Daniel 1 - LAPIHEN SIMBADIA DEUTEROKANONIKA

Tersèngèt diri si Daniel dekket dengan-denganna 1:1–6:28 Anak-anak perana Jahudi i istana si Nebukadnezar

¹ Tellu tahun enggo kessa Raja Joyakim memerèntah Juda, ikubu janah ijuhap si Nebukadnezar raja Babel mo kuta Jerusalem.

² Iduè Jahowa ngo ia menaluken Raja Joyakim janah mengerampasi dèba ibas ugas-ugasen maharga i Bages Jahowa nai. Iembah ngo, jelma sinitabanna mi bages dèbata sinisembahna i Babel, janah ugas-ugasen maharga sinirampasenna, ipennep ibagasen bekkas pemeneppen i bages dèbata sinisembahna i.

³ Kessa i nola idokken raja i mo si Aspenas, huntuen rumah tangga istana, lako memilih ibas kalak Israel sitertaban idi nai barang piga-piga anak perana pemparen raja barang pè pinupus simersangap.

⁴ Kennah anak perana siso mertikas ngo kalak i. Kennah maholi ngo kalak i, mersikkola ndates, ncardik janah mbages perbinettohenna, bana patut ndorok merkebbas i istana. Kennah ajaren si Aspenas mo kalak i menjaka dekket menurat kata Babel.

⁵ Itentuken raja nola dèng ma ngo ukum pangaen dekket ènumen kalak i kennah dos dekket sinipehantar bai raja si simpangaen. Enggo kessa ilatih bagi ibagasen tellu tahun, kennah mo kalak i menghadep raja i lako merkebbas i istana.

⁶ Ibas anak-anak perana idi nai dekket ngo si Daniel, si Hananya, si Misael dekket si Azarya, karinana ibas marga Juda nai.

⁷ Igancih huntuen bages istana mo gerar-gerar kalak i gabè: si Beltsazar, si Sadrakh, si Mesakh dekket si Abednego.

^8-9 Merkitè pengurupi Dèbata, seang janah ngkelleng ngo atè si Aspenas taba si Daniel. Mertekkat ngo si Daniel oda nè mengelamuni dirina ibaing pangaen bak ènumen anggur istana raja i nai, kumarna i ipidoken mo bai si Aspenas asa ndorok terolih pangaen sidèban.

¹⁰ Kerna mbiar midah raja, idokken si Aspenas mo, “Raja i sendiri ngo enggo menentuken panganen bak enumenmu, nai mula mengèkutken pendapetna kono kurang sèhat idahen daripada anak perana sidèbankenna, pasti ngo kennah bunuhenna aku.”

¹¹ Kessa i iarihken si Daniel mo tersèngèt misi bai pertaram sisnipasulak si Aspenas lako mengkebasi si Daniel dekket denganna sitellu i. Nina si Daniel mo,

¹² “Oji mo kami lebbè sipuluh ari dekkahna; berrè mo bai nami pellin roroh dekket laè mahan pangaen bak ènumen nami.

¹³ Enggo kessa sipuluh ari, pesobok mo kalih rupa nami dekket rupa anak-anak perana sikipangan pangaen nitetapken raja i, nai baing mo keputusen rembang mi penengenmu idi.”

¹⁴ Iuèi janah icuba pengabal idi mo sidekkah sipuluh ari.

¹⁵ Enggo kessa pul sisipuluh ari i, sehaten janah mergegohen nola ngo kalak i idahen daripada karina anak perana sienggo merolihken pangaen ibas mèja raja i nai.

¹⁶ Mungkah i sidi nai oda nè mo ikebbasi pengabal i bai kalak i pangaen dekket ènumen sinitetapken raja i, laènken pellin roroh dekket laè sambing kessa.

¹⁷ Iberèken Dèbata mo taba anak perana siempat i kepantasen dekket perbinettohen ibas persinabulen dekket hèlmu. Laènkenna i iberèken dèng ma ngo taba si Daniel kepantasen lako peterangken alaten dekket nipi.

¹⁸ I punca perguruen sitellu tahun sinitentuken raja idi, iuluken si Aspenas mo karina anak perana idi menghadep Raja Nebukadnezar.

¹⁹ Enggo kesa mengeranai dekket kalak i karina, idah raja i mo ukum si Daniel, si Hananya, si Misael, dekket si Azarya mengelebihi sidèbankenna i barang ibas dikèna sambing pè. Nai ipungkah kalak i mo merkebbas ibas istana raja i.

²⁰ Gennep ibagahken raja i persoalen lako mengido keterangen dekket penimbangien, idah mo peddah dekket ajar anak perana siempat i sipuluh kali termendèen daripada peddah dekket ajar karina peralaten bak sipandè mertabas i suberri kerajaenna i.

²¹ Tong ngo merkebbas si Daniel i istana soh italuken Raja Kores i Persia nai Babel.