MARKUSI 1 - KITABI HABARI MOPIOHE

Hutuba lei Yahya Tamopolihua

¹ Uti-utieelo Habari Mopiohe pasali li Isa Almasi, Walao̒ Allahu Taa̒ala.

² Habari Mopiohe boito tumulio debo odelo u tiluladei li Nabi Yesaya odie mola, “ ‘Utieelo utoliya-U̒,’ tahuda lo Allahu Taa̒ala; ‘Wau̒ lolao mai olio leimulo wole-Mu, alihu tio momuo̒ dalalo ole-Mu.’

³ Woluo tawuwa-wuwaatio̒ tohuta hungayo u luasi daa̒, ‘Podapato mao̒ dalalo ode Eeya; popayade mao̒ dadaa-lalaalo u polibayaa-Lio.’ ”

⁴ Debo odelo u tulatulade boito, oditolo olo yilumenetai tei Yahya lonto huta datahu u luasi daa̒ wau delita. Tio helo polihu tau wau lopo tunggulo habari lonto Allahu Taa̒ala. “Timongoli musi molilihu monto duduu-sawaalo limongoli, wau musi lihualo, alihu Allahu Taa̒ala mongambungu mai olimongoli,” odito loi̒ya mao̒ lei Yahya.

⁵ Ngoa̒amila taa lonto madala lo Yudea wau kota lo Yerusalemu lonao̒ mota lodungohe olei Yahya. Timongolio longaku duduu-sawaalo limongolio, wau tei Yahya helo polihu olimongolio to Dutulaa Yordan.

⁶ Tei Yahya pakepake boo̒ lonto lambuto unta. Bintolo wohutalio lonto walito, wau ua̒alolio bulita wau hula lotiia̒ lo oa̒ayua.

⁷ Tio lopohabari mao̒ habari botie, “De lapatio mao̒ lowatia, mamei dungga mai taa ulebe udaa̒ lowatia. Hiambola motidungu momuo̒ tali losapatu-Lio, watia diila patuti.

⁸ Watia mopolihu olimongoli wolo taluhu, bo Tio mamo polihu olimongoli wolo Rohullah.”

Tei Yahya lopolihu li Isa

⁹ Tou̒ boito ti Isa leidungga mai lonto Najaret tomadala lo Galilea, wau tei Yahya lopolihu mao̒ o-Lio to Dutulaa Yordan.

¹⁰ Odito ti Isa yilumualai lonto dutula boito, Tio loo̒onto mola hulungo lohuo̒ wau Rohullah lotuhutai debo odelo bulungi poombo ode yitaa-Tio.

¹¹ Lapatao̒ dungo-dungohei suala lo Allahu Taa̒ala lotahuda mai, “Yio̒olo Walau̒u-U̒ tapilonu-U̒. Yio̒ moo̒sanangi hilaa-U̒.”

Ti Isa yilimontala lo Ibilisi

¹² Lolamemeto lapatao̒ uito Rohullah malodelo mola li Isa ode huta datahu u luasi daa̒ wau delita.

¹³ Wopato pulu hui Tio mota teto, heilimontala lo Ibilisi. Bibii-natangiyalo u molinggelo woluo olo mota teto pee̒-pee̒enta wo-Lio, wau mamaa-lai̒katiyalo helohinta o-Lio.

Ti Isa lotianga wopatota tamoohalawa

¹⁴ Lapatao̒ tei Yahya tilutupaalio, ti Isa malonao̒ mola ode Galilea, wau lopohabari Habari Mopiohe lonto Allahu Taa̒ala mola teto.

¹⁵ Tahuda-Lio mao̒, “Allahu Taa̒ala mahua̒a molumula momalenta. Polilihulo monto duduusaamu, wau pomalacayalo to Habari Mopiohe u monto Allahu Taa̒ala!”

¹⁶ Tou̒ ti Isa donggo nao̒nao̒ topentadu lo Bulalo Galilea, Tio loo̒onto mota duulota tamoohalawa, deu̒ito-yito tei Simon wau tawaliyali lei Andreas. Timongolio donggo hipoheu̒pa tola tobulalo boito wolo pajala.

¹⁷ Ti Isa lotahuda mao̒ olimongolio, “Dudui̒ mai Wau̒. Wau̒ mamo ngaajali mai olimongoli momajala tau.”

¹⁸ Lolamemeto timongolio lololaa mao̒ pajala limongolio lapatao̒ loduduo̒ li Isa.

¹⁹ Ti Isa lonao̒ tulusi, lapatao̒ loo̒onto mota poli tamohutato duulota wewolio, deu̒ito-yito tei Yakobus wolei Yahya, mongo walae̒e Jebedeus. Timongolio todelomo bulotu, wau donggo hemo poo̒piohe pajala limongolio.

²⁰ Ti Isa hua̒a lotianga olimongolio. Wau timongolio lololaa mao̒ oliyamo limongolio todelomo bulotu pee̒-pee̒enta wolo tahe wuupaalio. Lapatao̒ timongolio malo dudua̒ li Isa.

Taa ilotuanga lorohu u moleeto

²¹ Ti Isa wau tahidudua̒ o-Lio leidungga mola ode kota Kapernaum. Todulahu Saabati u wumbutio mola, ti Isa tilumuwoto ode delomo bele potabiaalo, wau lolumula longaajali.

²² Tau-tauwalo talo dungohe o-Lio hilinggolabe to dudelo-Lio helo ngaajali. Sababu, Tio helo ngajali wolo tilihula diila debo odelo guguu-ruwaalo agama.

