TADULAKO 1 - Sura Magali Nuntu Ngkatuwu

To Yahuda pai to Simeo masoko i Adoni-Beseki 1:1-7

¹ Butu matemo i Yosua, meoasi to Isaraeli ri Pue, natoʼo, “Pue, lemba anu mbeʼinya anu sangaya-ngaya anu mamperiuka da maungku to Kanaʼa?”

² Mesono i Pue ndatoʼo, “Lemba i Yahuda, maka tau seʼe roomo kuwaika kuasa da mangarampa tana setu.”

³ Natoʼo nto Yahuda ri to Simeo, “Da ndipelae kami maungku to Kanaʼa da marampa tananya anu roo ndapakanoto i mPue da tila mami. Nepa kami woʼu da mampelae komi da marampa wilaya anu roo ndapakanoto i mPue da tilami.” Inceʼe painaka to Simeo

⁴ pai to Yahuda njoʼu mombetoto sangkani-ngkani. Ndawai i mPue penangi ri tau seʼe, nanangi to Kanaʼa pai to Perisi. Reʼe sampuyu ncowu surodado iwali anu mate ri Beseki.

⁵ Tau seʼe mampomberataka i Adoni-Beseki mokole ntana setu, naduduki ntau seʼe siʼa.

⁶ Molonco siʼa paikanya ndaduduki mpaliu, naleʼo ntau seʼe, nepa natompo ntau seʼe katumpu ngkarama mbitinya pai palenya.

⁷ Natoʼo i Adoni-Beseki, “I owi pitu mpuyu mokole kutompo katumpu ngkarama mpale pai witinya, nepa kupakonika tau seʼe waʼa wurere mpangkoni anu manawu ungka ri meja mpangkoniku. Seʼi-seʼi i Pue Ala mampowia yaku ewa pampowiaku tau seʼe.” Ndakeni i Adoni-Beseki setu ri Yerusale nepa mate njairia.

To Yahuda manangi Yerusale pai Heberoni 1:8-10

⁸ Naungku nto Yahuda Yerusale, naleʼo ntau seʼe nepa natunju kota setu nepa napepate waʼa ntau banganinya.

⁹ Roo setu nepa njoʼu tau seʼe maungku to Kanaʼa anu mampeari daera buyu mongkodo, pai apa-apa mpongku; ewanceʼe anu mampeari tana mangau ri tondo selata,

¹⁰ pai kota Heberoni, kota anu i owi ndapapotoʼoka Kiria-Araba. Njairia to Yahuda manangi waʼa muli i Sesai, i Ahima pai Talumai.

I Otinieli manangi kota Debire 1:11-15

¹¹ Ungka ri Heberoni to Yahuda njoʼu maungku kota Debire anu ri tempo setu toʼonya Kiria-Seperi.

¹² Sambaʼa ri oyo nto Yahuda anu mampotoʼo i Kalebi, mantoʼo, “Bara isema anu maleʼo marampa kota Kiria-Seperi, siʼa maya mamporongo anaku i Akasa.

¹³ I Otinieli, ana ntuaʼi i Kalebi anu mampotoʼo i Kenasi, maleʼo marampa kota setu. Inceʼe painaka nawai i Kalebi ananya i Akasa naporongo i Otinieli.

¹⁴ Ri eo mpawawa tau seʼe nakanarasi i Otinieli i Akasa da naka naperapi tana da tilanya ungka ri papanya. Menaʼu i Akasa ungka ri kelidenya, nepa napeoasi i Kalebi ri siʼa bara nunjaa anu napodaraya.

¹⁵ Mesono i Akasa, “Kupodaraya bara tesangkuja mata ue, maka anu ndiwaika yaku kono tana anu mangau-ngau.” Inceʼe painaka nawai mpapanya ri siʼa mata ue anu ri untunya pai mata ue anu ri winanganya.

Waʼa mpenangi nto Yahuda pai to Benyami 1:16-21

¹⁶ Waʼa muli mania i Musa, inceʼemo waʼa nto Keni, malulu to Yahuda mesuwu ungka ri Yeriko, kota Koroma, njoʼu ri daera anu mangau tondo selata Aradi ri Yahuda. Njairia tau seʼe meari ri oyo nto Amale.

¹⁷ Ungka lairia sangkani-ngkani pai to Simeo, to Yahuda njoʼu maungku pai manangi to Kanaʼa anu mampeari kota Sepati. Natadeasi ntau seʼe kota setu nepa nagero pai napapotoʼoka Haroma.

