Roma 1 - Sura Magali Nuntu Ngkatuwu

Tepuʼu ncura 1:1-7

¹ Waʼa ngkasangkompo pura-pura anu ri Roma anu ndapotowe i mPue Ala pai anu roo ndapeboo i mPue Ala da mewali waʼa ntau-A. I Pue Ala roo mampilisi pai malanti yaku ndapatani da mampobambarika Nuntu ngKatuwu ungka ri Pue Ala.

² Nuntu ngKatuwu setu roo ndajanji i mPue Ala ipiamo mampoliu waʼa nabi-A pai roo teʼuki ri raya Ncura Magali.

³ Nuntu ngKatuwu setu inceʼemo Ana mPue Ala, Pueta i Yesu Kerisitu anu malulu katolino, Sira muli i Daudi,

⁴ paikanya malulu ka-Ala-A Sira Ana mPue Ala, inceʼe tongawa ri kuasa anu ndapojingki kono pembangu-A ungka ri kapate.

⁵ Mampoliu Sira woʼu i Pue Ala mawai ri yaku puru ndaya mewali suro, da naka yaku – mabangkei i Kerisitu – mamponinika tau ungka ri banca mpengaya-ngaya da naka meaya pai mepoʼinaya.

⁶ Anu ndatinako ndaya pura-pura banca tesuamo woʼu pai komi anu ri Roma, komi woʼu ndapeboomo da mewali tau i Yesu Kerisitu.

⁷ Inceʼe puʼunya painaka kuʼuki sura seʼi da rata ri komi. Mbolimo i Pue Ala Papata pai i Yesu Kerisitu da mawai ri komi popadonco pai karodo ndaya.

Peunde ri Pue Ala 1:8-15

⁸ Riu-riunya mampoliu i Yesu Kerisitu, yaku montarima kase ri Pue Ala ua waʼa ngkasangkompo pura-pura; maka tedongemo ri sambawo lino kakominya meaya kojo ri Kerisitu.

⁹ Bareʼe bali-bali kuendo komi ri pekakaiku. I Pue Ala anu mewali sabi kamonconya anu kutoʼo setu. Siramo Pue Ala anu kuporiokoi ri kaliogu ndayaku ri kupampobambarika Nuntu ngKatuwu kono Ana-A.

¹⁰ Kumerapi puru ri Pue Ala tuarapa Sira mawai kasoanya ri yaku seʼi-seʼi da madadu komi.

¹¹ Maka maʼai kojo kamawo ndayaku da momberata pai komi, da naka kuleʼo mampotila pai komi, pombai Inosa mPue Ala da mampakaroso peaya ndayami.

¹² Anu kutangara ndaya ua kita siwia-wia paka tau anu meayamo ri Yesu Kerisitu, da naka mombepakaroso ri peaya ndaya.

¹³ Ee waʼa ngkasangkompo! Da rayaku naka ndiincani kamaria ngkaninyamo tinako ndayaku da madadu komi, paikanya maria gaga salemporinya. Da rayaku da naka reʼe woʼu wua ntetalaku ri oyomi ewa powua ntetalaku ri oyo waʼa ntau ntaninya anu banya to Yahudi ri daera ntaninya.

¹⁴ Maka ri yaku ndapesarumakaka tetala ri mpengaya-ngaya banca; ri tau anu moada bara ri tau anu benaincani ada, ri tau anu gana paincaninya bara ri tau anu begana paincaninya.

¹⁵ Inceʼe puʼunya maʼai kadarayaku mampetumbu Nuntu ngKatuwu seʼe ri komi anu maroo-roo ri Roma woʼu.

Kuasa Nuntu ngKatuwu setu 1:16-17

¹⁶ Kuaya kojo Nuntu ngKatuwu setu, maka inceʼe sambaʼa kuasa mPue Ala anu da mangancorepaka pura-pura tau anu meaya; riunya-riunya nto Yahudi nepa banca ntaninya woʼu.

¹⁷ Maka ua Nuntu ngKatuwu setu i Pue Ala mampatongawa ewambeʼi jaya pokenta ntolino pai Pue Ala madago muni; jayanya inceʼemo meaya ri Pue Ala ungka ri tepuʼu rantani rata ri kapusanya. Inceʼe silulu pai anu teʼuki ri Sura Magali, “Tau anu meaya ri Pue Ala inceʼe painaka pokentanya pai Pue Ala madago muni, tau setu anu da tuwu!”