²³ Tou̒ boito ngotaalio lo tamai̒lo tuanga lorohu u moleeto boito tilumuwotai ode delomo bele potabiaalo, wau longuatio̒,

²⁴ “Wuu Isa, taulo Najaret, wolo umaa pohutuwo-Mu olami? Yio̒ mai mopobinasa olami? Otaawa lami tatoonu Yio̒: Yio̒olo tamantali lonto Allahu Taa̒ala!”

²⁵ “Poo̒oyo mola!” antingao̒ li Isa to rohu boito, “Pohinggi mao̒ monto tau botie!”

²⁶ Yi rohu u moleeto boito malopo lota-lotau̒ula daa̒ totau boito, lapatao̒ yilumulao̒ lonto tau boito sambela wuwa-wuwaatio̒.

²⁷ Ngoa̒amila tau hilinggolabe daa̒, tilinggula timongolio malo loi̒ya ngota timongota, “Wei, wolo utie? Tuwaulio lo pongaajali u bohu! Wolo tilihula wau kawasa Tio helo malenta roroo-huwaalo u moleeto yilumualao̒, wau timongolio olo lodungohe o-Lio!”

²⁸ Yi habari pasali li Isa hua̒a loloo̒polo mola to ngoilanggubu madala lo Galilea.

Ti Isa helo poo̒luli taa dadaata

²⁹ Ti Isa wau tahidudua̒ o-Lio lololaa mao̒ bele potabiaala boito, wau lonao̒ mota ode bele lei Simon wolei Andreas. Tei Yakobus wolei Yahya lonao̒ olo woli mongolio.

³⁰ Tiilo moluhengee Simon donggo mongongoto he huhulolio to potuluhelio. Oditolio tou̒ ti Isa wau tahidudua̒ o-Lio tilumuwotao̒ ode bele boito, ti Isa pilolelealio pasali losua̒li boito.

³¹ Yi ti Isa malo himbideo̒ ode tiilo moluhengee Simon, wau lodihu mao̒ uluu̒lio, lapatao̒ lotulungi olio lobongu. Huhuulio mailoole lomola, wau tio malohinta olimongolio.

³² Lolaangio mola, tou̒ dulahee matumolopo mota, tau-tauwalo helodelo mai odeli Isa ngoa̒amila tahi ngongota wau tai̒lo tuanga lorohu u moleeto.

³³ Ngoa̒amila tuango kota boito helo ambua mai totalu lobele boito.

³⁴ Lapatao̒ ti Isa helo poo̒luli dadaata tahi duutola ngongoto hidala-dalaala, wau helo pohinggi olo ngohuntua rohu u moleeto. Diila yiluasia-Lio roroo-huwaalo u moleeto boito mobisala, sababu otaawa limongolio tatoonu Tio.

Ti Isa lohutuba to Galilea

³⁵ Loloombulio mola, tou̒ donggo molaliyonu daa̒, ti Isa lobongu tulusi lololaa mao̒ bele. Tio lonao̒ mola ode tambati udiila otau to bulemengo kota, wau lodua̒ mola teto.

³⁶ Bo tei Simon wau mongo sahabatilio lonao̒ mola mololohe o-Lio.

³⁷ Wau tou̒ timongolio loo̒dungga o-Lio, timongolio loloi̒ya mao̒, “Ngoa̒amila tau donggo hemo lolohe li Paaa̒.”

³⁸ Bo ti Isa lolametao̒, “Dulo ito mopotolonga mola lo nonao̒onto ode kokoo-tawaalo uwewo totili mao̒ leewe. Wau̒ musi mohutuba mola teto olo, sababu maa ui-uitolo makusudulio Wau̒ odia mai.”

³⁹ Sababu uito ti Isa lonao̒ ode utoonulalo mao̒ to ngoilanggubu lo Galilea, wau helo hutuba to bebee-leyaalo potabiaalo wau lopohinggi roroo-huwaalo u moleeto.

Ti Isa lopoo̒luli ngotaalio tao̒ngongoto lo alipo

⁴⁰ Ngotaalio tao̒ngongoto lo alipo u moo̒tihela hapato lonao̒ mai odeli Isa. Tau boito lotibonggohuu̒ mola, wau loloi̒ya mao̒, “Wonu ti Paaa̒ mohuto, ti Paaa̒ mowali mopoo̒luli mai olaatia.”

⁴¹ Lodehu hilaa li Isa totau boito. Oditolio, tileapu-Lio tau boito, wau lotahuda mao̒, “Wau̒ mohuto, polulilo mola!”

⁴² To saaa̒tilo boito ngongotio yilooli wau tio maloluli.

⁴³ Lapatao̒ ti Isa lei̒nao̒ olio wolo tahuli odie,

⁴⁴ “Poo̒dahai diila mao̒ wunggulia penu boli olita, bo ponao̒lo odeli iimamu, wau pohilea mao̒ olio u molantu mai u yio̒ maloluli. Lapatao̒ duo̒lo uiloo̒luli mao̒ olemu boito, podewowa mola bake modudua̒ u pilomalentao̒ lei Musa, odelo bukuti totau-tauwalo deu̒ yio̒ tutuulio tutu maloluli.”

⁴⁵ Bo tau boito lonao̒, wau mololaalaaita helo hungguli ulotoduo boito ode utoonulalo mao̒ tunggula ti Isa diila lowali tilumuwoto ode kota wolo nanaasa. Tio bo lotibiluloa̒ to bulemengo kota to tataa-mbatiyalo udiila otau. Bo tau tulusi hiponao̒wa mai lonto utoonulalo mao̒.