Ratapan 1 - Sura Magali Nuntu Ngkatuwu

Kapari Yerusale 1:1-11

¹ Wenu painaka Yerusale ja maʼai ngkanjiimo, i owi kota anu maʼai ngkadoro. I owi tetoʼo ri oyo waʼa banca, seʼi jamo ewa bemba. I owi kota anu ndaunde-unde, seʼi ndapapewalimo watua mepue.

² Sangkasae mbengi siʼa tumangi ri kapari ndaya, ri pidi ue mata mosawera. Bereʼe, ungka ri waʼa ntau anu napomawo, anu telike rayanya da mampalindo. Siʼa natambo waʼa bale maramu, anu meyoro mewali iwali.

³ Bangani Yahuda mampalaika tananya, ua ndapowatua pai meruu ngkaparinya. Seʼi-seʼi tau seʼe meari ri oyo waʼa banca, bareʼa kareʼe da ndaparata kalindo ndaya, nalimbu ncape iwali, sindara tau seʼe ri tongo ngkapari.

⁴ Ri tempo waʼa eo bangke bamoreʼe mau sambaʼa tau ntano njoʼu ri Banua mPanyomba ri Pue Ala. Waʼa anaweʼa topongayu njairia maepe pari pai waʼa ntadu mpanyomba meʼode-ode. Bereʼe tau anu mojaga ri waʼa baa-baa, Kota Sioni nakulamuti mpari ndaya.

⁵ Waʼa iwalinya mekiunde ua naleʼo mangkuasai tau seʼe. I Pue mampowia tau seʼe mapari, ua kabangke ncalaanya, waʼa ntau banganinya ndatawani, pai ndakeni ri kareʼe mpantaji.

⁶ Peawa ngkota Yerusale i pua, jamo mewali laolita ntau tuʼa. Waʼa ntopombawanakanya mewali malente, ewa lagiwa anu maʼai ngkaoro. Bereʼe roso ntau mancuara iwali anu meduduki.

⁷ Jabutu madungka pai mapari, naendo Yerusale katuwunya i owi ri tempo ngkagana-gana aga-aganya; ewambeʼi waʼa ntaunya manawu ri pale iwali pai bereʼe mau sambaʼa tau rata mampelae. Waʼa sampotadanya podo mogele mangkita kageronya.

⁸ Yerusale maonusi koronya ngkalionya, ua pawianakanya sondo salaa anu karika. Pura-pura tau oni i owi mantubunaka siʼa, seʼi-seʼi mampetikodi siʼa, ua mangkita siʼa bareʼe morengko, siʼa meʼode mapari ua bemoreʼe olinya.

⁹ Kakarikanya yosaomo ndakita mata, paikanya bareʼemo natanondo nunjaa anu da mewali ri woto ngkoronya. Maʼai kojomo kageronya, paikanya bereʼe anu sambaʼa tau mawai palindo ndaya. Inceʼe painaka merapi kapande ndaya i mPue ri yangi ua iwali puramo menangi.

¹⁰ Pura-pura aga-aganya naparurumo waʼa iwalinya, pai ri suara ntau seʼe iwali mampesuaki Banua mPanyomba ri Pue Ala, sangaya powia anu bareʼe ndapokono i mPue ri waʼa ntau anu banya taua.

¹¹ Ri peʼode ngkapari ndaya waʼa ntau banganinya mampepali pangkoni; anu masuli ndatoloka roti, podo masumpa inosa naka neʼe mate. Yeruale meboo, “Boo Pue ndipeolemo yaku, ndipetiromo waʼa ngkapariku.”

Yerusale meʼode-ode 1:12-22

¹² “Ee waʼa ntau anu moliu ri jaya, ndipeole pai ndipatomata! Ara da reʼemo pari ewa anu kaepe seʼi? Pai anu ndapapakoyoka i mPue ri yaku, ua karau ndaya anu maʼai kojo?

¹³ Ungka ri yangi ndapantendeka apu, anu mantunju tudu-tudu ri rayaku. Ri suaraku ndataʼa tolia anu mancoʼo yaku. Nepa ndapapaliuka yaku ngkalioku mantodosaka pari rantani soyo reme.

¹⁴ Ndatima pura-pura salaaku, nepa ndapasauju mewali sambaʼa nepa ndapapogonggaka ri leʼeku painaka kaneenya mampakalente yaku. I Pue mampepombaika yaku ri iwali, bereʼe rosoku maewa tau setu.

¹⁵ Bareʼe ndareke i mPue waʼa mpomakojeku anu makaliki. Ndaʼiowaka waʼa ncurodado painaka magero pura-pura waʼa ntauku anu mangura. Sira maija-ijaki bancaku rantani malesa, ewa tau anu mampaa ue anggoro.

¹⁶ Inceʼe painaka moperepe ua mataku, bereʼe anu mampakaroso rayaku pai mawai palindo. Bemoreʼe anu napotumpu bancaku, ua iwali anu maʼai ngkakuasa.

¹⁷ Kutora paleku merapi petulungi, paikanya bereʼe anu mawai palindo ndaya, ungka ri mbeʼi-mbeʼi ndapakatu i mPue iwali; tau seʼe rata maungku yaku. Yaku ndapowia ewa nyoo, anu karika ri oyo ntau seʼe.

¹⁸ Paikanya i Puemo anu monco, maka yaku malewamo songkaa. Ndipedongeka yaku ee waʼa banca, ndipeolemo yaku ri tongo ngkapari. Waʼa ntau manguraku tuama pai waʼa ndatawani, pai ndakeni ri kareʼe mpantaji.

¹⁹ Yaku mancale waʼa baleku maramu, paikanya tau seʼe malimpongi yaku. Weʼa ntadumpanyomba pai waʼa ntopombawanaka banca, pura-pura matemo ri tongo njaya ri raya ngkota. Sindara tau mampepali pangkoni da masumparaka inosa.

²⁰ Oo, Pue! ndipetiromo yaku, mapari pai lingu rayaku, malesa ua kapaleparuku i owi. Ri yae njaya reʼe pompepate Ri raya banua reʼe kapate.

²¹ Oo, Pue! Ndipedongeka Pue peʼode-odeku bereʼe anu mampalindo yaku, Waʼa iwaliku mawongko-wongko raya, ua komi mampakarugi yaku. Nakaratamo pura-pura anu ndijanji setu ndipakaparimo tau seʼe ewa yaku.

²² Ndipetiro pura-pura kajaʼa ntau setu, Ndipowiamo tau seʼe ewa ndipampowia yaku, ua pura-pura salaa anu kupowia ri Komi. Yaku meʼode-ode ri tongo ngkapari, mapari rayaku mantodosaka.”