MARKUS 1 - KITAB MOLIYOUS BILITA MONONDOK

Yohanes Pasau Mian naotunggul

¹ Naiyamo ko Bilita Monondok tentang Yesus Kristus, Mian Bisa Napau.

² Bilita Monondokoo tinambuun pokakana Nabi Yesaya natinulis, buno naiya, “ ‘Naiyamo Daku binotokon,’ Mian Bisa bantile; ‘Yaku bintekene yana loolukon doi Komuyudoo, sulano yana nabukayo kololoon motuuk doi Komuyu.’

³ Daano komian mowowookon doi padang lalomo, ‘Sadiayo kololoon motuuk doi Temeneno; keseayo kololoon mo Nalinoloi.’ ”

⁴ Pokakana domo totulisoo, bunomo doiya koidan Yohanes lubat doi padang lalomo. Yana sauwo komian tukon pelenggene kobilita moluwedoi Mian Bisa. “Komuyu sio pobadodoloon doi polalim-lalim tukon sio po sinau, sulano ko Mian Bisa naompunio komuyu,” bunomo doiya Yohanes nabantilan.

⁵ Sasaibino komian doi lipu Yudea tukon kota Yerusalem miano ampakon mondongolii Yohanes naotunggul. Yanila mangakukene kona lalim-lalim, tukon Yohanes sauwo paisu yanila doi Yordan Paisunobatango.

⁶ Yohanes napakean unta buluno. Kona pabaang kulit, kona kinaan betek tukon ani dokoto.

⁷ Yana babilitakene naiya bilita nia, “Sio lapa yaku lubat, naikon lubat komian mo lobian babasal kona kuasa doi yaku. Mau nabaino yaku totuku mobukayo Kona sapatu alosodoo, yaku aki nateali.

⁸ Yaku sauwo komuyu tukon paisu, bai Yana naikon sauwo komuyu tukon Mian Bisa Na Roh.”

Yohanes sauwo Yesus

⁹ Doiya kosinggatoo Yesus lubat doi Nasaret lipu Galilea, tukon Yohanes sauwo Yana doi Yordan Paisunobatango.

¹⁰ Salataa Yesus sumbot doi paisudoo, Yana kitayo kotimbu tobuka tukon ko Mian Bisa Na Roh obulus pokakana kotomisi lapatiing doi bunggono.

¹¹ Lapa doiya tololongol ko Mian Bisa alalo mobantile, “Ikoomo Daku Pau Sineang. Ikoomo komo kindendeke Konoanggu.”

Ibiliis sobaiyo Yesus

¹² Lapa doiya Mian Bisa Na Roh antekene Yesus doi padang lalomo.

¹³ Sangkap kolono kooloyo Yesus daano idoo, Ibiliis nasobaiyano. Iyayon-iyayon mombosolo daano podungoli idoo tukon Yana, tukon malaekat-malaekat leleaniyo Yana.

Yesus uange kosanggapo komian mosabang

¹⁴ Salataa Yohanes tinalunggu, Yesus ampakon doi Galilea, tukon babilitakene idoo ko Bilita Monondok moluwedoi Mian Bisa.

¹⁵ Konabantilano, “Mosobito naikon ko Mian Bisa natambuune kona maparentaan. Pobadodoloon doi polalim-lalim, tukon anggayomo ko Bilita Monondok moluwedoi Mian Bisa!”

¹⁶ Singgatoo Yesus ampakon doi Danau Galilea bibilo, Yana kitayo komian lua mosabang, doiyamo Simon tukon Andreas utuso piyoto. Yanila daano momalako ikan tukon bapukat ikan doi paisudoo.

¹⁷ Yesus bantile doi yanila, “Lainge Yaku. Yaku otunggule komuyu poteali popukat mian.”

¹⁸ Maka yanila polaing tinggale kona pukat tukon lainge Yesus.

¹⁹ Yesus ampakon momeenggon, maka kitayo koidan kolua komian montolutus bailon, doiyamo Yakobus tukon Yohanes, Zebedeus nalabuk-labuk. Yanila luaila daano doi duangan lalomo tukon yanila daano mokindendeke kona pai pukat.

²⁰ Yesus banggadudul uange yanila. Tukon yanila tinggalemo kotamano tukon napai mian tinambo doi duanganoo. Maka yanila ampakon lainge Yesus.

Mian mo inusoki ibiliis

²¹ Yesus tukon Napololaing-pololaing polong doi kota Kapernaum. Doi oloyo Tadean koikoidanggon, Yesus usok doi bonua kaledaan maka tambuune kona mongotunggulan.

²² Ko mian-mian mondongolii Kona otunggul masainding tuuno, Kona mongotunggulan. Sabab, Yana mongotunggul inangga, aki nabuno koguru-guru agama.

