KOLOSE 1 - Kitta' Passitallikang Bau KAREBA BAJI'

Barasallang 1:1-2

¹ Battu ri Paulus, suro-suro ri Isa Almase, rikanara a'ra'na Allataala, na Timotius urang siana'ta.

² Mange risikonjo urang siana' tangkasa na tutappa' injo lalang ri Almase ri Kolose. Barakka' na dame salehangang battu ri Allataala, Ammanta, minahang ri kau.

Pau sukkuru surang dowaang 1:3-14

³ Kambe tulusu appanai'kang sukkuru mange ri Allataala, Amma, Karaengta Isa Almase, ampa langera dowaangkang tujummu,

⁴ saba' kambe maeng talangngerei katappakammu lalang ri Isa Almase surang passala pangamaseammu mange risikuanna tau tappa',

⁵ rikanara pattajalliang nuripasadiaang injo mange ri kaui ri suruga. Passala pattajalliang injo la'bi riolomo maeng mulangngere lalang pau katojekang, iamo intu Injili,

⁶ nurie' injomo mange ri kaui. Injili injomo a'hassele na lapila'bangi sibatu lino, appakonjo todo'i Injili injo ri kau a'hassele pakaramula rihattu mulangngere'na surang muisse' toje'i barakka' Allataala.

⁷ Iangase'na injo maeng muisse'mu battu ri Epafras, bahaang sipanjampangiang tutakamaseang injo, numange ri kaui pajampangi ri Almase kaminang mallang.

⁸ Ia todo'mo maeng appisa'bi mae ri kambe pangamaseammu lalang ri Nyaha.

⁹ Injomo saba'na, sungka'i talangngere, ripassala'mui gelekang ammari-mari tapangera dowaangiko. Taerai, solanna kau nguppa riiangase'na kasara'dekang surang pappahang langisse' ria'-ra'na Karaeng.

¹⁰ Ri appakonjonamo tallasa'mu siratangi ri a'rakanNa surang baji'i mange ri Ia lalang risikonjo passala, na kau assare hassele lalang risikonjo jama-jamaang baji' surang attimbo lalang ripangisse' passala Allataala.

¹¹ Bisannabali ripakajarrekiko lalang risikonjo katerasang rikahasa kala'biranNa langerang iangase'na lalang rikasannangang na rikasabbarang,

¹² na appanai' sukkuru mange ri Amma lalang rikarannuang, nuappakasiratang injo ri kau languppa dahuang lalang rinumaeng latantuang injo mange risikuanna tau tappa' lalang risinara.

¹³ Ia maeng lalappasangki battu rikahasa kalammang na lapalette'ki antama' ri Pakkaraengang Ana'Na nulakamaseang injo;

¹⁴ battu ri Iamuki ngampunnai pallapasi, iamo intu pangampungang kadorakaang.

Almase kaminang parallu 1:15-23

¹⁵ Almase kajanjangang battu rija'banganna Allataala nugele injo kajanjangang, nulihua, nukaminang parallu battu risikuanna nuripaa'jari,

¹⁶ saba' lalang ri Iamo sikuanna maeng ripaa'jari, nurie' ri suruga surang nurie' ri lino, nukajanjangang surang nugele kajanjangang, baji' injo kadera kakaraengang surang pakkaraenganna, baji' injo pamarenta, iyareka tukahasa injo; sikuanna Ia jua appaa'jari na sikuanna ripaa'jari ritujunNa.

¹⁷ Ia rie'mu rigelenapa rie' sikuanna nuripaa'jari na sikuanna nuripaa'jari asse're ri Ia.

¹⁸ Iamo ulu ri batangkale, iamo intu jamaah. Iamo lihua, kaminang riolo attallasa muliang battu risikuanna tau mate, sa'genna Iamo kaminang parallu lalang risikuanna.

¹⁹ Saba' sikonjo nurie' ri Allataala ammarii lalang ri Ia,

²⁰ na patteteang ri Almasemo Allataala lapa'dameangi sikuanna lalang ri kalenNa, baji' nurie' ri lino, baji' nurie' ri suruga, sungka'na Ia maeng appaa'dame lalang ri rara salli'na Almase.

²¹ Kau riolo tallasa dere todo'ko battu ri Allataala na a'jari balinNa lalang ri ati surang pikkirang assimpole nukajanjangang battu ripanggeokang sipa' daamu,

²² konni-konnina ripaa'dameammu Allataala, lalang ri batangkale kasara'na Almase rikamataenNa, lapaa'jari ngasekiko tangkasa surang tide' sallaanna na tide' nudaa ri a'rakanNa.

²³ Injomo saba'na paralluiko mallang rikatappakang, tulusu jarre' surang gele bata na gele a'ra' a'gessong battu ripattajalliang Injili, numaeng mulangngere injo na numaeng ripala'bang injo risibatu alang rahangang langi', na nakke inni, Paulus, maeng a'jari pajampanginna.

Panjampangi surang kasissaanna Paulus 1:24–2:5

²⁴ Hattu inni nakke a'rannu-rannua ma'nassana nakke akkullea minahang assissara kanara kau, saba' tallasa batangkalengku akkullei anggannaki apa nuparallu injo juapa lakasissai Almase, mange ri batangkalenNa, iamo intu jamaah.

²⁵ Nakke maeng a'jari pajampangi jamaah injo assituru' surangang jama-jamaang nulapassareang injo Allataala mae ri nakke laappabattu pauNa mange ri kaui,

²⁶ iamo intu harasia nutassa'bu injo a'bila'-bilangang taung surang battu rise're bija pamanakang mange ribija pamanakang maraeng, mingka konni-konnina ripappisa'biammu mange risikuanna tau tapppa'Na.

²⁷ Mange ri iyai Allataala a'ra'i lapappiissekang, anteekamua kalumannyanna surang la'biri'na harasia injo ritangnga-tangngana tau maraeng, iamo intu: Almase rie'i ri tangnga-tangngamu, Almase a'jari pattajalliang rikala'birang!

²⁸ Injomo tapala'bang ampa rie' tau tapiu'rangi surang ampa rie' tau taajara lalang risikonjo pangisse', langurang sikuanna tau solanna laa'jari toa pangisse'na lalang ri Almase.

²⁹ Injomo kukaresoi na kupapparri-parriang lalang risikonjo kagassingang assituru' kahasaNa nuanjama injo lalang ri nakke.