ESIRA 1 - Sura Magali Nuntu Ngkatuwu

I Koresi mampokau to Yahudi mewalili ri tananya 1:1-11

¹ Ri taʼu kaʼisa poparenta i Koresi datu nto Parisia, ndabangani i mPue nunjaa anu roo ndatoʼo mampoliu i Nabi Yeremia. I Pue anu mampaporaya i Koresi da naka mampapesuwu songka anu da ndabasa ri samalele mpoparentanya, ewaseʼi katetoʼo ncongka setu:

² “Seʼimo songka i Koresi datu nto Parisia, i Pue, Pue Ala Anu Makuasa ri suruga, mampapewalimo yaku datu anu makuasa ri sambawo lino, Sira anu mampokau yaku da mangawanguka Sira banuaa ri Yerusale ri tana Yahuda.

³ Tuarapa i Pue Ala da mangkariani komi anu mewali taua, komi sangaya-ngaya da mewalili ri Yerusale pai da mangawangu muni Banua i mPue, Pue Ala pue nto Isaraeli anu meari ri Yerusale.

⁴ Ane reʼe sambaʼa tau ri oyo waʼa ntau anu ndatawani seʼi anu da merapi tulungi da naka naleʼo mewalili, komi waʼa ntau anu sampombemosunya sangaya-ngaya da mawai petulungi setu. Sangaya-ngaya da ndiwaika tau seʼe salaka pai wuyawa da napoʼongkoso ri jaya pai pinatuwu anu da maʼulaya rengkonya, ewanceʼe seʼe waʼa anu da napanyombaka ri Banua i mPue ri Yerusale.”

⁵ Ungka lairia, waʼa ntadulako ri santina-santina seʼe ungka ri lemba i Yahuda pai Benyami, waʼa ntadu mpanyomba pai waʼa nto Lewi, waʼa ntau anu ndalengkosi i mPue Ala rayanya, mompatikalimo da mewalili ri Yerusale da mangawangu muni Banua i mPue.

⁶ Pura-pura tau anu sampombemosu ntau seʼe mawai petulungi, nawai waʼa aga-aga ewa salaka pai wuyawa pai baeli ri jaya, pinatuwu anu maʼulaya rengko ntau seʼe pai aga-aga ntaninya anu da ndapanyombaka ri Banua i mPue.

⁷ Napapesuwu i Koresi waʼa mangko pai suraya anu ndapake owi ri raya Banua i mPue ri Yerusale. Waʼa mparewa setu nateo i Nabukanesa nepa nadika ri raya banua waʼa lamoanya.

⁸ Tila mampasilolongani waʼa mparewa setu, napesarumakaka i ngKoresi ri Metireda tadulako ntau anu mampakoroka aga-aga negara. Inceʼe painaka naʼukisi i Metireda waʼa ntoʼo mparewa setu nawaika i Sesabasari petoro Yahuda.

^9-10 Seʼimo toʼo waʼa mparewa setu: waʼa mangko wuyawa anu anu ndapake ri upacara mpanyomba 30 mponga waʼa mangko salaka anu ndapake ri upacara mpa-nyomba 1.000 mponga waʼa mangko ntaninya 29 mponga waʼa mangko wuyawa anu masiwu 30 mponga waʼa mangko salaka anu masiwu 410 mponga Parewa ntaninya 1.000 mbaʼa

¹¹ Romunya pura-pura mangko setu 5.400 wuyawa pai salaka pai waʼa aga-aga ntaninya. Pura-pura setu nakeni i Sesabasari ri palainya sangkani-ngkani pai waʼa ntau anu ndatawani mewalili ri Yerusale.