Бийлер 1 - Инжил ЛС (2005)

Иуда уруусунун канаандыктар менен согушу

¹ Жашыянын көзү өткөндөн кийин ысрайыл эли Жараткан Эгеден: – Канаандыктар менен согушканы бизден ким жол баштап барат? – деп сурашты.

² Жараткан Эге аларга: – Иуда уруусу баштап барсын, Мен Канаан жерин аларга бердим, – деп жооп берди.

³ Иуда эли болсо бир тууган ысман элине кайрылып: – Жүргүлө, биздин энчибизге тийген жерге чогуу барып, канаандыктар менен согушалы. Кийин силерге тийген жерди басып алууга биз да силер менен чогуу барабыз, – деп айтты. Ошентип, ысман уруусу алар менен бирге жөнөдү.

⁴ Иуда уруусу согушка аттанып жөнөп кетти. Жараткан Эге канаандардыктар менен периздерди алардын колуна салып берип, Безек шаарында иудалар жоонун 10 000 кишисин өлтүрүштү.

⁵ Безекте алар падыша Адони-Безекке бет келишти. Аны менен салгылашып, канаандыктар менен периздерди талкалашты.

⁶ Адони-Безек качып жөнөдү. Бирок иудалар аны кууп жетип, колго түшүрүп, колу-бутунун баш бармактарын чаап салышты.

⁷ Ошондо Адони-Безек: – Колу-бутунун баш бармактарын мен чаап салдырган жетимиш падыша дасторконумдан түшкөн күкүмдөрдү терип жеп күн көрүшчү эле. Ошол падышаларга кылган жамандыгымды Кудай өзүмдүн башыма салды, – деп айтты. Иудалар аны Иерусалимге алып келишти. Ал ошол шаарда каза болду.

⁸ Анан иуда эли Иерусалимге да кол салып, шаарды басып алды. Алар шаардын элин кылыч мизине алып, калаанын өзүн болсо өрттөп жиберишти.

⁹ Андан кийин иудалар тоолуу жерлерде, түштүктөгү төмөнкү Негевде жана батыштагы тоо этектеринде жашаган канаандыктарга кол салуу үчүн жөнөдү.

¹⁰ Анан Хеврон шаарында жашаган канаандыктарга чабуул жасап, шешай, ахиман, талмай уруктарын талкалады. Хеврон шаары ошол убакта Кирият-Арба деп аталчу.

¹¹ Андан ары иудалар ошол убакта Кирият-Сейпер деп аталган Дебир калаасынын элине жортуулга жөнөштү.

Кирият-Сейперди басып алуу

¹² Ошол күндөрү Калеп: – Кирият-Сейперди ким талкалап, басып алса, ага кызым Аксаны күйөөгө берем, – деп айтты.

¹³ Ал шаарды Калептин бир тууганы Кеназдын уулу Отниел басып алды. Калеп ага кызы Аксаны күйөөгө берди.

¹⁴ Кыз төркүнүнө келгенде күйөөсүнөн: – Атамдан жер сурайлычы, – деп суранды. Калеп эшектен түшүп жаткан кызынан: – И кызым, бир нерсе сурайын деп жатасыңбы? – деп сурады.

¹⁵ Кызы атасына: – Мага батаңызды берсеңиз экен, – деди. – Сиз мага Негевден жер берген элеңиз. Эми ага булактарды да кошуп бериңизчи, – деди. Ошондо Калеп кызына жогорку булактарды да, төмөнкү булактарды да берди.

Иуда уруусунун канаандыктар менен согушу (уландысы)

¹⁶ Мусанын кайнатасынын урпактары болгон кейнилер иудалар менен чогуу Курма шаарынан жер которуп, Арат шаарынын түштүгүндөгү Иуда чөлүнө барып, ошол жердеги жергиликтүү элге кошуна болуп, отурукташып калды.

