LUKAS 1 - KITAB SUCI INJIL

Tampu'ukaina

¹ Teofilus ma d̄ese ra ntasa, Mboto dou marawa'u karawi tunti kataho mab̄oha lampa rawi ma wa'ura ndad̄i d̄iwoha ndaita.

² Tunti b̄a siad̄oho b̄une racaritana d̄i ndai b̄a dou-dou ma eda madana lampa rawi mandad̄i ede ra'aipu saramba wa'una, ro wa'u b̄a ede ngoa ra kahabana.

³ Sawa'u b̄a tio kab̄ae poda b̄a mada ra'aipu saramba wa'una, wi'ikai b̄a mada nataho d̄itunti sab̄ua lapora ma taho d̄i ru'u b̄a Ita.

⁴ Karawikai b̄a mada ede, loakud̄u b̄ade b̄a Ita b̄a one au rawa'u ngoa ra tei d̄i Ita ncihi romo.

Ngoa ra kahaba warakai la Yahya Mataki kandeu karaso dou

⁵ Aipu Herodes mandad̄i sangaji dana ra rasa Yudea, waraku sab̄ua dou imam mangara la Zakaria. Sia lu'u rau d̄i golonga imam Abia. Ngara weina la Elizabet, londo ra mai imam rau.

⁶ Mori ra woko wei ra rahina ede nakasanaku ade Ruma Hatalla. D̄uana ede nato'a sara'aku d̄i parenta ro Hukum Ruma kai kapoda ade.

⁷ Siad̄oho wati ntauna ana b̄ara la Elizabet nambonggi ro siad̄oho d̄uana wa'ura sama-sama tua.

⁸ D̄i sab̄ua ainaina, wakatu golonga Abia rakara wakatu la Zakaria kalampana rawi kai imam d̄itando Ruma Hatalla.

⁹ Kai ra'undi, rabiasa kai karawi b̄a imam-imam, la Zakaria b̄oha d̄imalu'u d̄i ade Bait Allah ro d̄imaka'a kamaya.

¹⁰ D̄i ade wakatu upacara ka'a kamaya, dou mamboto masambea ta ari lua.

¹¹ Wunga wakatu ede mala'eka Ruma katadana weki d̄i la Zakaria. Mala'eka ede kid̄ina d̄i sab̄ae wana meja hid̄i ka'akai kamaya.

¹² Wakatu eda b̄a la Zakaria mala'eka ede, sia mbora akana ro dahu.

¹³ Pala nggahi mala'eka ede, ”Aina dahu, Zakaria! Ruma Hatalla wa'ura ringana do'amu. Weimu la Elizabet d̄imanggana ana mone. Nggomi pab̄uapu tangara kai la Yahya d̄i sia.

¹⁴ Nggomi d̄imaneo poda ademu ro mboto dou d̄imakad̄ihi ade warakai ana dou ede peade!

¹⁵ Sia d̄imandad̄i dou mana'ekai ntanda b̄a Ruma, ro sia wati d̄imanono anggo atao nono d̄imawukai. Ratampu'u warana, sia d̄ikuasakai b̄a Roh Allah.

¹⁶ Mboto dou Israel d̄id̄anda ra wa'a b̄a sia mbali d̄i Ruma Hatalla, Ruma siad̄oho.

¹⁷ Sia d̄imandad̄i dou ranggadu b̄a Ruma ma tenggo ro makuasa b̄une la Elia. Sia d̄imakatahona ama lab̄o anana, ro dou ma wati to'a d̄i d̄ende kambalina d̄i ncai fiki ra kananu ma taho. Kai ndedena sia sadia weana ela Ruma ma wa'ura sadia d̄i ru'u Ruma.

¹⁸ ”B̄uneku d̄ib̄adekai b̄a mada b̄a one lampa rawi ede d̄imandad̄i?” sod̄i b̄a la Zakaria d̄i mala'eka ede. ”Mada wa'ura tua, ro wei mada wa'ura tua rau.”

¹⁹ Cambe b̄a mala'eka ede, ”Nahu ake Jibril. Nahu karawi wea d̄i ru'u Ruma Hatalla ro Sia ma rakakai nahu karongga haba mataho ake d̄i nggomi.

²⁰ Au ranggahi nahu, d̄imandad̄i rakasi wakatuna. Pala b̄ara nggomi wati imbimu, nggomi peade wati loamu nuntu ra nggahi; nggomi d̄imampongi sampe au ranggahi b̄a nahu ede ndad̄ina.”

²¹ Wunga ede, dou-dou mangena-ngena la Zakaria. Siad̄oho midi mena adena b̄ab̄auku ntoikaina sia d̄i ade Bait Allah.

²² Ro wakatu losa sia, sia wati loana nuntu ra nggahi lab̄o siad̄oho. Sia mbeina isara kai rimana, ro ngge'empa mpongina. Ndad̄i dou-dou nab̄adera b̄a one sia wa'ura edana ra ngoa b̄a Ruma d̄i ade Bait Allah.

²³ Sawa'u b̄a nggori wakatuna karawi d̄i Bait Allah, Zakaria edempara lao dula d̄i umana.

