2 Timotius 1 - Sura Magali Nuntu Ngkatuwu

Tepuʼu ncura, petabea 1:1-2

^1-2 Ee Timotiu, anaku anu kupotowe! Yaku, i Paulu, maʼuki sura seʼi rata ri siko, pai mampomata-mata mbolimo i Pue Ala Papa pai Pueta i Kerisitu Yesu da mawai popadonco, puru ndaya pai kalindo ndaya ri siko. Ua pepokono i mPue Ala, yaku ndalanti mewali suro i ngKerisitu Yesu pai ndapokau da mampobambarika kono katuwu anu ndajanji i mPue Ala. Katuwu setu da tatarima ua kita sambaʼa-mbaʼa pai i Kerisitu.

Pekakai mpeunde pai patiendo 1:3-18

³ Kupasowa pau mpeunde ri Pue Ala anu kuporiokoi ri gori-gori ngkabuya ndayaku ewa anu nawianakamo waʼa ntau piamoku i owi. Bareʼe teonda oni ngangaku mampasowa pontarima kase ri Pue Ala, ri sangkani-sangkani kumekakai kuendo siko ri pekakaiku ri wengi pai ri eo.

⁴ Kuendo ewambeʼi kapari ndayamu, inceʼe puʼunya da rayaku kojo momberata pai siko, da naka maliogu kojo kawongko ndayaku.

⁵ Kuendo ewambeʼi kamonco-monconya peaya ndayamu ri Kerisitu, siwia pai peaya ndaya ntuʼamu i Loisi pai inemu i Eunike. Kupoaya monco kaʼewanceʼenya peaya ndayamu.

⁶ Inceʼe painaka kupatiendo siko da naka nupapewongga pombai anu ndawaika siko i mPue Ala ri tempo kupadonco siko.

⁷ Maka Inosa anu ndawai i mPue Ala ri kita, banya Inosa da mampakaeka kita. Paikanya Inosa mPue Ala anu mampakaroso kita, buke towe pai ndakoto mantaʼamaka raya.

⁸ Inceʼe painaka neʼe nupomaea mampobambarika posabi kono Pueta pai neʼe nupomaea kono yaku, anu ndatarunggu ua Sira. Ntanoka, siko ua roso ungka ri Pue Ala, mamposiepe kapari ua Nuntu ngKatuwu setu.

⁹ I Pue Ala mancorepaka kita pai mampeboo kita mewali tau-A. Sira mawianaka inceʼe banya mopuʼu ungka ri tetala anu roo tawianaka, paikanya mopuʼu ungka ri pepokono-A ngkalio-A, pai puru ndaya-A. Sira mawaika kita puru ndaya-A mampoliu i Kerisitu Yesu ri kabareʼepanya ndapapewali lino seʼi.

¹⁰ Pai seʼi-seʼi, i Pue Ala mampatongawa puru ndaya-A ri kita ri karata Mokole Tadungkadago Kerisitu Yesu. I Yesu anu manangimo kuasa ngkapate pai mangkeni katuwu anu bareʼe da reʼe kapusanya mampoliu Nuntu ngKatuwu setu.

¹¹ Ua da mampobambarika Nuntu ngKatuwu setumo, i Pue malanti yaku mewali suro pai guru.

¹² Inceʼemo puʼunya painaka kupomberataka pura-pura kapari seʼi, paikanya bareʼe kupomaea mata maka manoto kojo kupaincani ri sema pepoʼinayaku. Manoto ri rayaku nunjaa anu roo ndapesarumakaka ri yaku, Sira woʼu makuasa da majaga rantani rata ri Eo Kiama.

¹³ Lulumo ri kamonco-monconya waʼa mpatada anu roo kutoʼoka siko. Pekekeni mainti-inti ri peaya ndaya pai towe anu tapotumpu ua kita sambaʼa-mbaʼa pai i Kerisitu Yesu.

¹⁴ Ua pompelae Inosa mPue Ala anu tuwu ri rayata, da nuporewu mpodago waʼa anu moyowe anu ndapesarumakaka ri siko.

¹⁵ Nuincanimo kapura-puranya tau anu ri sambawo ntana Asia mampalaikamo yaku, tesua i Pigelu pai i Herimogene.

¹⁶ Paikanya sombori i Onesiporu bara sangkuja ngkanimo mampakawongko rayaku. Tuarapa i Pue da mantuju ri tau seʼe kapande ndaya-A. Mau yaku seʼi ri raya ntarunggu, bareʼe napomaea i Onesiporu kono katedikanakaku.

¹⁷ Jela mpinca siʼa ri Roma liu-liu napepali yaku rantani napomberataka.

¹⁸ Ntongo yaku ri Epesu maria ngkani siʼa mantulungi yaku. Kono inceʼe lawi nuincanimo. Tuarapa i Pue da mantuju kapande ndaya-A ri siʼa ri eo mpobotusi i mPue huku ntolino pura-pura.