Lukas 1 - Etestemente Epe ✠ 1951

ONTOPORUA 1. Ehipopiro rja Lukas ketameko.

¹ Oshoka ojendji oja tameke okutshanga ehepururo rjiinima, mbi ja ningua mokati ketu,

² Ngashi je tu epururirua ku mbeja, mba ja ri eentari, jo aarongi johapu okuza ketameko,

³ Otsho nduno na ngashi ja randuracana, ngaje sho nda kongo omurombo guotshiri mu ajishe mbi okuza ketameko, Theofilus omuorike,

⁴ Opo u mone otshiri tsheehapu, mu di ua rongua.

Okuvarua kua Johannes taku uvicua.

⁵ Muujuni ua Herodes, omukuaniirua gua Judea, omua ri mu nomupristeri, edina rje Zakarias, momutete guaapristeri, gua Abias. Omukiintu gue okua zi kaana ja Aaron, edina rje Elisabeta.

⁶ Ajeshe jaari oja ri ju uka momesho ga Karunga, jo je ende miipango ajishe no meemukaro da Muene nediginino.

⁷ Oja ri kaa naanona, oshoka Elisabeta okua ri ontimbe, jo ajeshe jaari ri ja koka, jo ja ninga esiku.

⁸ Tsha ningua nduno, sho ta rongo iironga je juupristeri momesho ga Karunga morufo ruomutete gue.

⁹ He to ogororua komukaro guaapristeri okuha montempeli ha Muene, a ninge egano rjotshitsinino.

¹⁰ Ongundu onene haantu hi ri ruopondje, tahi garikana petango rjotshitsinino.

¹¹ Oko hoka omujengeli gua Muene e mu orokera, ta cikama korurjo ruohaltari hotshitsinino.

¹² Nde Zakarias a tira, sho e mu mono, he ta kekama.

¹³ Nd’omujengeli ta ti ku he: Ino tira, Zakarias, oshoka egarikana rjohe orji iteerua, omukiintu guohe Elisabeta ote ke ku varera ko omumati, nguee to mu ruku Johannes.

¹⁴ He one ku etere enjanju nerago, jo ojendji onaa njanjukirua okuvarua kue;

¹⁵ Oshoka ona ningi omunene motshipara tsha Muene. Omavinju niikunua iidigu ite ke ji nua. Onu udua Ombepo Ondjapuki, manka e ri mera rja hina.

¹⁶ Ojendji maana ja Israel one ja garurire ku Muene, Karunga kauo.

¹⁷ One mu tetekerere mombepo no meenkondo da Elias, opo a ronge ojana omadiradiro gooshe, na mb’inaji iteera, te ja rongo uunongo nehuko, nde ta rongikidire Muene orudi orujapuki.

¹⁸ Nde Zakarias ta rombuere omujengeli: Shino otii tshi tshiua ngiini, oshoka onda kurupa, nomukiintu guandje uo a ninga esiku.

¹⁹ Omujengeli h’ota jamukura, ta ti ku he: Ongaje Gabriel, ohandi cikama kotshipara tsha Karunga, nda tumua, ndi ku rombuere, ngaje ndi ku etere omurombo ngu guenjenjanju.

²⁰ Nde tara, oto kara ua sit’eui, ngueje ito popi ue sigo okesiku tuu ndika, iinima mbi naji ningua, oshoka ino iteera eehapu dandje, di tadi ka guanicua pecimbo rjado.

²¹ Aantu oja tegerere Zakarias, jo ja kumua ko, sho a kara orure montempeli.

²² Sho a zi mo nduno, ina tshiua okupopja na jo. Naangashiingika oja dimburura, nokutja okua mono mo ehororo montempeli. Te ja kundu nomake, ndere a kara a muena.

²³ Omasiku giironga je sho ga pu ko, okua tshuna kaandje.