²⁴ Wati ntoina sawa'u b̄a ede, la Elizabet weina na'e loko, edempara nggempena d̄i ade uma lima wura ntoina.

²⁵ Nggahi sia, ”Cumpukaina Ruma bantuna nahu ro kamborana maja nahu.”

Warakai Ruma Isa d̄ingoa ra kahaba

²⁶ Wakatu la Elizabet wa'ura na'e lokona ini wura, Ruma Hatalla kauna mala'eka Jibril lao aka Nazaret, sab̄ua kota d̄i dana ra rasa Galilea.

²⁷ Jibril rakau lao d̄i dou siwe sampela, mangara la Maria. Dou siwe ede wa'ura sod̄i angi lab̄o sab̄ua dou mangara la Yusuf, londo ra mai Sangaji Daud.

²⁸ Mala'eka ede maina d̄i la Maria ro nggahina, ”Taho ra ntai, nggomi rambei b̄a Ruma bareka kai mataho poda! Ruma masama-sama lab̄o nggomi!”

²⁹ Ringana nggahi mala'eka ede la Maria wed̄i adena, ndad̄ina sod̄i-sod̄i b̄a adena auku aona salam ede.

³⁰ Edempara nggahi mala'eka ede d̄i sia, ”Aina dahu, Maria, b̄ara nggomi d̄ica'u b̄a ade Ruma Hatalla.

³¹ Nggomi d̄imana'e loko ro d̄imanggana ana, d̄i pab̄ua b̄a nggomi tangarakaipu Isa.

³² Sia d̄imandad̄i d̄ese ra ntasa ro d̄itangarakai Ana Ruma Hatalla Ma Wancu Na'e D̄ese Ra Ntasa. Ruma Hatalla d̄i makandad̄ina Sia sangaji b̄une Sangaji Daud, wa'i ra warona.

³³ Ro Sia d̄imandad̄i sangaji d̄i ade londo ra mai la Yakub santoi-ntoina ro Karaja'an-Na wati d̄imacumpu.”

³⁴ ”Pala mada mbuipu sampelaku,” nggahi la Maria d̄i mala'eka ede, ”b̄uneku loana ndad̄i lampa rawi ede?”

³⁵ Cambe b̄a mala'eka ede, ”Roh Allah d̄imamai d̄i nggomi, ro kuasa Ruma Hatalla d̄imawara d̄i nggomi. B̄ara ndedena ana d̄imamai ede d̄ipehekai Raso, Ana Ruma Hatalla.

³⁶ D̄ib̄ademu: Elizabet, cina ra angimu ede wa'ura na'e loko ini wura, konena sia wa'ura tua ro nggahi dou b̄a one sia nambonggiku.

³⁷ B̄ara d̄iru'u Ruma Hatalla wati wara madaloa ndad̄i.”

³⁸ Edempara nggahi la Maria, ”Mada ake ada Ruma; co'opu ndad̄ina d̄i mada b̄une ranggahi b̄a ita.” Edempara mala'eka ede tu'u wi'ina la Maria.

La Maria lao lambana la Elizabet

³⁹ Roci sawa'u b̄a ede, la Maria laona aka sab̄ua kota d̄i Yudea d̄i dana ra rasa doro.

⁴⁰ Sia laona aka uma la Zakaria, ro wunga lu'una, sia mbeina salam d̄i la Elizabet.

⁴¹ Ro ndede ringa b̄a la Elizabet salam la Maria, ana mawara d̄i ade loko la Elizabet ede rukuna. Edempara la Elizabet kuasakai b̄a Roh Allah,

⁴² edempara nggahina, ”Nggomiku ma ipi mbei b̄a Ruma bareka d̄i ade weki samenana dou siwe! Taho ra ntai d̄iru'u b̄a ana d̄i nggana b̄a nggomi ede!

⁴³ Cousi nahu ake ndad̄i ina Ruma mai rakana nahu?

⁴⁴ Ndede ringa b̄a nahu eli salam nggomi, ana d̄i ade loko nahu ruku b̄a neo adena.

⁴⁵ Taho ra ntika nggomi, b̄ara imbimu au ranggahi Ruma d̄i nggomi ede d̄imandad̄i!”

Do'a syuku la Maria

⁴⁶ Nggahi la Maria, ”Adeku maroi ra wadi Ruma,

⁴⁷ ro nawa ra sarumbuku makad̄ihi ade b̄ara Ruma Hatalla Makasalama weaku.

⁴⁸ Sia kawarana nahu, ada-Na ma'awa ra tuna! Tampu'u ake samenana bangsa manggahi nahu taho ra ntika.

⁴⁹ B̄ara Ruma Hatalla Ma Wancu kuasa karawina lampa rawi mana'e d̄i nahu. Taho raso ngara-Na.

⁵⁰ Sara'ana londo ra mai, Ruma nantau Rahama d̄i dou ma dahu d̄i Sia.

⁵¹ Kai rima-Na ma tenggo poda Sia cengga mbari mburana dou masombo, ro kakacona kananu siad̄oho.

