YOEL 1 - KITAB MOLIYOUS BILITA MONONDOK

¹ Naiyamo ko Temeneno na teteba doi Yoel, Petuel napau.

Ko Israel miano poloon sabab koasi asilo kabus betek kaane

² Ndongoliyokai, eh sasaibino kolaka-lakai; palaatikanggenekai ko Yehuda miano sasaibino. Palaatikanggenekai kolangge moteali bunonaiya doi tempo muloonu, kai doi mukakai sasaibino naloonu?

³ Salitaikene doi mupau-pau dokajadianoo; sulano yanila napelenggene doi yanila napau-pau dosalitadoo. Konakaturunan bailon sio namondongolii koidan, tukon banggadudukenekai doi nakaturunan bailonggon.

⁴ Betek tambuno mo aki natangait konakadaang, sake doi asi-asi tukon kaane kabus kohasilo. Indee dobetekoo tambuno nakinaan sisano, dobetekoo tambuno bailon koidan komo akabuse.

⁵ He sasaibino komalangu, bangunokai! He sasaibino komotoloinoman, kokiilokai! Sabab anggur moboolu rinampaso luwedoi suumu.

⁶ Pasukan betek lobosio konda tano; yanila bukuan tukon aki tangait konakadaang, kongolingo pokakana kosinga molukono panggiiso konamamanganan.

⁷ Yanila rusake konda anggur balango, tukon nda ara batango, baimo tuwolo komototinggal. Kobatang-batango yanila kanite, sampe kolangga-langgano teali moute.

⁸ Kokiilokai he umat, buno pau boine mosusa mokokiiliyo konabibian sineseang momate.

⁹ Gandum tukon anggur lapuso luwedoi Temeneno Na Bonua. Maka sasaibino koimam boboiyo, kooluno toik leleaniyo ko Temeneno.

¹⁰ Budodoiya koasi-asi manaso. Kobuta susamo; sabab kogandum manaso, motuulokai koanggur saono, tukon kabusokai kozaitun lisisono.

¹¹ He kopetam, mandaungokai! He komo makubai anggur asino, pokokiilokai! Sabab kogandum, jelai tukon sasaibino komopinupui manas.

¹² Kayung-kayung saono doi padang teali motuul sasaibino; koanggur batango, apel, ara, kurma tukon delima. Maka korayat akimo natedes koidan.

¹³ He ko imam sasaibino moleleaniyo ko balabaan, pakeokai kokalung, tukon kokiilkai. Usokokai doi Temeneno Na Bonuo tukon pomandaung meeng kopopok, sabab akiyo kososubakon anggur tukon gandum motuuk doi mu Mian Bisa.

¹⁴ Parentayomokai komu umat sulano napuasa, popitoikenemokai korayat napototongian! Koloyomokai sasaibino ko katua tukon laka-lakai tukon sasaibino korayat Yehuda, sulano nalubat doi Mian Bisa Na Bonua, tuuk masadai makabi tulung doiya-Na.

¹⁵ Oloyo Temeneno lolanimo, oloyo mo minatakuton; tempo Mobabasal Konakuasa lubatene konamanasan.

¹⁶ Kokinaan kabus manas doi mata nggita salaano doi nda Mian Bisa Na Bonua akiyonokai koidan kotedesan.

¹⁷ Kolibuang mate doi buta momotuul tuuno. Akiyono ko gandum tuuk moinabos, tukon kolonggo-longgo kosong jadi kalimo manas.

¹⁸ Iyayon mopiniala ngaaton tukon iyoso; akiyono koidan kobulung doi padang tuuk doiyamo. Domba tambunokai molisuki.

¹⁹ Oh Temeneno, yaku makabi tulung doi-Koo sabab kobulung doi padang-padang motuul tuuno kokayung-kayung motuul tukon mate buno adukon aung komo lalakene.

²⁰ Tukon iyayon-iyayon mbosolomo doi bonggulung masadai doi-Koo makabi tulung. Yanila akikai nabiayaikene komolouwan, sabab kopaisu-paisu batango motuul sasaibino.