Mareko 1 - Iesu Keriso imo pai-dubi naiba kitouti dubu nou pai mea 1941

¹ Iesu Keriso, Iehova Mere nou himia pai‐mea airowahorodai.

² Naiba nou titi tau iati, Isaia peroveta dubu nou himia bukawa. Taauri mo himia hiwaa mere ro hohowa mainotiodoi. Nouro ro nave meaha aiwamododiai.

³ Na’u dubu viro burubatiwa iauwoidio, Pai‐dubu nave meaha tamododiaimo. Nou himia nave gamooiha taidodiaumo.

⁴ Ioane naibaha o’u oboito burubatiwa nouro babatiso niabaha iwaituti. Nouro babatiso kidia naibaha itomututi; nouri ubauba kidia kiipiti modobori, oubio imini neido naibaha imowaiumo.

⁵ Iudea oubi auwoha, naiba Ierusalema oubi auwoha, nouido naibaha o’umo; wia nei auwoha noudo babatiso naibaha oitiumo, nei himia ubauba kidia naibaha obodutiumo.

⁶ Ioane kamela muho hipura amiteai wia bae koko tamari nou gohowa naibaha orooi. Nou kihona gaii wia morobo.

⁷ Nou totomu naiba iaowa: Dubu ata mo dooudo aiwauro’ui, mo mea biahai nou himia douboi kono ivi omopiwoi.

⁸ Moro rioido oboito babatiso tau niwai, nouro rioido Tana urioito babatiso aiwaimowaidioi.

⁹ Wia hiwio’i nouowa Iesu Nasaretaudo, Galilaia mabudo, naibaha o’uro wia nou babatiso naibaha oiti Ioane aueudo, Ioridanawa.

¹⁰ Ina nou ta’uwa nou oboudo daidiai nouro toboro kara’eraiwa naibaha eauri, wia Tana‐urio, badu aibo, nou ohudo oruowaro.

¹¹ Wia na’u wade toboroudo naibaha aroro: Rovia mo auwo niro Mereri. Mo roido auwo geii nimahebidio.

¹² Ina nou ta’uwa Tana‐urioro nou burubatito naibaha emaduduomai.

¹³ Wia nou burubatiwa naibaha emidiotuti hiwio 40 wia Satanaro nou naibaha ematuhutituti, wia nou heauwo kaukau turi gorowa emidiotuti; wia gururu oubio nou meaha eauritutimo.

¹⁴ Ina Ioane durii daimowa naibaha ibiaumo, dooudo Iesu Galilaito naibaha o’u Iehova pai‐mea oubido itomututi.

¹⁵ Nou naiba iaotuti. Hiwio’i tau ro’u ina Iehova bububati nou tariwai. Rio imini ubauba nanaudo taimowaimo wia pai‐mea tairaromomo.

¹⁶ Ina nou auwo‐turi barawa naibaha o’uwaro, Simonara niamara Anederea, neiti nouro iaurimama. Neiti auwo‐turiwa kamahu eheeudo, nouri neiti na kirobo oubiri.

¹⁷ Wia Iesu neitido naiba aro: Mo dooudo ta’udo wia oubi kiroboido moro rieiti ainiatidiaidaimama.

¹⁸ Ina nou ta’uwa neiti kamahu naibaha ebeedeudo wia nou dooudo neiti naibaha orobodoudo.

¹⁹ Ina nou kekebuo daiariiai, Iakobo, Sebedaia mere, wia Ioane nou niamari, nouro iaurimama neiti himia pewa iroiidiomama, neiti kamahu emaoutiudo.

²⁰ Ina nou ta’uwa nouro neiti niabaha ituamama; ina neiti himia abea Sebedaio, nou himia kowaati oubimu, neitio naibaha emeheaudo wia nou dooudo naibaha o’udo.

²¹ Wia Kapenaumaito nei naibaha o’umo wia Sabati hiwiowa sunagoito nou naibaha odoro naibaha itomuwa.

²² Wia nou himia kitomudio wadewa neiio auwo niimo emaeawaumo, nouri nouro neido wade umo‐dubu aibo iatomuaiwa, titi kiati oubi aibo biahai.

