TEALIAN 1 - KITAB MOLIYOUS BILITA MONONDOK

Dunia tukon sasaibino koantoko napinasitakaan salitano

¹ Doi tumbe-tumbeno, doi tempo Mian Bisa naatambuunano kona pasitakaano kodunia tukon sasaibino koantoko,

² dunia akiyon nadaano, tukon daano monggalanggabut. Ndalangon mobabokolan, mo sunggupiyo sasaibino kolobo, modaanoon doi kalipookan lalomo, bai ko Mian Bisa nakuasa palabiyok doi paisudoo bungguno.

³ Ko Mian Bisa bantile, “Tealimo komadialan!” Maka daanomo komadialan.

⁴ Mian Bisa sanaang mokitayo dolanggedoo. Maka yana poalaasene domadialanoo luwedoi kalipookan,

⁵ tukon sombuikene domadialananoo “Oloyo” tukon kalipookanoo “Popook”. Toliiso kopopook tukon – tealimo kododowa doiyamo kooloyo komeengo.

^6-7 Doibundu ko Mian Bisa bantile, “Tealimo meeng kodunia pokukupo sulano naebese dopaisudoo nateali lua, tukon yana taane doi lua kotampat mopoalaas.” Maka dolanggedoo tealimo. Bunomo doiya ko Mian Bisa nakubaiyano kodapang moalaase kopaisu modaano tambikon doi dapang adenodoo luwedoi paisu modaano doi bungguno.

⁸ Dunia pokukupo sinombuikon “Timbu”. Toliiso kopopook tukon tealimo kododowa. Doiyamo kooloyo koluano.

⁹ Doibundu ko Mian Bisa bantile, “Paisu modaano doi timbu adeno nalomba doi meeng kotampat sulano naikon natokita kobuta.” Maka dolanggedoo tealimo.

¹⁰ Butadoo ko Mian Bisa sombuikene “Buta tina”, tukon dopaisudoo napototongian yana sombuikene “Tobun”. Tukon ko Mian Bisa sanaang mokitayo dolanggedoo.

¹¹ Ko Mian Bisa bantile koidan, “Tadukai kobuta natubekene sasaibino kolangge kaliangano motubo doiyamo meeng kokaliangano modaano kobuku-bukuno tukon meeng kokaliangano modaano kosao-saono.” Maka tealimo dolanggedoo.

¹² Bunomo doiya kobuta tubokene sasaibino kolangge kaliangano motubo. Tukon ko Mian Bisa sanaang mokitayo dolanggedoo.

¹³ Toliiso kopopook tukon tealimo kododowa. Doiyamo kooloyo kotoluno.

^14-15 Doibundu ko Mian Bisa bantile, “Siokai nadaano kolangge-langge momadialan doi timbu sulano nakadiolongiyo kodunia, sulano napoalaasene kooloyo luwedoi popook, tukon sulano natudoikene koloonu natambuunan, kooloyo, taun, tukon agama oloyono mobabasal.” Maka dolanggedoo tealimo.

¹⁶ Doibundu ko Mian Bisa kubaiyo kolua kolobo madialan mobabasal, doiyamo oloyo matano sulano nakuasaiyo kooloyo, tukon bituwon nakuasaiyo kopopook; sangalaasan doiya yana kubaiyo kobituwon-bituwon pauno.

¹⁷ Ko Mian Bisa abese dolobo-lobodoo momadialan doi timbu sulano nakadioloniiyo kodunia,

¹⁸ sulano nakuasaiyo kooloyo tukon popook, tukon sulano napoalaasene komadialan luwedoi kalipookan. Tukon ko Mian Bisa sanaang nakitayo dolanggedoo. Toliiso kopopook, tukon tealimo kododowa.

¹⁹ Doiyamo kooloyo kosanggapo.

²⁰ Doibundu ko Mian Bisa bantile, “Siokai doi paisu lalomodoo nabadaang kokaliangano kolobo motubo moposinggabut tukon doi dapang kotomisi mobenga-benga.”

²¹ Maka ko Mian Bisa tealikene koiyayon-iyayon mobabasal doi tobun, tukon sasaibino kokaliangano kolobo motubo doi paisu lalomo, tukon sasaibino kotomisi kaliangano. Tukon ko Mian Bisa sanaang nakitayo dolanggedoo.

²² Ko Mian Bisa balakaatio sasaibinodoo tukon beena parenta doi langgedoo motubo doi paisu lalomo napololokon tosuungi tukon koonoiyo kotobun, tukon kotomisi-tomisi sulano natosuungi badaang.

²³ Toliiso kopopook tukon tealimo kododowa. Doiyamo kooloyo kolimano.

²⁴ Doibundu ko Mian Bisa bantile, “Siokai nadunia nia naosumbete sasaibino koiyayon doi lipu, momaumalu tukon mombosolo, babasal mau mopoipoisik.” Maka dolanggedoo tealimo.

²⁵ Bunomo doiya ko Mian Bisa nakubaiyano sasaibino doiya tukon yana sanaang mokitayo dolanggedoo.

²⁶ Doibundu ko Mian Bisa bantile, “Diabudoo kita naikon mokubai bangkapi naikon moteali buno kita tukon adukon pokakana kita. Yanila naikon kuasaiyo koikan-ikan, tomisi-tomisi, tukon sasaibino koiyayon bailon, mau momaumalu maukai mombosolo, mau mobabasal mau mopoipoisik.”

²⁷ Bunomokai doiya ko Mian Bisa napasitakaano kobangkapi, tukon tealikene yanila adukon pokakana kobutongo susuungo. Yanila pinasitaka mala-malane tukon boine.

²⁸ Doibundu ko Mian Bisa balakaatio yanila tukon bantile “Mosuungo pau tumbu mobadaang, sulano komu katulunan nadungoliyo posaapon nadunia nia bunggono tukon nakuasaiyo. Komuyu kuparentayo moatule koikan-ikan, kotomisi-tomisi tukon sasaibino koiyayon bailon mombosolo.

²⁹ Tuuk komukinaan Yaku beekene doikoo sasaibino kokaliangano kolobo motubo modaano kobukuno tukon sao-saono.

³⁰ Bai sasaibino kotomisi tukon iyayon bailon mombosolo, Yaku beena bulung tukon mosinakkanggon modaano koloono doiyamo konakinaan.” Maka dolanggedoo tealimo.

³¹ Ko Mian Bisa mbalenge sasaibino kolobo molapamo nakubayanodoo, tukon Yana sanaang tuuno. Toliiso kopopook tukon tealimo kododowa. Doiyamo kooloyo konoomo.