²³ Doiya kosinggatoo meeng komian mo inusoki ibiliis usok doi bonuadoo kaleda lalomo, tukon wookon,

²⁴ “Eh Yesus, Nasaret miano, Ikoo yase kubaiyo oila doi kami? Ikoo lubat sulano musilakayo kami? Yaku toiyo indee Ikoo: Ikoomo kobito-bito mo moliyous moluwedoi Mian Bisa!”

²⁵ “Tade!” Yesus gilaiyo do ibiliisoo, “Koliato doi mian nia!”

²⁶ Maka do ibiliisoo tika-tikakene do mianoo kokobukuan, doibundu yana dampas doi mianoo maka wookon.

²⁷ Sasaibino komian masainding tuuno, tobikon yanila bantil meeng tukon bailon, “Oh, oila nia? Meeng kootunggul mo boolu! Tukon nainanggaan tukon nakuasa Yana parentayo do ibiliisoo nadampas, tukon yanila loingiyo Yana!”

²⁸ Maka dobilitadoo motuuk doi Yesus tolongol tukon mosobit doi mian badaang doi posaapon kolipu Galilea.

Yesus aline komian badaang nasesel

²⁹ Yesus tukon Napololaing-pololaing tinggale do bonuadoo kaleda, tukon ampakon doi Simon tukon Andreas napai bonua. Yakobus tukon Yohanes ampakon koidan polaing yanila.

³⁰ Simon namonianan moluko seselon maligoot doi namooloan. Singgat doiya Yesus tukon Napololaing-pololaing usok doi bonuadoo, doiya langgedoo pinopitoikon doi Yesus.

³¹ Maka Yesus ampakon doi Simon namonianan, tukon taaniyo kolimano, maka bangune. Kona maligoot tangalin, tukon Yana koidan leleaniyomo yanila.

³² Doi kinobiannoo, sambuno sosoopo kooloyo, mian-mian babayo sasaibino komian mo seselon tukon mo inusoki ibiliis doi Yesus.

³³ Sasaibino komian doi kotadoo pototongi doi bonuadoo salaano.

³⁴ Maka Yesus aline komian badaang mo kanakon moisalomo kosesel, tukon koidan siikayo koibiliis mobadaang. Yana aki napataikene do ibiliis-ibiliisoo nabasilingan, sabab yanila toiyo indee miano Yana.

Yesus bangotunggul doi Galilea

³⁵ Modoakon kooloyo, sodo dodowa soono, Yesus banguno tukon tinggale do bonuadoo. Yesus ampakon doi lipu mo kiis doi kota tonggulungo, tukon sambeang idoo.

³⁶ Bai Simon tukon tula-tulano ampakon umboliiyo Yesus.

³⁷ Tukon salataa yanila pososuunggene, yanila bantile, “Sasaibino komian daano moumboliiyo Tama.”

³⁸ Bai Yesus timbiliyo, “Maimo nda banggadudulkene konda ampakonan doi kota-kota bailon doi napokoolanikonan naimbaa. Yaku sio kumongotunggul indaa koidan, sabab doiyamo komakisuuto Yaku modoisumaikon.”

³⁹ Tobikon doiya Yesus ampakon doi yayaa posaapon ko Galilea, tukon mongotunggul doi bonua-bonua kaleda tukon siikayo koibiliis.

Yesus tangalinggene komeeng komian mo takatolon

⁴⁰ Meeng komian mo takatolon mo minosikiton lubat doi Yesus. Mianoo ladanggene kotuulo, tukon bantile, “Kalu Tama yase, Tama namoola alinaku.”

⁴¹ Yesus seseange do mianoo. Maka, Yana taape do mianoo tukon bantil, “Yaku yase, mutangalino!”

⁴² Doiya kosinggato kona takatol lapus tukon tangalin.

⁴³ Maka Yesus sumboliiyo yana ampakon tukon ingotiikene,

⁴⁴ “Ingate, inai mosalitayo doi inde-indee komiano, bai ampakono doi imam, tukon kabiyo yana natantukanggene ikoo molapamo tangalin. Maka domu tangalinganoo sosubakene komu sosubakon loingikene Musa napinarentahkon, teali meeng kobukutii doi mian-mian baikon ikoo bisa-bisa lapamo tangalin.”

⁴⁵ Bai do mianoo ampakono, tukon momeenggon basalitakene do kadadianoo doi yayaa polong Yesus aki namoola usok doi kota tukon bangokitakonggon. Yana tongo dungol doi kota tonggulungo doi lipu mokiis. Bai komian momeeng lubotiiyo Yana doi yayaa.