1Korintus 1 - Taterisi Uwa Sanbagirmana Ibirmiserem

^1-3 Ga ip, Safna Uwa Sanbagirmana, kota Korintus je. Uwa Sanbagiri Jei aamei is mes jenbebili enggalfe, aamei igama etamwef angtane Jelemanfe. Aamei daamfennaber ijewera gwenaram Kristus Yesusfar, ane jega jem temawer aameiba safna daamfennam angtane seyafter gemerserem Yesus Kristus aa jei ne pujitawenaram jebar, tamna seyafter gemerserem jebe. Yesus Kristus Jeiba Tuhan jemnam, ane Jeiba Tuhan nemnaiserem jesam. Surta aaiserem amniwer, Paulus, kota Efesus je. Uwa Sanbagiri Jei ai ase Jener destabanant ai rasulf gwefe. Jei ams baftanant enggalfe, ai Taterisi Waakena Kristus Yesusem temawer ai agam nasipminennef. Ai ane Sostenes, nem afelen mesna, ai sembayanga as ge gwebabana Uwa Sanbagirfe, Uwa nemna, ane Tuhan Yesus Kristus mese, Jei waakena Jelemanaiserem ip is ga sege golmini, ane Jei ini imna is sege gwebaipmini waakenfer is ga sege folbamini.

Paulus Uwa Sanbagiri gam bala, “Ase samfer gulbana.”, aam temawer Uwa Sanbagiri Jei waakena gam eyeipmini angtane Korintusmanaiserem jebe.

⁴ Ai jeber-jeber im temawer Uwa Sanbagiri enggam ai bala, “Ase samfer gulbana.” Aamei daamfennaber Kristus Yesusfar, ane jega jem temawer Uwa Sanbagiri Jei waakena Jelemanaiserem is mes golmini ibe.

⁵ Aamei Kristus Yesusfar daamfennaber ijewera gwenaram, ane jega jem temawer waakena seyafter gemerserem aamei ga ima tebabili Uwa Sanbagirminiwer. Uwa Sanbagiri mes eyebili, jega tousaiserem imna unggwanfersus is ga sege folbamini taterisi Uwa Sanbagirmana jem temawer, ane aamei taterisi Uwa Sanbagirmana jeber-jeber waakenfer ga ima nasbinenne.

⁶ Ai taterisi Kristusem temawer is amsama nasipminennent waakenfer ibe, ane Uwa Sanbagiri mes eyebili jega aamei taterisi jeiserem imsa taabili ginggitfer im inibe.

⁷ Ga jem temawer, Mafnana Uwa Sanbagirmana Jei baabeta afa karunya Jemna ip golmini, ane aamei seyafter jeiserem imsa tebabili, aamei nomkefe Tuhan nemna Yesus Kristus ijebara fibanaram ini saaser-saasermer Jei gamjon Jam foryafe.

⁸ Uwa Sanbagiri Jei aamei ise Jener se kanautababili, jega aamei Kristus ginggitfer gam isa tebana jamer nunu umwef jepserem, nunu Tuhan nemna Yesus Kristus Jei gamjon jem foryalaiserem.

⁹ Uwa Sanbagiri Jei jeber-jeber eyebili seyafter Jei Jener aa jes bilirim Jam eyebife. Uwa Sanbagiri Jei aamei is mes jenbebili enggalfe, aamei daamfennaber igama gwef Tane Jemna Yesus Kristus, Tuhan nemnaiserem Jebar. Ane Uwa Sanbagiri Jei bunarsusfer aamei jeber-jeber is kanautababuwena, ane Jei aamei fas is Jam mirtebitefalyan.

Aamei ijama syensyanweyan safna nafis-nafsiserem jebe, jengga daamfen iniber isa gwena.

¹⁰ Am afelen mesna, ai aamei isa unggwanfer balbabili, bosna Tuhan nemna Yesus Kristusmanaiserem jeme, aamei daamfen iniber isa gwena. Aamei ina jam isa amaisona, jega aamei ijama syensyanweyan. Aamei seyafter daamfen iniber isa gwena, ane ga daamfenna tefner isa bili.

¹¹ Am afelen mesna, angtane afwenefener aa jei ge nwinbenerem Kloem jenabe, jei ai as enggam ne towastana angtane im nenennabe jei jenjen ge doksobana.