²⁴ Konima homasiku ngano Elisabeta, omukiintu gue, okua tuumba, he to orama eemuedi ntano, nde ta ti:

²⁵ Muene otsho a ningira ndje ngii pomasiku ngano, sho a tara ndje mondjeerera, a kuca ndje egugue maantu.

Omujengeli Gabriel pu Maria.

²⁶ Momuedi omutikanekamue nduno omujengeli Gabriel okua tuminua ku Karunga e je momukunda mu Galilea,

²⁷ E ja komukadona, h’a ri a jarua komurumentu, edina rje Josef, a zire mezimo rja David; edina rjomukadona Maria.

²⁸ Omujengeli h’okue ja mo, nde ta ti ku he: U kundue ngueje, u uda oshenda. Muene ohe e ku na. Ongueje ua simanekua mokati kaakiintu.

²⁹ Hera e tshu uvu, okua aruka komurombo gue, he ti ipura, nokutja ekundo ndika orja tshike.

³⁰ Nd’omujengeli te mu rombuere: Ino tira, Maria, oshoka oua mona oshenda ku Karunga.

³¹ Tara, ono ningi omusimba, nde to ka vara okamati, to ka ruku edina rjako Jesus.

³² Ohe ta ka ninga omunene, he ti icanua Omumua gomombandambanda, Muene Karunga one mu pe otshipundi tsha she David. He ona pangere egumbo rja Jakob sigoosigo.

³³ Uukuaniirua ue kau na mpa nau shuru po.

³⁴ Maria ta pura omujengeli: Shino otatshi ka ningua ngiini, ngaje kandi tshi omurumentu.

³⁵ Nd’omujengeli ta jamukura, ta ti ku he: Ombepo Ondjapuki otahi ja hi ku nambere, neenkondo da ngo mombandambanda otahi ku siikire ng’omuzire. Ano otshijapuki, shi tatshi ka varua ku nguee, natshi tiue Omumua Karunga.

³⁶ Tara, itshee omukueni Elisabeta, na he uo okua mona okamati muukuruntu ue, oku ri momuedi omutikanekamue, ngu a ri a tiua ka vara.

³⁷ Oshoka kapena shi tatshi njenge Karunga.

³⁸ Maria he ta ti nokuri: Tara, ngaje omupija gua Muene, nandi ningue ngashi ua ti. Nd’omujengeli ta zi po pu he.

Maria ta hi ku Elisabeta.

³⁹ Inapu piti omasiku ogendji, Maria tahi nzija mondundu komukunda guotshirongo Juda.

⁴⁰ Nde te ja megumbo rja Zakarias. He ta kundu Elisabeta.

⁴¹ Tsha ningi, Elisabeta sho a huvu ekundo rja Maria, okanona oka nuka kenjanju mera rje, nde Elisabeta tu udua Ombepo Ondjapuki.

⁴² He ti igida neui enene, ta ti: Ngueje ua simanekua mokati kaakiintu, nomuvarua guomera rjohe okua simanekua uo.

⁴³ Shino otsha zire ndje peni, hina ha Muene sho e ja ku ngaje?

⁴⁴ Oshoka, tara, eui rjekundo rjohe sho rje ja kokutsi kuandje, okanona oka nuka kenjanju mera rjandje.

⁴⁵ Ngueje omunerago, oshoka oui iteera, kutja otatshi ka guanicua, shi tsha popiua ku Muene.

⁴⁶ Nde Maria ta ti: Omuenjo guandje otagu amberere Muene pombanda.

⁴⁷ N’ombepo handje otahi rigorere Karunga, omukuriri guadje.

⁴⁸ Oshoka okua tara uushupi uomupija gue. Tara, kongashiingika omarudi ageshe otaga simaneke ndje omunerago.

⁴⁹ Oshoka iinima iinene okue ji ningira ndje, h’Omunankondo, nedina rje ejapuki.

⁵⁰ Esiroshenda rje rjo otari ka cika komazimo nomazimo ku mba haa mu tira.

⁵¹ He okua ronga iirongankondo nokooko kue, h’ota sharakanica mba haji inenepeke nokuinoma ko meemuenjo dauo.

