Joel 1 - LAPIHEN SIMBADIA DEUTEROKANONIKA

¹ Enda mo tennah Jahowa bai si Joel, anak si Petuel.

Bonek ukur bangsa Israel kumerna kerri hasil juma kalak i ipangan balang

² Dengkohken mo, alè kènè situa-tua; datèken kènè mo, karina kalak i Juda. Nung ma ngo masa bagèen tikan i nggelluh ndènè, barang i tikki nggelluh empung ndènè?

³ Sukutken mo simasa idi bai dukak-dukak ndènè; asa ipesakat kalak i sukuten idi bai dukak-dukak kalak idi. Cundut silako roh pè kennah ma mo dengkohenna, janah menerrusken bai cundut siperpodi.

⁴ Sangkem ngo balang oda terkira buèna, mersegeppen i gennep juma janah mengkerriken hasilna. Kadè dèng itadingken nuhnuhen balang sisada, ikerriken nuhnuhen sidèbanna nola.

⁵ O kènè permabuk, kèkè mo kè! O kènè permènum, tangis mo kènè! Kerna enggo irampasi ibas babah ndènè nai anggur sirimbaru.

⁶ Ikubu nuhnuhen balang ngo nagerrinta; mergegoh ngo kalak i janah oda terkira buèna, èpenna bagè pertajem sabit singa berru-berru.

⁷ Icèdaken kalak i ngo benna anggurta, dekket benna kayu aranta, pellin pangkalna nai ngo kessa tading. Ikolingi kalak i ngo karina batangna, dungna mbentar mo karina ranting-rantingna.

⁸ Tangis mo kènè, alè bangsangku, tosè bagè simerbaju merhendem menangisi permatè daholi kelleng atèna.

⁹ Enggo mbalang pagè bak anggur i Bages Jahowa nai. Nai merbonek atè mo karina imam, singkasah dak mengkebasi Jahowa.

¹⁰ Bagèndari salpun karina juma. Merhendem tanoh i; kerna salpun karina pagè, mperra buah anggur, janah kerri mo minak zaitun.

¹¹ O kènè pertani, derru-derru mo kè! O kènè simerpekken, tangis mo kè! Kerna salpun kerri pagè, simermotik dekket karina siperanien.

¹² Males karina nasa benna kayu simerbuah i juma imo: benna anggur, apel, kayu ara, korma, dekket ndalima. Nai oda nè mo merlolo atè sinterrem i.

¹³ O kènè imam simerkebbas i langgaten, selluk kènè mo abit goni, janah tangis mo kènè. Mbengket mo kènè mi Bages Jahowa derru-derru suntuk berngin, kerna maknè lot pèlèen anggur dekket pagè lako bai Dèbata ndènè.

¹⁴ Perèntahken mo bangsamu èn lako merpuasa, tingtingken mo runggu mbellen! Dilo mo karina pengulu bak situa-tua bagima karina pengisi Juda, asa roh mi Bages Jahowa, lako tenggo-tenggo mengido pengurupien tabasa.

¹⁵ Enggo njolmit ari Jahowa, ari simahantu i; katika Pergegoh Sisotercodi i perohken kememago.

¹⁶ Kerri salpun pangaen i lebbè matanta Oda lot nèngè surak lolo atè i Bages Dèbatanta.

¹⁷ Bennih mermatèen i tanoh ndagal. Oda lot nè pagè mahan peneppen, nai mernumaren mo karina langgih janah gabè terulang.

¹⁸ Merdengngah mo pinakan janah bulisah; malot nè jampalen bekkasna. Mali-ali mo karina biri-biri.

¹⁹ Alè Jahowa, taba kono ngo aku mengido pengurupien kerna enggo salpun karina males dukut jampalen nasa kayu pè enggo males janah mermatèen nidok bagè ipangan api.

²⁰ Baliksa binatang-binatang meriar si nirambah pè tenggo-tenggo ngo taba kono mengido pengurupien. Mak ndorok kalak i pepalum muas, kerna karina laè enggo ngkerrah.