Epesus 1 - Sura Magali Nuntu Ngkatuwu

Petabea i mPaulu 1:1-2

¹ Tau i mPue Ala ri Epesu, anu mepoʼinaya ri Kerisitu Yesu!

² Yaku, i Paulu, suro i ngKerisitu Yesu ua pepokono i mPue Ala, mampomata-mata tuarapa i Pue Ala Papata pai i Yesu Kerisitu da madonco pai damawai palindo ndaya ri komi.

Popadonco mampoliu i Kerisitu 1:3-14

³ Peunde ri Pue Ala, Papa mPueta i Yesu Kerisitu! Siramo anu mawaika kita popadonco ungka ri suruga ua kita sambaʼa-mbaʼamo pai i Kerisitu.

⁴ Ri kabareʼepanya ndapapewali lino seʼi, kita lawi ndapilisimo i mPue Ala mampoliu i Kerisitu, kita da mewali tau anu ndapatani pai bereʼe posarinya ri suara-A. Ua towe i mPue Ala,

⁵ lawi roomo ndapakanoto mampoliu i Yesu Kerisitu kita ndapapewali ana-A, silulu pai pepokono ndaya-A.

⁶ Taundemo i Pue Ala anu bangke peawa-A, maʼai kojo ndapampotowe kita mampoliu Ana-A anu ndapotowe.

⁷ Maka ua kapate i ngKerisitu kita ndasorepaka; inceʼe posokinya salaata bareʼemo ndakitanaka, podo ua kabangke mpuru ndaya i mPue Ala,

⁸ anu gana-gana ri kita ri kayombu mponawa-nawa pai parata ndaya; roomo ndapakanoto pepokono-A da mawianaka mampoliu i Kerisitu.

⁹ I Pue Ala mampatongawa ri kita rahasia mpepokono-A malulu tangara ndaya-A; roomo ndapakanoto pepokono-A da ndawianaka mampoliu i Kerisitu.

¹⁰ Pepokonoa inceʼemo da naka pura-pura madago anu ri suruga bara anu ri lino, mewali sambaʼa-mbaʼa pai i Kerisitu anu mewali tadulako. Pai inceʼe da ndapakatumumpu i mPue Ala ane jelamo ri temponya.

¹¹ I Pue mawianaka mpengaya-ngaya silulu pai pepokono-A anu ndapakanoto ngkalio-A. Ungka ri tepuʼunya ndapilisimo kita maka ndapokono da naka kita mewali tau anu-A mampoliu i Kerisitu.

¹² Mbolimo kita anu uyu-uyunya metionda ri Kerisitu, maunde i Pue Ala ua kabangke mpeawa-A!

¹³ Komi woʼu mewalimo tau i mPue Ala ri sindara pampedongekami Nuntu i mPue Ala, Nuntu ngKatuwu anu mawaika komi katesorepaka. Inceʼe puʼunya painaka ndawai i mPue Ala ri komi petondoni, kakominya Sira tumpunya inceʼemo Inosa anu Ndajanji setu.

¹⁴ Inosa setumo anu mampakanoto kakitanya da marata nunjaa anu roomo Ndajanji i mPue ri waʼa ntau-A. Inceʼe mewali kanoto ri kita kaʼi Pue Alanya da mancorepaka tau-A. Taundemo i Pue Ala ua kabangke mpeawa-A!

Pekakai i mPaulu 1:15-23

¹⁵ Inceʼe painaka montepuʼu ungka ri padongeku peaya ndayami ri Yesu, pai pampotowemi pura-pura tau i mPue Ala,

¹⁶ bareʼe marapa pontarima kaseku ri Pue Ala kono komi. Bareʼe kuowe-owe mantoʼo toʼomi ri pekakaiku.

¹⁷ Kuperapi da naka i Pue Ala pueta i Yesu Kerisitu, Papa anu meawa da mawai Inosa-A ri komi. Inosa setu da mawaika komi kaloʼe ndaya, pai da mampatongawaka komi i Pue Ala rantani ndiincani mpodago Sira.

¹⁸ Kuperapi da naka i Pue Ala da mabulere nawa-nawami pai da napenaa ndayami; da naka ndirata ndaya nunjaa anu ndipomata-mata ungka ri Pue Ala anu mampeboo komi. Pai da ndipaincani woʼu ewambeʼi kagana-gana mpombai anu meawa anu ndapatoka i mPue Ala tila waʼa ntau-A.

¹⁹ Bareʼe takoto manawa-nawa ewambeʼi kabangke ngkuasa i mPue Ala anu motetala ri rayata kita waʼa ntau meaya. Kuasa setu bareʼe takoto marata ndaya,

²⁰ anu ndapake ri ndapampatuwu muni i Kerisitu ungka ri kapate pai mawaika Sira lanti anu ri wowo ngkandatekanya sangkani-ngkani.

²¹ Lanti i ngKerisitu setu maʼai mperuu ngkandatekanya pai waʼa lanti ntopoparenta, waʼa anu makuasa, waʼa ntadulako, waʼa ntau ndatubunaka pai bara isema woʼu anu ndawaika lanti anu bangke; madago anu ri tempo wawaseʼi madago woʼu ri tempo anu nepa darata.

²² I Pue Ala mampapeʼuru pura-puranya setu ri ara ngkuasa i ngKerisitu, pai i Kerisitu ndapepombaika ri dompu mantadulakoni pura-puranya anu ri raya dompu i mPue.

²³ Dompu inceʼe koro i ngKerisitu, Sira anu mampatimamasi mpengaya-ngaya bara ri mbeʼi ntano.