YAKOBUS 1 - KITABI HABARI MOPIOHE

¹ Mongo wutato umati lo Allahu Taa̒ala ngoa̒amilalo taloo̒-loo̒opo to ngoilanggubu dunia! Salamu lonto olaatia, Yakobus, wato lo Allahu Taa̒ala wau wato lo Eeya Isa Almasi.

Iimani wau tinepo

² Mongo wutato! Wonu timongoli moo̒toduo yimontala u hidala-dalaala, mamusi timongoli molaasa opae̒eda.

³ Sababu otaawa limongoli, deu̒ wonu timongoli debo palacaya to Eeya tou̒ moo̒toduo yimontala, akibatilio yito: timongoli mowali taaba.

⁴ Poo̒dahai mao̒ alihu otaaba lohilaamu boito tulusi molaio̒ dilumutu timongoli tio̒otutua mowali wimu-wimumuto tutu wau diila okulangia penu boli todelomo sua̒li loolo.

⁵ Wonu woluo ngotaalio to wolotamu diila botie molinepo, mamusi tio mohile monto Allahu Taa̒ala, yi Allahu Taa̒ala mamongohi mai tinepo olio; sababu ode timii̒du tau, Allahu Taa̒ala mongohi mai wolo muula lohilao wau wolo pongolaasa hilaa hilao.

⁶ Bo taa umohile musi palacaya; tio diila mowali molawalo. Sababu tamolawalo yito debo odelo buo̒olo todeheto u hiliipa lodupoto odito mota odia mai.

^7-8 Taa udebo odelo uito diila moduo̒to pikiilangilio; tio diila mowali mohama putuusani wolo-wolo todelomo totoonulalo u hitua-tuawua u pohutuwolio. Sababu uito, tio diila mao̒ olo pohalapu u moo̒tapu mai wolo-wolo monto Eeya.

Omosikini wau okokaya

⁹ Taulo Nasara tamosikini mamusi molaasa meengahe wonu Allahu Taa̒ala mopolaia̒ olio.

¹⁰ Wau taulo Nasara takaya mamusi molaasa meengahe olo, wonu Allahu Taa̒ala mopo dupapa olio. Sababu taa kaya mamooli debo odelo bunga lohuo̒yoto.

¹¹ Tou̒ mato lodulahu mobutu mai wolo patulio u mailaba, yi huo̒yoto boito mamowali mololante tilinggula moduduulahu mola bungalio wau moolilo mola ogagaalio. Odito olo wolo taa kaya; tio mamoa̒ntulu tou̒ tio donggo hemoponao̒ lokela-kelaalio.

Yimontala wau moheinga mohutu dusa

¹² Potisanangilo tutu taa sabali tou̒ tio odungga loimontala. Sababu lapatao̒ tio moo̒ tahangi toimontala boito, tio mamolimo wuupalio, deu̒ito-yito tutumulo u mapilo danti mai lo Allahu Taa̒ala totau-tauwalo tamo tolia̒ngo Allahu Taa̒ala.

¹³ Wonu tahingota-ngotawa oheinga mohutu dusa wolo ijimontala loimontala udebo odelo uito, diila mao̒ poloi̒ya tio, “Yimontala botie dudunggalio mai monto Allahu Taa̒ala,” sababu Allahu Taa̒ala diila mowali oheinga mohutu dusa wolo u moleeto, wau diila olo moheingo mohutu dusa penu boli ngotaalio.

¹⁴ Bo tau oheingalio mohutu dusa wonu tio bantanga wau opiyowa lou̒ otohilaalio lohihilao.

¹⁵ Lapatao̒, wonu hilaa u moleeto boito dudua̒alo, yi mamotoduo mai dusa; wau wonu dusa maloontapo, yi akibatilio yito opopate.

¹⁶ Diila bolo owimbulowa timongoli, Mongo wutatuu̒ taa otolia̒ngo!

¹⁷ Timii̒du wowohi u mopiohe wau wuupa u wimu-wimumuto tutu dudunggalio mai monto sologa, tiluhutai lo Allahu Taa̒ala, Talopowali totoonulalo u mobaango tohulungo. Tiolo Allahu Taa̒ala tadiila mobolio̒, wau diila olo moo̒sababu penu boli odio̒lomo wolo.

¹⁸ Tou̒ hilaa-Lio lohihilao Tio lopowali mai olanto mongo wala-I̒o lotimbulude to tahudaa-Lio u otutu. Tio lohutu mai uito alihu ito moo̒tapu tambati ulaba-labaalo mopiohu towolota lo ngoa̒amila mahaluku u pilowali-Lio.

Modungohe wau mohutu mao̒

¹⁹ Poo̒tuota mao̒ utie lou̒ tio̒otutua, Mongo wutato taa otolia̒ngo! Timii̒du tau musi molinggahu u modungohu, bo moboyu u mobisala wau moboyu u moingo.

²⁰ Taa u moingo diila mowali mohutu umopiohe, umopo sanangi hilaa lo Allahu Taa̒ala.

²¹ Sababu uito, tapilalo timii̒du aadati u moleeto wau kootolo. Tolimowalo wolo dupa-dupapa lohilao tahuda uilodungo lo Allahu Taa̒ala todelomo hilaamu, sababu tahuda boito o olootolo u mopoa̒ahu olimongoli.

²² Mamusi timongoli mohutu mao̒ wolo upilo tahuda mai lo Allahu Taa̒ala, diila bo modungohe wambai̒o, tilinggula lou̒ odito timongoli mohimbulo batanga lohihilao.

²³ Taa u modungohe tahuda lo Allahu Taa̒ala, bo diila mopohutu uito debo odelo taa donggo hemomilohe bayalio u otutuulio mao̒ totalu loinggilua.

²⁴ Lapatao̒ piloo̒ tuotio tio̒otutua, tio olo malonao̒ wau lato lolipatao̒ woloolo mola laku lobayalio boito.

²⁵ Butoo̒ lo Allahu Taa̒ala wimu-wimumuto tutu wau o olootolo u mopo lopato manusia. Wau taa u motulete wau mopoo̒ tuoto tio̒otutua wau moponao̒ bubuu-too̒waalo boito, wau diila bo modungohe wambao̒ lapatao̒ momalongo, yi tau boito mabalakatia lo Allahu Taa̒ala to timii̒du sua̒li upilo hutulio.

²⁶ Wonu woluo tahingota-ngotawa u molaasa batangalio taungota ohilaa moduduo̒ palenta lo agama, bo tio diila modaha dilalio, yi tio mongaakali batangalio lohihilao; tabiaalio diila ohunalio.

²⁷ Ododungohu to agama ubelesi wau u tutuuliotutu modudua̒ bibilohu lo Allahu Taa̒ala ti Paapa yito; motulungi tau̒kekeei̒ tadidu otiilo otiyamo wau mongo janda tahi dutola, wau modaha batanga lohihilao alihu diila mao̒ antuluo lodunia botie.