MATIUS 1 - Kitta' Passitallikang Bau KAREBA BAJI'

Dattara puwa-puwana Isa Almase 1:1-17

¹ Iamo inni dattara puwa-puwana Isa Almase, ana'na Daud, ana'na Abraham.

² Abraham laanakangi Ishak; Ishak laanakangi Yakub; Yakub laanakangi Yehuda surang uranna siana',

³ Yehuda laanakangi Peres na Zerah battu ri Tamar; Peres laanakangi Hezron; Hezron laanakangi Ram;

⁴ Ram laanakangi Aminadab; Aminadab laanakangi Nahason; Nahason laanakangi Salmon;

⁵ Salmon laanakangi Boas battu ri Rahab, Boas laanakangi Obed battu ri Rut, Obed laanakangi Isai;

⁶ Isai laanakangi Karaeng Daud. Daud laanakangi Suleman battu rimaeng bahinenna Uria,

⁷ Suleman laanakangi Rehabeam; Rehabeam laanakangi Abia; Abia laanakangi Asa;

⁸ Asa laanakangi Yosafat; Yosafat laanakangi Yoram; Yoram laanakangi Uzia;

⁹ Uzia laanakangi Yotam; Yotam laanakangi Ahas; Ahas laanakangi Hizkia;

¹⁰ Hizkia laanakangi Manasye; Manasye laanakangi Amon; Amon laanakangi Yosia;

¹¹ Yosia laanakangi Yekhonya surang uranna siana' rihattu rieranginna mange ri Babel.

¹² Rihattu mulianginna battu ri Babel, Yekhonya laanakangi Sealtiel; Sealtiel laanakangi Zerubabel;

¹³ Zerubabel laanakangi Abihud; Abihud laanakangi Elyakim; Elyakim laanakangi Azor;

¹⁴ Azor laanakangi Zadok; Zadok laanakangi Akhim; Akhim laanakangi Eliud;

¹⁵ Eliud laanakangi Eleazar; Eleazar laanakangi Matan; Matan laanakangi Yakub;

¹⁶ Yakub laanakangi Yusuf bura'nenna Maria, tulalaherang injo Isa turiare' injo Almase.

¹⁷ Jari, iangase'na rie'i sampulo appa' pinangka' battu ri Abraham sa'genna Daud, sampulo appa' pinangka' battu ri Daud sa'genna rihattu rieranna mange ri Babel, na sampulo appa' pinangka' rihattunna muliangi battu ri Babel sa'genna ri Almase.

Kalaheranna Isa Almase 1:18-25

¹⁸ Kalaheranna Isa Almase iyamo intu assimpole inni: Rihatunna Maria, idonNa, a'bajuang juapa surang Yusuf, ia tianammu battu ri Nyaha Tangkasa, rigelenapa assurangi assimpole se're kalabini.

¹⁹ Saba' Yusuf bura'nenna, se'rei tau baji' nyaha na gele a'ra' lapakadaa areng bahinenna ri a'rakang tau lohe, ia a'ra'i lapela' assa'bu-sa'bu.

²⁰ Mingka rihattunna ia latimbang-timbang pattujunna, malaeka'na Allataala kajanjangang mange ri ia riso'na na appaui, ”Yusuf, ana' Daud, akomo malla' mualle Maria a'jari bahinemmu, saba' ana' nurie' injo lalang ri pomponna injo nubattu ri Nyaha Tangkasa.

²¹ Ia lamana'i ana' bura'ne na kau lamuare'i Ia Isa, saba' Iamo lappakasalama' ri umma'Na battu risikonjo kadorakannai.”

²² Passala injo laa'jari solanna ripa'rupa nulapau injo Karaeng patteteang ri nabbi:

²³ ”Sitoje'na, ana'rara injo latianangi na lamana'i ana' bura'ne, na iyai lalaareki Imanuel.” (Nua'battuang: Allataala minahang ri ditte.)

²⁴ Riambaunnamo battu ritinrona, Yusuf lageokang assimpole nulapassuroang injo malaeka'na Allataala mange ri ia. Ia laalle Maria a'jari bahinenna,

²⁵ mingka gele minang assipatinroang sa'genna larapi' hattunna Maria laanakang ana' bura'nena na Yusuf laarengi Isa.