguru agamata.

² Merontada ri pampomata-mata katuwu anu monco pai bareʼe da reʼe kapusanya. Katuwu setu roomo ndajanji i mPue Ala ri kabareʼepanya ndapapewali lino seʼi – i Pue Ala bareʼe kojo da mombamba.

³ Ri tempo anu ndapakanoto i mPue Ala da mampatongawa nuntua ri lino seʼi. Nuntu setu ndapesarumakaka ri yaku pai kupetumbumo malulu songka i mPue Ala Toponcorepakata.

⁴ Titu, siko monco-monco kojo anaku, maka siko pai yaku siwia-wia paka meayamo ri Kerisitu. Yaku mampomata-mata mbolimo i Pue Ala Papa pai i Kerisitu Yesu Mokole Tadungkadagota, da mawaika siko popadonco, purundaya, pai karodo ndaya.

Tetala i nTitu ri Kareta 1:5-16

⁵ Siko kudika ri Kareta owi, tinako ndayaku da naka nupatumumpu waʼa ntetala anu bareʼepa roo tapotetalaka. Pai da nupampakanoto waʼa ntopombawanaka dompu ri sambaʼa-sambaʼa kota. Pai neʼe nukalingani waʼa ntotoraka seʼi:

⁶ Tau anu da mewali topombawanaka ri dompu inceʼemo tau anu bereʼe posarinya, podo sambaʼaja rongonya; waʼa ananya paka meaya ri Kerisitu, banya waʼa ananggodi anu toposalara pai balanganga.

⁷ Maka topombawanaka dompu inceʼemo tau anu mampasilolongani tetala i mPue Ala, bareʼe maya da reʼe posarinya. Siʼa bareʼe mekiunde bara pasengke, bara topoyangu-yangu, bara makasara bara manyanya doi.

⁸ Siʼa da mabuya rayanya mancabe tau rata ri banuanya, napokawongko waʼa anu madago, naincani mantaʼamaka rayanya, mayoa, magali pai timama.

⁹ Siʼa da mangkekeni maroso nuntu ungka ri Pue Ala, inceʼemo Nuntu anu da ndaaya, ewa anu roomo ndapaguruka siʼa. Ane ewanceʼe da nakoto mampatujuki tau merontada ri pompaguru anu monco, pai manceko kasalaa ntau anu mangaewa.

¹⁰ Maka maria tau anu bareʼe mepoʼinaya, pagonya waʼa ntau anu ungka ri agama Yahudi; tau seʼe mampakalingu raya waʼa ntau ntaninya pai waʼa mpau ntau seʼe anu bareʼe monco.

¹¹ Waʼa ntau anu ewanceʼe moruana ndadampo ngujunya, maka maria sombori anu nawuraga ua waʼa mpompagurunya anu pontopanyamo. Powia ntau seʼe anu ewanceʼe podo da mampepali porasi anu bareʼe sintinaja!

¹² Reʼe sangkani nabi ntau seʼe ngkalionya ungka ri Kareta, mantoʼo, “Waʼa nto Kareta lawi waʼa ntau kambamba-mbamba, ewa pinatuwu anu masii, manyanya pai malose.”

¹³ Nunjaa anu natoʼo nabi setu lawi monco. Inceʼe painaka da gana-gana kojo nupanceko tau seʼe; da naka bareʼe bali-bali peaya ntau seʼe ri Pue Ala ri jaya anu monco,

¹⁴ pai neʼemo mampedongeka waʼa laolita nto Yahudi pai waʼa mpadika anu napowia ntau anu maewa pompaguru anu monco.

¹⁵ Pura-puranya setu magali tila waʼa ntau anu magali, paikanya ri waʼa ntau anu nawa-nawanya keʼonu pai bareʼe meaya, bereʼe sako sangaya anu magali maka rayanya pai nawa-nawanya keʼonumo!

¹⁶ Natoʼo ntau seʼe kaincani i Pue Ala, paikanya powia ntau seʼe majaʼa pai bareʼe mepoʼinaya; tau seʼemo waʼa ntau anu bareʼe nakoto da mampowia tesangaya apa anu madago.