Kaaefesi 1 - Etestemente Epe ✠ 1951

ONTOPORUA 1. Ehiteero rjetu orjo egano enene

¹ Paulus, keharo rja Karunga omuapostoli gua Jesus Kristus, — kaajapuki ajeshe mba je ri ku Efesus, jo aahiteeri mu Kristus Jesus.

² Oshenda nombiri ha Karunga Tate hetu, ho ha Muene guetu Jesus Kristus nahi kare puamue na ne.

³ Karunga, She ha Muene guetu Jesus Kristus na ambererue. He e tu jambeke mu Kristus nejambeko arishe rjokomuenjo nomagano gokeguru.

⁴ Manka uujuni inau tshitua, he e tu ogorora morue, tu kare po motshipara tshe mohore, muujapuki, katu nuurunde.

⁵ Otsh’oparera eharo rje oku tu uca nare tu ninge aana je mu Jesus Kristus.

⁶ Opo tu amberere ehadimo rjoshenda he, ndji e tu pa m’Omona gue omuhorike.

⁷ Mu he sse tu na ekuriro moru’ombinzi he, nedimepo rjeendjo moru’uujamba uoshenda he.

⁸ Ndji tua peua ohindjihindji nuunongo neendunge adishe.

⁹ Okue tu ororera otshoorekua tsheharo rje, ngashi tshe mu oparera. Keharo ndika okua ninga ompangere,

¹⁰ okucikica etsakaneno rjecimbo, jo ajishe jomeguru no jopevi ji ninge iipe mu Kristus.

¹¹ Omu he nasse tu’icanua kecigururo, sse nga mboka j’ucua nare keharo rja ngoka ha rongo atshishe kehuco rjeharo rje.

¹² Otsho sse mba tua dika nare etegerero rjetu mu Kristus, tu amberere ehadimo rje.

¹³ Mu he na ne uo omua peua edidiriko rj’Ombepo Ondjapuki, ndji ha shunganekua, sho kua mua uva ohapu hotshiri, okutja ekundano ehanaua rjehupico rjeni, ne mua tuumba ehiteero.

¹⁴ Ndji ahi tu koreke metegerero rjokumona uuciga uetu, rjokuirikorera shoka tshetu, sse tu amberere otshingi ehadimo rje.

¹⁵ Hera tuu nda kundana ehiteero rjeni mu Muene Jesu, nohore heni hokuora aajapuki,

¹⁶ itandi zimbuka okupandura morueni noku mu dimburukua momagarikano gandje.

¹⁷ Karunga ka Muene guetu Jesus Kristus She huujerere e mu pe ombepo huunkurungu ho hehororo oku mu tshiua.

¹⁸ He a minikire omesho gomuenjo gueni, ne mu dimburure naua etegerero ndi mu’icanenua, nuujamba nehadimo rjuuciga uaajapuki,

¹⁹ nuunene ueenkondo di a horora musse maahiteeri je. Odo eenkondo di eeneenene,

²⁰ di a rongica mu Kristus, sho e mu jumuda kuusi, e mu kaatumbika korurjo rue meguru,

²¹ kombanda hepangero arisherishe, heenkondo, herero, huukuaniirua, hesimano, kombanda hatshishe shi atshi vuru okutumburua muujuni mbuka no muujuni a nofu.

²² Atshishe okue tshi tura koshi heempadi de, a ninga omutse gueklesia arishe.

²³ Rjo orutu rue, ru ’uda ku ngu t’uda atshishe mu atshishe.