⁵² Sangaji-sangaji kalondo b̄a Sia ese wawo dohokaina ro dou ma'awa ra tuna d̄ikad̄esena.

⁵³ Dou mahid̄o d̄ipaha kambocu b̄a Sia kai samenana mataho, dou mantau ra wara d̄ib̄aka kalosa kai rima ntaru.

⁵⁴ Sia bantu weana Israel ada-Na, b̄une rasake randawi-Na ro wa'i ra waro ndaita.

⁵⁵ Ruma wati nefana rasake-Na, Sia ncera ra mbura adena d̄i la Ibrahim ro londo ra maina sampe santoi-ntoina.”

⁵⁶ Kira-kira tolu wura ntoina la Maria ngge'ena lab̄o la Elizabet, ede ampona dula sia aka umana.

Warakai la Yahya Mataki kandeu karaso dou

⁵⁷ Rakara wakatuna d̄iru'u b̄a la Elizabet d̄i ngganakaina. Sia ngganana ana mone.

⁵⁸ Dou-dou d̄ikompe ra peina ro cina ra angina maringa rahama Ruma d̄i la Elizabet, ro siad̄oho neo ade rauna.

⁵⁹ Wakatu umu ana dou to'i ede waru nai, siad̄oho maina d̄imasuna sia. Siad̄oho nane'eku tangara ana dou to'i ede kai la Zakaria b̄une ngara amana,

⁶⁰ pala nggahi inana, ”Wati! Sia pab̄uaku d̄itangarakai la Yahya.”

⁶¹ ”Wati kone sab̄ua dou d̄i iwa ra wekimu mangara ndede,” nggahi siad̄oho d̄i sia.

⁶² Edempara kai isara, siad̄oho sod̄ina d̄i la Zakaria, ”La auku d̄i ne'emu tangarakai anamu?”

⁶³ La Zakaria rahona sab̄ua wadu tunti, edempara tuntina, ”Ngarana la Yahya.” Siad̄oho sara'a midi mena adena.

⁶⁴ Wakatu ede lalo la Zakaria loana nuntu ra nggahi wali ro roi ra wadina Ruma Hatalla.

⁶⁵ Dou-dou d̄ikompe ra peina sara'a dahu, ro haba ede nawa'ura mbou d̄i sara'a dana ra rasa doro Yudea.

⁶⁶ Sara'a dou ma ringa lampa rawi ede sod̄i menana b̄a adena, ”D̄imandad̄i auku ana dou to'i ede peade?” B̄ara Ruma mad̄ende ra wa'a sia.

La Zakaria karonggana haba rad̄i Ruma

⁶⁷ La Zakharaia, ama ana dou to'i ede, kuasakai b̄a Roh Allah ndad̄ina sia karonggana nggahi ra eli Ruma. Nggahi sia,

⁶⁸ ”Mai ndaita roi ra wadiku Ruma, Ruma Hatalla bangsa Israel! Sia wa'ura mai bantuna ela-Na ro hori kalosana rad̄i dosa siad̄oho.

⁶⁹ Sia mbeina ndai makasalama ma tenggo poda, londo ra mai la Daud, ada-Na.

⁷⁰ Ntoi poda wa'una kai ncai nabi-nabi rakad̄ale-Na, Ruma wa'ura mbeina rasake-Na

⁷¹ d̄imakasalama ndai rad̄i musu ndaita ro rad̄i kuasa dou-dou ma daca'u ndaita.

⁷² D̄ikatadakaina rahama-Na d̄i wa'i ra waro ndaita, rasake-Na ma raso ede d̄i mbei-Na.

^73-74 Sia sumpana d̄i la Ibrahim ama ndai, ro sakena d̄imakasalama ndai rad̄i musu ndai, loakud̄u ndai wati dahu karawi d̄i ru'u Sia

⁷⁵ karawi ntuwu d̄i Sia ro kasana wea ade-Na santoi mori ndaita.

⁷⁶ Nggomi, oe anaku, d̄ipehekai nabi Ruma Hatalla Ma Wancu D̄ese Ra Ntasa. Nggomi d̄i nggadu ulu d̄ima'ulukai Ruma d̄imahengga ulu ncai d̄i ru'u b̄a Sia,

⁷⁷ d̄imakahaba rerona d̄i ela-Na b̄a one siad̄oho d̄ikasalama, nggara Ruma Hatalla nawa'usira kangampu wea dosa-dosa siad̄oho.

⁷⁸ B̄ara rahama ro kasi ade Ruma Hatalla Ruma ndai; d̄ikasalamakaina ndai Sia maina. B̄une liro mawontu aimasid̄i,

⁷⁹ ndedeku Sia mbeina taroa-Na d̄i sara'ana dou ma mori d̄i ade rindikaina ro d̄idahukaina Sia d̄ende ra wa'ana ndaita d̄i ncai ma lao aka tahokaina.”

⁸⁰ Ana la Zakaria ede nanaha na'e ro nanaha tenggo. Sia ngge'e d̄i so sarae, sampe rakakai wakatuna sia katadana weki d̄i bangsa Israel.