²³ Wia dubu na’u uba urio ramu nei sunagowa naibaha emidio wia nou naibaha imakakaiwadiowa: Roro imo tanibeedei. Touna niaidaidumo imo roido, Iesu?

²⁴ Rovia Nasareta duburi. Ro imo iwotoi aro’uro? Mo umori ro boti; rovia Iehova tana‐duburi.

²⁵ Wia Iesuro nou naibaha emadohiomai, naiba iaowa: Mubaha taiti: tahuodidio nou au’eudo.

²⁶ Ina nou ta’uwa uba‐urioro nou naibaha eedioutiwa, nou eamo gema naibaha imotua wia nou nou aueudo naibaha ohuodidio.

²⁷ Wia nei auwoha aiemaeawaumo wia nei himia himia naibaha aratorowaumo: Tounai nouri? Orio kitomudio wadera? Uba urioido nou wade modoboito riao umo‐dubu aibori, wia neiio nou aiorovidiowaumo.

²⁸ Ina nou ta’uwa nou paina naibaha oboowa oopo oopo modobo Galilaia kaee.

²⁹ Ina nei sunagoudo naibaha ihuomo, Simonara Anedereara motoito nei naibaha idoumo Ioanera Iakoboramu.

³⁰ Wia Simona o’bo mamu kaupi orouwa ina neiio nouido naibaha orowaduoumo.

³¹ Wia nou o’uwa wia tuudo naibaha ohiai naiba ouviai ina nou ta’uwa kaupiro nou naibaha emeheai wia neido nou naibaha imiowa.

³² Dohodohowa, hiwio kahoiiawa, uba kirouti oubi wia uba urio ramu oubi, neiio nouido naibaha iworohowaumo.

³³ Wia oopo oubi auwoha biri mabuwa naibaha idabuaiwaumo.

³⁴ Godogodo oubi uba kirouti, tiatiaha temeteme ramu, nouro meaha iwaiwa wia uba urio godogodo nouro naiba iahiitiwa. Uba urio nouro naibaha imadohiomatutiwa, wade iaomo tore, nouri nei nou umoitiumo.

³⁵ Duoduowa keke, hiwio meamea iheheai biahai, nou naibaha o’ibua, burubatito naibaha o’u, wia nouowa kirodumeaito wade naibaha arowa.

³⁶ Simona wia noumu kemidio oubii nei nou dooudo orobodowaumo.

³⁷ Ina neiio nou naibaha oweaumo nei naibaha iaowaumo: Oubi auwoha nei ro romohodumo.

³⁸ Nou neido naiba aro: Imo ta’imo tariwa oopo amidanu noito, nouri mo totomu nouowa narodai, mabu nouri mo nou gabo no’uro.

³⁹ Wia nou totomu naiba iaowa nei sunagoi nouowa, Galilaia oopo gemawa wia uba urio nouro naibaha iaho’iutiwa.

⁴⁰ Wia na’u lepera ramu dubu nouido o’uro naiba hobo atoro wia nouido popoito naibaha imohorai, nouido naiba atodoiwa: Ina ro nirowa, ro umori mo sovio anowaidai.

⁴¹ Wia Iesu nouido niainiai emahebidiowa wia nou tu naibaha otuturo naiba atibodoi wia nouido naiba iaowa: Mo niro. Ro sovio taiti.

⁴² Nou ta’uwa hagohagoha lepera temeteme noudo naibaha emeheai wia nou sovio naibaha oiti.

⁴³ Wia nou nouido wade pupuoito iaowa wia nou mabudo nou naibaha otiodoi.

⁴⁴ Nou nouido naiba iaowa: Taauri ro wade oubi amidaido iao aue. Ta’uo ro himia ko’u naveito, kohena‐dubuido ro hoho tawaevia. Tamaai niainiai nana, irio katoai wiha, naiba Mose wade modoboito nou iao, oubido modobo iwaeviai.

⁴⁵ Wia nou naibaha ohuo wia nouri nana nouro iwaduuti naibaha iai, oroa nouri, oopo gemawa, nou naibaha oboowa. Mabu nouri Iesuro oopo ata paeaha odoro raihe. Nou kahitowa naibaha emidiowa buru batiwa; oubio batibati auudo nouido naibaha orohotutiumo.