IBRANI 1 - ALLAH AKOT ATAKAM

IBRANI Owe Asurat

¹ Bonaknak ere, Allah atatkupis atakam aatakam bakoretam owe aokoroma ajiaarir. Era owerawa, era atakam darfaisomar akoroma ajiaaris.

² Waa ere, dare asepnak bare aemapmarom. Erarawa Allah, atakam, Andep akoromen. Me Andep arawa, era atakam dara akoromero. Bonaknak ere, Allaham fiak pak Andep atetamen. Me Andep arawa, pakiin pakiin akenemapomen. Allaham Armat Ipit takes batoomemkorom, emes ataemomen.

³ Me Andep, Allah aakotipitnak pak aporomtamum. Armat Ipitam Allah awarnak. Are atakam fiaknak akorem. Erarawa Are takes aemomem. Anom asamot dosa bimak binip bajanimemtam dambir atemen. Ararawa, Surga oup atemeten. Are fiaknak Allah bo poman andaepakiapen.

Allah Andep juas aptamnak Ipit. Malaikat owe takes juas apok.

⁴ Allah, Andep, juas aptamnak Ipit ataemomen. Emesare, Are malaikat takes, juas apoknak emes ataemomen. Allaham, juas akotnak, Andep aememen. Me, Are bambi juas era malaikat owe takes aememen.

⁵ Allaham, emes atakam, amalaikat owe bakorom apoknak: “Wore deTii. Dere waa Wuritipit aememmin.” Wanam, “Dere Aritipit aememtemin. Anom deTii aememtem.” Emesare, Are emes atakam amalaikat bakorom apoknaken.

⁶ Allah, era biiti jii, ara aemansa tapirmi bataendaem aememe ere, Are atakam akoren: “Allah malaikat owe takes, Armat Ipit basitimtas.” Emes atakam aesimen.

⁷ Allah, emes atakam malaikat takes akoren: “Allah, amalaikat takes, bui tamen ajaoromapoma ajie. Are, abambi karai baetam owe, jisimak jee tamen ajaoromapoma ajie.” Emes atakam aesimen.

⁸ Emesare, Allah Andep emes atakam akoromen: “Allah! wore takes aomepkoromaaremarem. Wore, atakam akot, aomepmarem pak takes asakamtammarem.

⁹ Wore era turu pak, jak aseseromemarem. Wonom era jaos pak bifane afeomemarem. WoAllah emes apore. Erarawa Are Wora ataemomen. Are asan akotnak Wora atetamen. Era pak Wore jak akot baemem are. Emesare, Armat Ipit, emes asan akotnak, wojoo owe batetam apok.” Allah emes atakam aesimen.

¹⁰ Armat Ipitam atakam akoromen: “Tuhan! Bonaknak ere, Wore ara tapirmi akenemtiiem. Wonom wonamo oup pak, ban akenemtopomem.

¹¹ Era pak takes apakapiostemas. Me, Wore jiine aememaaremarem. Era pak takes, tarai pakaian emes tamen aemaptemas.

¹² Wonom era pak, baju tamen ajaokomtaertemarem. Wonom era pak, pakaian tamen asukumtiitemarem, wanam wan pak aojiimomemtemarem. Wore ere, emes ajakajiremaaremarem. Wonom jiine aememaaremarem.” Allah emes atakam aesimen.

¹³ Allaham, emes atakam, amalaikat owe bakorom apok: “Me Debo poman andaepakiapey— Dere wojii owe akumimosomkoromtey bare ajiirea.” Emesare, Are emes atakam amalaikat owe bakorom apoknak.

¹⁴ Me malaikat owe ere, wama oweem? Are Allah bambi karai baetam jip. Armat Ipit, era malaikat owe, asan akot ajoremtas owe baem, ambirimemoma ajaie.