Kasalaa ntolino 1:18-32

¹⁸ Ungka ri suruga i Pue Ala mantuju karau ndaya ri waʼa ntolino ua kasalaa pai kajaʼa ntolino, maka kajaʼa setu anu masalempori tolino da marata ndaya songka anu monco ungka ri Pue Ala.

¹⁹ Kamonconya nunjaa anu nakoto ntolino maincani kono i Pue Ala, lawi yosamo ri raya ntolino, maka lawi roo ndapatongawa i mPue Ala ri tolino.

²⁰ Maka montepuʼu ungka ri pampapewali i mPue Ala lino, katedikanaka i mPue Ala anu bareʼe nakoto ntau mangkita, inceʼemo katedikanaka ka-Siranya Pue Ala anu makuasa anu bareʼe da reʼe kapusanya, narata ndayamo ntolino maka tongawa ri pura-pura anu ndapapewali. Mewali bareʼemo reʼe jayanya da napampesapuka ntolino kasalaanya.

²¹ Naincani ntolino i Pue Ala, paikanya bareʼe nabangkei Sira ewa Pue Ala, bareʼe montarima kase ri Sira Paikanya tau seʼe podo manawa-nawa anu bareʼe-reʼe yowenya; maka wanimo raya ntau seʼe.

²² Naepe ntau seʼe loʼemo, ntanoka tau seʼe maʼai katengonya.

²³ Panyomba ntau seʼe banya ri Pue Ala anu bareʼe da reʼe kapusanya, paikanya podo mampanyomba anu nataʼa ntolino motaʼa turuki anu dapaya, ewa taʼa ntolino, tonci, pinatuwu anu mowiti aopo, pai pinatuwu anu menjoyo.

²⁴ Inceʼe puʼunya painaka ndapapaliu i mPue Ala tau seʼe nasoʼo ngkasawoyo ndayanya da mampowia anu karika, painaka tau seʼe mombeonusi.

²⁵ I Pue Ala anu monco, nasawanika ntau seʼe pai pue anu bareʼe monco. Banya anu mampowia paikanya anu ndapowia anu napanyomba pai napeʼuruki ntau seʼe. Ntanoka anu mampowia inceʼe anu sintinaja da ndaunde rantani masae-sae! Ami.

²⁶ Ua powia ntolino anu ewanceʼe ndapapaliumo i mPue Ala tau seʼe tuwu ri sawoyo ndaya anu majaʼa. Waʼa mbeʼa bareʼemo mampokono tuama malulu ada ngkatolino, paikanya mampodarayamo kasiweʼanya.

²⁷ Ewanceʼe seʼe tuama bareʼemo mampokono weʼa, paikanya mamposawoyomo kasituamanya. Waʼa ntuama mawianaka powia anu mepakaea pai kasituamanya painaka naporengke-rengke ngkalionya sili mpowia ntau seʼe anu majaʼa setu.

²⁸ Ua paepe ndaya ntolino bereʼe yowenya maincani Pue Ala, inceʼe painaka ndapapaliumo i mPue Ala kajaʼa nawa-nawanya, rantani napowiamo anu kamonconya bareʼe maya nawianaka ntau seʼe.

²⁹ Raya ntau seʼe buke-buke jaʼa, bareʼe monco, buke kamangoa, kasina ndaya, kodi ndaya, buke kasawoyo ndaya da mepepate, pombeluku, pombamba pai kanyau ndaya. Mampokawongko manuntuki tau ntaninya.

³⁰ Napokono majaʼati toʼo ntau ntaninya; tau seʼe mekiunde, baleparu mampobanciika i Pue Ala pai napokono mampau mbamba. Tau seʼe loʼe mampepali jaya dawoʼu da mawianaka jaʼa bareʼe mantubunaka tau tuʼa;

³¹ bareʼe nanawa-nawa katuwu ntau ntaninya; tau seʼe bareʼe todo pai bereʼe puru ndayanya ri kasitaunya.

³² Naincani ntau seʼe ane malulu padika i mPue Ala powia anu ewanceʼe sintinaja da ndahuku mate ndapepate, mau ewanceʼe jana powia ntau seʼe engko anu ewanceʼe; pai naposintuwui woʼu ntau seʼe waʼa ntau ntaninya anu mowia ewanceʼe.