¹⁷ Иуда эли боордош ысман эли менен чогуу жортуулга чыгып, Сепатта жашаган канаандыктарды талкалап, садага чаап салды. Ошондон улам бул шаарды эл Хорма деп атап калган.

¹⁸ Иудалар Газа, Ашкелон, Экрон шаарларын да тегерек-четиндеги жерлери менен кошо басып алды.

¹⁹ Жараткан Эге иуда элин колдоп, алар тоолуу жерлерди ээлеп алышты. Бирок өрөөндө жашаган элдерди басып ала алган жок, анткени алардын темир майдан арабалары бар эле.

²⁰ Калепке болсо, Муса дайындап айтып кеткендей, Хеврон шаары берилди. Калеп ал калаадан Анактын үч уулунан тараган элди кубалап чыгарды.

Энчисине толук ээ боло албаган уруулар

²¹ Бирок бенжамин уруусу Иерусалимде жашаган жебустарды кубалап чыгара алган жок. Жебустар Иерусалимде ушул күнгө чейин бенжамин элине кошуна жашайт.

²² Жусуптун урпактары да Бейтел шаарына жортуулга жөнөштү. Жараткан Эге аларды колдоду.

²³ Алар оболу Бейтелди жакшылап изилдешти. Ал шаар мурда Луз деп аталчу.

²⁴ Сакчылар шаардан чыгып келе жаткан бир кишини көрүп калышып, ага: – Шаарга кирчү жашыруун жолду бизге көрсөтүп берсең, сага ырайым кылабыз, – деп айтышты.

²⁵ Ал киши шаарга кире турган жолду көрсөтүп берди. Жусуптун урпактары шаар элин кылыч мизине алып кырып салды. Тиги кишини болсо бүт тууган-уруктары менен коё беришти.

²⁶ Ал киши хеттердин жерине көчүп барып, шаар куруп, аны Луз деп атады. Ал шаар ушул күнгө чейин ошондой аталат.

²⁷ Бирок менаше уруусу Бейт-Шаан, Таанах, Дор, Иблейем, Мегиддо шаарларында жана алардын карамагындагы айыл-кыштактарда жашаган элдердин жерлерин тартып алган жок. Канаандыктар ошол жерлерде жашап кала беребиз деп, бел байлашты.

²⁸ Ысрайылдар күч алган убактарда канаандыктарды өзүнө букара кылып коюшту, бирок аларды кубалап чыга алышкан жок.

²⁹ Эпрайым эли да Гезер калаасында жашаган канаандыктарды кубалап чыга алган жок. Канаандыктар Гезерде алардын жанында жашап кала беришти.

³⁰ Ошол сыяктуу забулун уруусу да Китрон менен Налол шаарларында жашаган канаан элин сүрүп чыгара алган жок. Ошондуктан алар забулун элине жанаша жашап, забулундарга букара болуп калышты.

³¹ Ашыр уруусу да Ако, Сидон, Аклап, Акзип, Хелба, Апик, Рехоп шаарларынын тургундарын жеринен сүрүп чыгара алган жок.

³² Ошондуктан ашыр уруусу ушул жерлерде жашаган канаандыктарга кошуна жашап калды.

³³ Напталы уруусу да Бейт-Шемеш, Бейт-Анат калааларынын элдерин кубалап чыга албай, өзү ушул жерде жашаган канаандыктарга жанаша жашап калды. Бирок Бейт-Шемеш менен Бейт-Анаттын тургундарын өзүнө букара кылып алды.

³⁴ Амор эли болсо дан уруусун тоого сүрүп салып, өрөөнгө түшүрбөй койду.

³⁵ Аморлор Херес тоосунда, Аялон, Шаалбим шаарларында жашап кала беришти, бирок Жусуптун урпактары күч алган убактарда аларды багынтып, өздөрүнө букара кылып коюшту.

³⁶ Амор элинин чек арасы Акрабимден башталып, Села шаарына чейин жетип, андан ары жогорулап кетет.