¹² Aamei imsa towaswena ai igi jame isa jem temawer balbabilirim, ga enggam, aamei seyafter nafis-nafismer ga ijesa balbabili. Angtane afweraiserem imniwer jei enggam ge gubili, “Ai Paulus asa tikwebaatini.” Ane angtane afweraiserem jei enggam ge gubili, “Ai Apolos asa tikwebaatini.” Ane nafsiserem jei enggam ge gubili, “Ai Petrus asa tikwebaatini.” Ane nafsiserem jeme ge gubili, “Ai Kristus asa tikwebaatini.”

¹³ Aamei gam ijewera gunonnorom, jeiserem kapka! Gam jega aamei Kristus imsa syentasnenne! Ai Paulus, ajam teryen ti salibibe im temawer. Aamei jame is jep ne baptistababilirim, aamei bosna amanaiserem jeme is jam ne baptistababiyen.

¹⁴ Ini amna saaser-saasersusfer folbana Uwa Sanbagiri Jei mes gwebili enggame, ai angtane nawerfenna gam baptisona, jei ga Krispuso Gayus jetefener. Ai angtane Korintusmana nafsiserem ai ajam baptistababiyen.

¹⁵ Angtane afa fas enggam jam guyon, “Paulus jei angtane jeiserem jam se baptistenerem enggalfe, angtane jeiserem gam etamwef Paulus tikwebaatinenefe.”

¹⁶ (O, ai namwer as sarbistaabon. Ai angtane Estefanusfar aa jei ge nwinbenerem jem jenabe, ai angtane jeiserem ai ames baptistababili Estefanusfaner. Afa ai angtane nafsiserem ai ajes baptistababilirim, ai fas ajam sarbabistaabonyan.)

¹⁷ Kristus Jei ai enggalfe as Jam baftayan, ai angtanes baptistababinennefe. Jengga Jei ai as enggalf baftana, ai Taterisi Waakena ai agam nasbinennef. Ai Taterisi Waakena jeiserem jam agalap nasbinennerem, ai ajam nasipmiyen tousaiserem angtanemanaiserem jeme, aam temawer ai bai angtane taterisi amna tefner ne saribefe. Afa jei taterisi amna tefner sene saribenerem, gam jega baabeta tere Kristusmanaiserem ti salibibe enggalfe angtane jem gam waakentababisife, baabeta jeiserem je ga jam se elsini.

Uwa Sanbagiri Jei baabeta Jemna ane tousaiserem Jemna Jei mes gweraulmini tere Kristusmanaiserem jeme.

¹⁸ Angtane Kristus jam tebayanaiserem, angtane jeiserem jei jam waakentababisiyen. Angtane jeiserem jei syefer enggam ge gubili jelem inibe, taterisi tere Kristusmanaiserem ti salibibe, taterisi jeiserem ba ol kabwaksam. Jengga nei Kristus nejeya tebanaram, Uwa Sanbagiri Jei nei nes waakentababisini. Ane nei ga nesa towaswena taterisi tere Kristusmanaiserem jeme, Uwa Sanbagiri ga baabeta Jelemana nep ga nes jem ge saamisini.

¹⁹ Taterisi Uwa Sanbagirmanaiserem jep ga enggam baatultel: “Ai As eyebili, jega angtane tousaiserem aa jei ne domolaram, tousa jemna jeiserem Ai ga As wasferulmisini. Ai As eyebili, jega angtane unggwanfer aa jei ge belajarwebilirim, seyafter jei aa jes ne mwangbabisinirim, jeiserem ga sege elbesini.”

²⁰ Ga jem temawer, angtane aa jes gane balbabilirim enggame jei seyaftersus tousa, ane angtane nafsi aa jei gam towas-towastanaram, ane angtane waakenfer aa jei ne nasbabilirim jes mese, angtane seyafter jeiserem namwer aa jei naawenaram, jemna tousaiserem fas. Bunarsus Uwa Sanbagiri mes ge saamisini tousa angtanemanaiserem ogiri aaiserem jebe, tousa jemnaiserem ol kabwak.

²¹ Tousaiserem Uwa Sanbagirmana jeba unggwandwasusum! Uwa Sanbagiri Jei mes eyebili, jega tousa angtanemanaiserem jeme angtane Uwa Sanbagiri jem jam ne damdamtaasiyen. Jengga Uwa Sanbagiri Jei enggam gul, Taterisi Waakena ga jamer sene nasbinenne. Ane Jei angtane Taterisi Waakena jeiserem aa jei ne taabilirim, ga jese waakentababisini. Angtane ogirmanaiserem jei Taterisi Waakena jeiserem enggam ne bili ol kabwak.

