LUKAS 1 - KITAB MOLIYOUS BILITA MONONDOK

Pololukoni

¹ Teofilus mo monondok konoano, Badaang komian molapamo kakaate batulis tukon taatur tentang ko kajadian-kajadianoo kaliangano mo lapamo teali doi kita nia.

² Yanila batulis pokokonoi tukon mo sinalitaikon doi kita doi mian-mian mo kitayo susuungo do kajadian-kajadianoo doi natambuunan, tukon doibundu babilitakanggene kobilitano.

³ Salataa yaku tukon telitio tuuno sasaibinodoo luwedoi natambuunan, yaku aanggene monondok momotulis meeng kolapuran mo taatur tuuk doi Tuan.

⁴ Yaku lakukanggene doiya, sulano Tuan natoiyo baikon oila komo lapamo Tuan otunggukene doiya takainomo bisa.

Napinopitoikonan Yohanes Pasau Mian Salani nasinuungan

⁵ Singgatoo Herodes teali tomundo doi lipu Yudea, daano komeeng koimam kosambuno Zakaria. Yana tongusokon doi imam-imam Abia. Kona boloki kosambuno Elisabet, koidan turunan imam.

⁶ Konapotuboan langkai boloki sanaanggene ko Mian Bisa noano. Luaila loingiyo sasaibino koparenta tukon Temeneno na Ukum tutuuno.

⁷ Yanila akiyo kona pau sabab Elisabet komba tukon yanila luaila motuwamo.

⁸ Daano kooloyo meeng, salataa doi Abia nagolongan malaat giliran, Zakaria ampakonggene kona limang buno meeng koimam doi Mian Bisa salaano.

⁹ Tukon undian, mo biasa linakukanggon doi imam-imam, Zakaria malaat obos usok doi Temeneno Na Bonua lalomo tukon suayo kamangian.

¹⁰ Daano mosuayo kamangian, komian badaang sambeang doi tonggulung.

¹¹ Doiya kosinggatoo ko Temeneno namalaekat okitakene kobutongo doi Zakaria. Malaekatoo kokondong taambikon bakalinga doi meja nasinuaan kokamangian.

¹² Salataa Zakaria kitayo do malaekatoo yana pusing tukon matakut.

¹³ Bai do malaekatoo bantile, “Inai matakut, Zakaria! Ko Mian Bisa lengelemo komu sambeang. Komu boloki Elisabet naikon mosuung meeng kopau malaneno. Ikoo sio musombuikene kosambuno, Yohanes.

¹⁴ Ikoo naikon laba tuuno tukon badaang komian molaba kalu do paudoo sinuungo.

¹⁵ Yana teali mian babasal doi Temeneno napokita, tukon yana aki nainume koanggur kai suka momosopot. Salataa sinuung Mian Bisa Na Roh komo kuasaiyo yana.

¹⁶ Badaang ko Israel miano naikon kona binaba abali doi Mian Bisa, doi napoo Temeneno.

¹⁷ Yana naikon teali Temeneno nasosumbolii mo bukuan tukon daano kona kuasa buno Elia. Yana podamekene kotama tukon pau, tukon mian mo aki naloingiyo naikon babayo abali doi loloon pikilan mo talakana. Tukon buno doiya yana sadiayo komeeng kotambuno kobanggapi mo tasadiamo tuuk doi Temeneno.”

¹⁸ “Bulaa kai daku toiyano do lobodoo naikon moteali?” Zakaria sadaiyo doi malaekatoo. “Yaku motuwamo, tukon daku boloki koidan motuwamo.”

¹⁹ Malaekatoo timbiliyo, “Yaku nia Gabriel. Yaku leleaniyo ko Mian Bisa tukon yanamo komo sumboliiyo yaku mopelenggene nabilita nia mo monondok doikoo.

²⁰ Oila daku binantil, naikon teali nalaate kotempono. Bai badungga ikoo aki mumangangga, ikoo sio naaki namoola basilingan; ikoo naikon ponga polong doi oila daku binantiloo natealian.”

²¹ Daanoon mobuno doiya, komian momeenggon totiiliyo Zakaria. Yanila masainding bulaando yana malumbit doi Temeneno Na Bonua lalomo.

²² Tukon salataa yana tobuat, yana akimo namoola basilingan doi yanila. Yana baino mebee paloosan tukon limano, tukon tataap ponga. Maka domianoo toiyomo baikon yana lapamo mokita komeeng kopokita doi Temeneno Na Bonua lalomo.

²³ Salataa kabus kona tempo balimangan doi Temeneno Na Bonua, Zakaria mule doi nabonua.

