AMOS 1 - KITAB MOLIYOUS BILITA MONONDOK

¹ Amos daanon meeng komian padagai domba luwedoi kota Tekoa. Yana teali nabii doi tempo tano Yehuda pinarentah luwedoi Tomundo Usia, tukon Israel pinarentah luwedoi Tomundo Yerobeam, Yoahas namalane. Lua kotaun akiyon nateali koleali, Mian Bisa okitakenemo doi Amos, kolobo-lobo kaliangano doi Israel.

² Naiyamo Amos nabinantil, “Temeneno ngaaton luwedoi Sion Bunggulo, Koalalo timbuungan luwedoi Yerusalem. Kabulung-bulung doi padang tealimo motuul, bulung doi Karmel Bunggulo motuul tuuno.”

Mian Bisa Naukuman doi negara-negara mopokolani ko Israel Siria

³ Temeneno bantile, “Modungoliyo ko Damsyik badaango lunggon namokubai lalim, tobikon doiya Yaku tantumo naikon moukume yanila. Yanila kubaiyo ko Gileat mianno barani tuuno,

⁴ tobikon doiya yaku naikon kirime koaung doi Tomundo Hazael nakamali, tukon kabus suayo Tomundo Benhadad nabenteng-benteng.

⁵ Damsyik natataapon-tataapon babasal naikon Kumanase, tukon modungoliyo ko Awen Pepelakono naikon kusapuwo biliisi luwedoi yanila natampat dungolan. Mobalakuasa doi Bet-Eden naikon kulebesenggene luwedoi nakursii, tukon inakut doi tano Kir.”

Filistin

⁶ Temeneno bantile, “Modungoliyo ko Gaza badaango luunggon namokubai lalim, tobikon doiya yaku naikon tantumo moukume yanila. Yanila akutemo komeeng kobangsa sasaibino, tukon nabalukene salaku ata doi Edom mianno.

⁷ Tobikon doiya yaku naikon kirime koaung doi beton-beton Gaza, tukon suayo kabus konabenteng-benteng.

⁸ Modungoliyo tukon mobalakuasa doi kota Asdod tukon Askelon naikon kudedenggene. Kota Eklon naikon kuukume, tukon sasaibino ko Filistin mianno labino naikon kulopuwo.”

Tirus

⁹ Temeneno bantile, “Modungoliyo ko Tirus badaango lunggon namokubai lalim, tobikon doiya yaku tantukenemo naikon ukume yanila. Yanila akutemo meeng kobangsa sasaibino doimasakukonan, tukon salakanggene doi Edom; yanila langgaremo koperjanjian posobatan.

¹⁰ Tobikon doiya yaku naikon kirime koaung doi beton-beton Tirus tukon suayo kabus konabenteng-benteng.”

Edom

¹¹ Temeneno bantile, “Modungoliyo ko Edom badaango lunggon namokubai lalim, tobikon doiya yaku tantumo naikon ukume yanila. Akiyo konamaasi, yanila molobosimo ko Israel mianno, yanila otu-utuso. Yanila banggadudul nggimal, tukon tataap abese doi noano.

¹² Tobikon doiya yaku naikon kirime koaung doi kota Teman, tukon suayo kabus kobenteng-benteng doi Bozra.”

Amon

¹³ Temeneno bantile, “Bangsa Amon badaango lunggon namokubai lalim, tobikon doiya yaku tantumo naikon ukume yanila. Salataa polobosi tuuk mokoloase konalipu, yanila batayo koboiboine tiano modaanon motianan doi Gileat.

¹⁴ Tobikon doiya, Yaku naikon kirime koaung doi beton-beton kota Raba, tukon suayo kabus kobenteng-benteng. Doi tempodoo naikon tololongol ko polobosian, tukon polobosian makasango buno sokoi.

¹⁵ Yanila Tomundo tukon sambu-sambu naikon iankut doi masakukonan. Yaku Temeneno, basilingano.”