²² Angtane Yahudimana jei bwembwem tefner ne bili jam damtabif enggalfe, jei taterisi Uwa Sanbagirmana gane taabif. Ane angtane Yahudimanyanaiserem jei tousaiserem angtane ogirmanaiserem ga jetefener ne taabif.

²³ Jengga ai taterisi tere Kristusmanaiserem ti salibibe ai ga ajetefenera nasbinenne. Ini angtane Yahudimana kakalmer gangge folbamini taterisi jeiserem jem temawer, ane angtane Yahudimanyanaiserem jei enggam ge gubili, “Taterisi Kristusem temawer jeiserem ba ol kabwaksam.”

²⁴ Jengga angtane Yahudimana ane angtane Yahudimanyanaiserem Uwa Sanbagiri aa jes jenbebilirim, jei seyafter enggam mes ge towaswebili Uwa Sanbagiri Jei baabeta Jemna ane tousaiserem Jemna Jei mes ge saamisini, tere Kristusmanaiserem jeme.

²⁵ Angtane safe enggam sege gubili taterisi tere Kristusem temawer jeiserem jeba ol kabwaksam, jengga taterisi jeiserem jeme Uwa Sanbagiri ga jem se gweraulmini tousaiserem Jemna ba unggwandwasusum angtanemanaiserem jemniwer. Ane angtane safe enggam sege gubili Uwa Sanbagiri Jei baabetabaryan, baabeta Uwa Sanbagirmana ba unggwan-girsusum baabeta angtanemanaiserem jemniwer.

²⁶ Am afelen mesna, ima towaswena Uwa Sanbagiri is galap jenbebilintim, gwanan jes jepserem angtane imniwer bastowaifefener bosna unggwandusa gane domolant, angtane imniwer bastowaifer baabeta gane domolant, ane angtane galgalabaraiserem imniwer jeime bastowaifefener.

²⁷ Jengga angtane enggam aa jes gane balbabilirim “angtane jei teisyena”, Uwa Sanbagiri Jei angtane jeiserem ga jes gam destabaabili enggalfe Jelem angtanefe jam naawefe. Uwa Sanbagiri Jei angtane jeiserem gase destabaabili jega enggalf, angtane enggam aa jes gane balbabilirim “angtane jei tousa”, angtane jeiserem ga gam sege seferswebili. Ane angtane enggam aa jes gane balbabilirim “angtane jeiserem weren-werna”, Uwa Sanbagiri ga angtane jeiserem ga jes gam destabaabili jega enggalf, angtane enggam aa jes gane balbabilirim “angtane jei baabetabara”, angtane jeiserem jei gam sege seferswebili.

²⁸ Uwa Sanbagiri Jei angtane enggalaiserem ga jes destabaabili: angtane enggam aa jes gane balbabilirim “angtane jeiserem bastouya”, angtane baife aa jes gane gwebanaram, ane angtane igyeneiserem. Jei angtane jes galserem ga jes destabaabili jega enggalf, angtane sanbaka ogirmanaiserem jei gam sege etamwebili bastowaife.

²⁹ Ga jem temawer, angtane afa fas jen jena jam gaartenanna, ane enggam gunu Uwa Sanbagirem nwenabe, “Aiba waakenaiserem as mes eyeibene, ane jega jem temawer ai an ana ames waakentana.”

³⁰ Jengga Uwa Sanbagiri Jei Jener mesam eyebili, jega aamei Kristus Yesusfar daamfennaber ga ima gwena. Ane nei Kristus Yesusfar daamfennaber nejewera gwenaram, jem temawer ga nei tousaiserem ga neya domola, ane nei Uwa Sanbagirfar ga neya waakenswena, ane neiba Uwa Sanbagirem angtanesam, ane nei nes mes aftabunnu etam-etamawer ane terewer.

³¹ Jega jem temawer aamei enggammer igama eyebili, Taterisi Uwa Sanbagirmana jep aa gam baatultelam ga jes gemerserem ga gemer: “Angtane jener aa jes gam eyebilirim, jei jeiserem jem temawer jena jam gaartenanayan. Jengga Tuhan aa jes gam eyebilirim, jei ga jetefener gam goltenanna.”