²⁴ Aki namalumbit koikoidan, kona boloki Elisabet tianan, maka yana dungol doi nabonua lalomo lima kobituwon kona kalumbit.

²⁵ Yana bantile, “Kona pupusan ko Temeneno tulungiyomo yaku tukon alapusemo daku tinotulaian.”

Yesus nasinuungan nabinabotilanggonan

²⁶ Salataa Elisabet lapa tianan noom kobituwon, Mian Bisa sumboliiyo komalaekat Gabriel naampakon doi Nasaret, meeng kokota doi lipu Galilea.

²⁷ Gabriel sinumbolii doi meeng kopau boine, kosambuno Maria. Do pauboinedoo lapamo pobibianggon tukon meeng komian kosambuno Yusuf, Tomundo Daud naturunan.

²⁸ Malaekatoo lubat doi Maria tukon bantile, “Kinatauwan, ikoo Temeneno mo balakaatiyo tukon doi namonondokan! Temeneno polaing tukon ikoo!”

²⁹ Mondongolii do malaekatoo nabantilan Maria ngginggim, tobikon mansa-mansadai doi noano lalomo oila komaanano do kinatauwanoo.

³⁰ Maka do malaekatoo bantile doi yana, “Inai matakut, Maria, sabab ikoo pokokonoi doi Mian Bisa noano.

³¹ Ikoo naikon tianan tukon suunge komeeng kopau, mo sio ikoo musombuikene Yesus.

³² Yana naikon teali babasal tukon naikon binantil Mian Bisa Napau Mo Tatandak Tuuno. Temeneno Mian Bisa naikon tealikene Yana tomundo mobuno Tomundo Daud, nambumbu looluk.

³³ Tukon Yana naikon maparenta buno tomundo doi katurunan Yakub posidutukon. Kona batomundoan akiyo kona pupusan.”

³⁴ “Bai yaku nia akiyoon kupotoikon komalane,” Maria bontiikene doi malaekatoo, “bulaando do lobodoo namoola teali?”

³⁵ Malaekatoo timbiliyo, “Mian Bisa Na Roh naikon lubat doikoo, tukon Mian Bisa nakuasa lindungiyo ikoo. Doiyamo kosababpo do paudoo naikon mo sinuung binantil Moliyous, Mian Bisa Napau.

³⁶ Neneeke: Elisabet, do tolidamudoo lapamo tianan noomo kobituwon, mau kai yana namotuwamo tukon komian bantile baikon komba.

³⁷ Sabab doi Mian Bisa akiyo komo aki nateali.”

³⁸ Maka Maria bantile, “Yaku nia Temeneno napeleleani; sodiiyomo nateali doi yaku bunomo domu bantilanoo.” Maka do malaekatoo ampakono mootinggale Maria.

Maria lubotiiyo Elisabet

³⁹ Salataa lapa doiya, Maria ampakon doi meeng kokota doi Yudea doi lipu mobunggukon.

⁴⁰ Yana ampakon doi Zakaria nabonua, tukon salataa usok, yana mebee kinatauwan doi Elisabet.

⁴¹ Tukon sambuno Elisabet lengele Maria nakinatauwan, do paudoo doi Elisabet tiano lalomo palabiyoko. Maka Elisabet Mian Bisa Na Roh kuasaiyomo,

⁴² maka wookon, “Ikoomo komo binalakaati doi sasaibino koboine! Binalakaati do paudoo naikon ikoo mo suunge!

⁴³ Indee yaku tobikon Yesus tinano nalubat doi yaku?

⁴⁴ Salataa yaku lengele komu kinatauwan, do paudoo yaku motiananggene biyok-biyoko doi nalabaan.

⁴⁵ Monondoko ikoo, sabab mangangga baikon oila komo Temeneno nabinantil doikoodoo naikon tealimo!”

Maria basukuur

⁴⁶ Maria bantile, “Konoanggu nggaale ko Temeneno,

⁴⁷ tukon butonggu laba-laba sabab ko Mian Bisa doiyamo daku Pasalamaton.

⁴⁸ Yana neneeke yaku, napeleleani mo tinotulai! Tambuun doiya budodoo sasaibino kobangsa bantile yaku sanaango.

⁴⁹ Sabab ko Mian Bisa Mo Babasal konakuasa kubaiyo kolobo mobabasal doi yaku. Kosambuno moliyous.

⁵⁰ Katurunan momeenggon katurunan Temeneno mebee soyang doi mian mo matakutene doi Yana.

⁵¹ Tukon limano mo bukuan yana poalaasene komian mobabanggaal, tukon nggabute yanila namakisuut.