^18-19 Ndapelae i mPue to Yahuda painaka naleʼo ntau seʼe marampa daera buyu mongkodo. Paikanya bareʼe naleʼo ntau seʼe kota Gasa, Asikelo, ewanceʼe seʼe Ekero sangkani pai daera anu mantolilimi, maka waʼa banca anu mampeari sangkarate wiwi ntasi paka mampotumpu waʼa ngkareta mpoʼiwali besi, inceʼe painaka bareʼe nakoto nto Yahuda mairi tau seʼe.

²⁰ Silulu pai anu roo napesongkaka i Musa, kota Heberoni inceʼe tila i Kalebi, maka i owi reʼe tatogo ntina muli muli nto Enaki roo nairi i Kalebi ungka ri kota setu.

²¹ To Benyami bareʼe nakoto mairi to Yebusi ungka ri kota Yerusale. Inceʼe painaka to Yebusi ntongo njaupa maroo-roo sangkani-ngkani pai to Benyami.

Waʼa lemba muli i Yusupu manangi Kota Beteli 1:22-26

^22-23 Lemba nto Eparai pai to Manase muli i Yusupu njoʼu maungku kota Beteli anu ri tempo setu toʼonya Lusi. I mPue mampelae tau seʼe. Sindara napampokau ntau seʼe tau njoʼu padaso ri kota setu,

²⁴ tau seʼe momberata pai sambaʼa tuama anu rata ungka ri kota setu. Natoʼo ntau seʼe ri siʼa, “Ane nupokono mantulungi kami da kapaleʼo mesua ri raya ngkota setu, siko bareʼe da kajaʼati.”

²⁵ Tau setu manunjuka tau seʼe jaya da mpesua ri kota setu, painaka naleʼo nto Eparai pai to Manase mampesuaki kota setu, napepate ntau seʼe pura-pura bangani ngkota setu, jamo tau anu manunju jaya sangkani pai tinanya anu napatuwu.

²⁶ Ri purinya tau setu melimba ri kota nto Heti, njairia siʼa mabaresi sambaʼa kota anu napapotoʼoka Lusi. Inceʼemo toʼo ngkota setu rantani wawaseʼi.

Waʼa banca anu bareʼe nairi nto Isaraeli 1:27-36

²⁷ To Manase bareʼe mairi tau anu mampeari kota Beta-Seani, Taʼanaka, Dore, Yebilea, pai Megido pai waʼa lipu sampotenginya. Mewali to Kanaʼa ntongo njaupa njairia.

²⁸ Lawi ri paepe nto Isaraeli tau seʼe marosomo, nariso ntau seʼe waʼa nto Kanaʼa motetala tila ntau seʼe, paikanya bareʼe liu-liu nairi ntau seʼe waʼa nto Kanaʼa setu napalai ungka njairia.

²⁹ Ri kota Geseri, to Eparai bareʼe mairi to Kanaʼa anu mampeari kota setu. Mewali to Kanaʼa ntongo njaupa maroo-roo njairia sangkani-ngkani pai tau seʼe.

³⁰ Tau anu mampeari kota Kiteroni pai Nahaloli bareʼe woʼu mairi nto Sebulo. Inceʼe puʼunya painaka to Kanaʼa ntongo njaupa maroo-roo sangkani-ngkani pai tau seʼe, paikanya to Kanaʼa nariso motetala tila ntau seʼe.

³¹ Tau anu mampeari kota Ako, Sidoni, Ahalabo, Akisiba, Heliba, Apeka pai Rehobo inceʼe woʼu bareʼe nairi nto Asere.

³² Inceʼe puʼunya pinaka to Kanaʼa tumpu ngkota setu ntongo njaupa maroo-roo njairia sangkani-ngkani pai to Asere.

³³ Bangani ngkota Beta-Samesi pai Beta-Anato woʼu bareʼe nairi nto Natali. Inceʼe painaka to Kanaʼa tumpu ngkota setu ntongo njaupa maroo-roo sangkani-ngkani pai to Natali. Paikanya tau seʼe nariso mampotetalaka tila nto Natali.

^34-35 To Amori nto njaupa mampeari Ayalo, Saalabima, pai Buyu Heresi, maka waʼa nto Daa najujuli ntau seʼe ndeki daera buyu mongkodo, bareʼe nawai ntau seʼe menaʼu ri rato. Paikanya waʼa nto Amori setu bareʼe bali-bali napariso nto Eparai pai to Manase motetala tila ntau seʼe radua lemba setu.

³⁶ Ri tondo utara Sela, tida ntana nto Amori naliu Pandake Akarabima.