⁵² Oku undura ko kiipundi aanankondo, nd’okua renga aashupi.

⁵³ Okua kutica aakuandjara niinima iiuanaua, nd’okua rareka aajamba ja he ouara.

⁵⁴ Okuo ogorora Israel, omupija gue nokumudimburukua mesiroshenda rje.

⁵⁵ Ngashi a tire kootate, ku Abraham no koruvaro rue sigoosigo.

⁵⁶ Nde Maria okua menekere po ngaa pu Elisabeta eemuedi da ada ku ndatu, h’ota tshuna kegumbo ku Nazaret.

Okuvarua kua Johannes.

⁵⁷ Ecimbo sho rja ciki, Elisabeta a vare, okue eta ko okamati.

⁵⁸ Aatshiinda naakuauo sho je tshu uvu, kutja Karunga okue mu ningira esiroshenda enene, oja njanjukua puamue na he.

⁵⁹ Tsh’otsha ningi ano, omasiku uunutatu sho ga piti po, jo je ja, ja fukareke okamati. Taa ka ruku edina rja she Zakarias.

⁶⁰ Nde hina ta ti ku jo: Aaue, naka rukue Johannes.

⁶¹ Jo taa mu jamukura, taa ti: Maakueni kamu na ngu a rukua edina ndi.

⁶² Nde taa rapa she, je mu pure, nokutja ote mu rukica ngiini.

⁶³ H’oti indire okatshangico, nde ta tshanga eehapu: Edina rje Johannes. Ajeshe oja ri ja kumua ko.

⁶⁴ No pokarara oko hoka eui rje orja cituruka, tsh’otsho eraka rje rja manguruka, he ta amberere Karunga, ta tshiua okupopja.

⁶⁵ Ajeshe jo muutshiinda jo ja kuatua kembandaro, nd’omurombo guiinima mbi ajishe gu uvikirua apeshe mpo meendundu da Judea.

⁶⁶ Ajeshejeshe mba je tshu uvu, jo oje tshi ipura uo meemuenjo dauo, taa ti: Omunona ona ningi omukuatshike, oshoka eke rja Muene orja ri ngaa pu he?

⁶⁷ Nde Zakarias oku uda Ombepo Ondjapuki, he ta shunganeke, ta ti:

⁶⁸ Na simanekue Muene, Karunga ka Israel, oshoka okua tarera po aantu je, he e ja rongera ekuriro.

⁶⁹ Oruinga ruehupico okue ru tu tungire megumbo rja David, h’omupija gue.

⁷⁰ Ngashi a shunganekere mokana kuaaprofeti je aajapuki jonare.

⁷¹ E tu upice kaaniita na sse no miikasha jajeshe, mba je tu tonde.

⁷² He a monica esiroshenda ootate, a dimburukua eguaneno rie ejapuki.

⁷³ Negano, ndi a ganenene tate Abraham, nokutja ote tu kuaca.

⁷⁴ Tu upicue miikasha jaatondi jetu, sse tu mu rongere, katu nuumbanda.

⁷⁵ Nuujapuki nehuko miipaci je omasiku getu ageshe.

⁷⁶ Nde nguee, kamati, oto ka rukua omuprofeti gua guOmombandambanda, oshoka oto tetekere kotshipara tsha Muene, u mu parere ondjira he.

⁷⁷ Ngueje u fare aantu je kokutshiua ehupico, ndi ri ri mediminopo rjeendjo dauo.

⁷⁸ Moru esiroshenda, ndi rja za muii momuenjo gua Karunga ketu, mu mue tu zira eruua rjomombanda.

⁷⁹ Opo ri tu etere uujerere atushe, mba tua kaatumba meemurema no meemuzire dokusa, rjo ri ture eempadi detu mondjira hombiri.

⁸⁰ Nd’omumati a koko, he ta koro mombepo, h’okua kara mombuga sigo okesiku ndija ti ihororere aahisrael.