⁵² Kotomundo-tomundo inobuluson doi nakursii tukon komian motinotulai kinatandakon.

⁵³ Mian momalaal inokonii tukon sasaibino kona monondokan, komo kaasa siniika tukon akiyo koalatino.

⁵⁴ Yana tulungiyo kona peleleani Israel, loingiyo kona toon tinetebaikon tukon nda mbumbu looluk.

⁵⁵ Temeneno aki natoliminggene kona teteba, Yana monondok konoano doi Abraham tukon nakaturunan polong posidutukon.”

⁵⁶ Uga-ugaate tolu kobituwon kona kalumbit Maria podungoli tukon Elisabet, maka yana namule doi nabonua.

Yohanes Pasau Mian Salani nasinuungan

⁵⁷ Polongo kotempono Elisabet namosuungan. Yana suunge komeeng kopau malaneno.

⁵⁸ Tula-tulando mopololanikon tukon namotolutusan ndongoliiyo bulaando kona monondokan ko Temeneno doi Elisabet, tukon yaniladoo polaing laba-laba tukon yana.

⁵⁹ Salataa do paudoo alumo kooloyo kona umur, yanila lubat mosunate yana. Yanila yase sombuikene do paudoo Zakaria monurut tamano sambuno, bai kotinano bantile,

⁶⁰ “Aki! Yana sio nasinombuikon Yohanes.”

⁶¹ “Akiyo komeeng komian doi mumontolutusan kosambuno mobuno doiya,” yanila bantile doi yana.

⁶² Maka tukon isarat, yanila mansadai doi Zakaria sambu oila komo moola bineekon doi paudoo.

⁶³ Zakaria mangkabi meeng kobatu tulis maka tulise, “Kosambuno Yohanes.” Yanila sasaibino masaingding.

⁶⁴ Doiya kosinggatoo koidan Zakaria moolamo basalita tukon nggaale ko Mian Bisa.

⁶⁵ Komian napokoolanikonan sasaibino matakut, tukon do bilitadoo tasabukono doi posaapon kolipu bunggono doi Yudea.

⁶⁶ Sasaibino komian mo molongol doiya langgedoo bantil-bantil doi noano lalomo, “Oilamo kona tealian do paudoo naikon?” Sabab ko Temeneno lolainge yana.

Zakaria pelenggene kobilita moluwedoi Temeneno

⁶⁷ Zakaria, do paudoo tamano, Mian Bisa Na Roh kuasaiyomo tobikon yana pelenggene ko Temeneno nateteba. Yana bantile,

⁶⁸ “Maimo nda nggaale ko Temeneno, Mian Bisa doi bangsa Israel! Yana lapamo lubat tulungio kona mian tukon sodiiyomo yanila.

⁶⁹ Yana beena kita pasalamaton mo bukuan, katurunan Daud, naata.

⁷⁰ Doi loolukonoo lolo doi nabi-nabi molinilik, Temeneno lapamo beekene kona perjanjian,

⁷¹ sulano nasalamatene kita doi nda musu tukon doi mian-mian nakuasa mo mosikitene kita.

⁷² Mookitakene kona monondokan konoano doi nda mbumbu, dona perjanjian mo moliyousoo naikon Yana tapaatiyo.

^73-74 Yana batotopi doi Abraham tamanggita, tukon perjanjian sulano nasalamatene kita doi nda musu, sulano kita aki nda matakut moleleaniyo Yana

⁷⁵ sidutu balimang doi Yana tukon sanaanggene konoano posidutukon doi nda tuboan.

⁷⁶ Ikoo, daku pau, naikon mobinantil nabi Mian Bisa Mo Tatandak Tuuno. Ikoo binintokon matailukiyo ko Temeneno sulano nabukayo kololoon tuuk doi Yana,

⁷⁷ sulano napelenggene doi namian baikon yanila naikon sinalamaton, kalu ko Mian Bisa lapamo ompuniyo yanila nalalim-lalim.

⁷⁸ Konda Temeneno monondok konoano koidan mbokila; Yana lubat salamatene kita. Buno oloyo mosumbot doi dodowasoono,

⁷⁹ bunomo lakon Yana mobeekene Kona madialanan doi sasaibino komian mo tubo doi kalipookan lalomo tukon doi matakutan. Yana andane kita doi loloon namonondokan.”

⁸⁰ Zakaria napaudoo tosuungimo kona babasalan tukon tosuungimo kona roh nabukuanan. Yana dungol doi padang lalomo, polong laate kotempono yana naokitakanano kobutongo doi bangsa Israel.