Kɔlɔnikɔ Veerɛi 16 - Bible

Mɛni kpɔ̂lu è pà Eezuɛ

¹ Asa kɛ́ɛ gâloŋ-laai su ŋɔkóraŋ buu saaƃa káo lɔ́ɔlu mɛi dai su, Eezuɛ kaloŋ nyíi da kâa dòli a Baasai è pà é kɔ́ pɛ́lɛ Zuda lɔii ma. È pà é pɛ́lɛ Lama maa kôlii a gɛ́ɛ núu da fé kùla naa kpaa máŋ é pá Zuda lɔii kpiniŋ su.

² Nya ƃe Asa è gôo da káne kùla Yâwɛɛ ŋɔpɛ́rɛ kɛ́tɛi ŋɔsɛŋ-káo lâai kɛ́ kwaai ma da gbɔ́ɔi goo da káne é dɛɛ Bɛŋ Eeda nyíi kɛ̀ a Siria kaloŋ pɔ́-naa nyíi Zeɣɛɛ è kɛ̀ Dɛmɛikai.

³ È mò ma ǹyɛɛi, “Tɔɔ laoi-laa é kɛ́ kúloai kwa yá yɛ̂ɛ berei laoi-laa è wɔ́lɔ kɛ̀ la ǹâŋ da ínâŋ díloai. Mɛni ma, ŋa gôoi ŋí da gánei ŋí tɛɛ̂i ípɔ a gɛ́ɛ ǹaoi-laai gáa ka Eezuɛ kaloŋ Baasa káloai í dée a gɛ́ɛ é ŋɔkɔ-kuluƃa-ŋai kúla ŋalɔii su.”

⁴ Bɛŋ-Eeda ǹyaŋ è fàa mɛnii ma Gâloŋ Asa è mò mai. Nya ƃe è ŋɔkɔ-kuluƃa da dímɛi-ƃela tɛ̀ɛ dí kɔ́ pɛ́lɛ Eezuɛ taa-ŋai dîa. Daa-ŋai díkɔ pɛ̀lɛ dîai dia ƃé kɛ̀ a: Izɔŋ, Daŋ, Eebɛ-Maiŋ da zãâ-laai kɛ́ taa-lêe-ŋai kɛ̀ Nɛfɛtɛli kpiniŋ sui.

⁵ Tãi Baasa è gɔ́i duŋ mɛni lai, è nâa kpèra ziɣãŋ tínanîi Lama ma.

⁶ Gɛ́ɛ tí, Gâloŋ Asa è nâa pà a Zuda sinaai dí gɔni-ƃela-ŋai da ŋ̀uru-ƃela-ŋai Baasa è kɛ̀ dii kɛ̂i lai kélee kúla Lama dí lí la a gɛ́ɛ dí Giƃa da Mizipa tɔɔ la.

Ɣâla ŋɔlóno kɛ́-nuui Anani ŋɔɣâla-wooi

⁷ Nyíŋi pôlu ma, Ɣâla ŋɔlóno kɛ́-nuui Anani è pà Zuda kaloŋ Asa pɔ́-naa ǹyɛɛ mai, “Kpɛ́ni fêi í íkili tɔɔ Siria kaloŋ mâ ítee Yâwɛɛ íɣâlai mai, gɛ̀ ní Siria kaloŋ ŋɔkɔ-kuluƃa-ŋai da nâa kula íyêei.

⁸ Itiopia-ŋai da Lebia-ŋai díkɔ-kuluƃa-ŋai dífe kɛ́-ni a díwala-walaa díkpulu kɛ́tɛɛ, kɔ́ kɔ́-keleŋ-ŋa da soo kɔkɔ-ƃela támaa dífe kɔ́ pɛlɛ ní yâ tãi í íkili tɔɔ la Yâwɛɛ mai é íŋuŋ ma ƃó, é íkula díyêei?

⁹ Diai kélee da díkili tɔ̀ɔ Yâwɛɛ mai, a ŋɛ́i sìa kpɔ́ ǹɔii gwaa kélee ma gɛ́ dí mɛi kâa gɛ́ dítɔɔ̂i kpanaŋ. Í tùa a ƃoo-pere, mɛni ma kɔ́ fé pâi kpɛɛ̂i ípôlu.”

¹⁰ Asa kɛ́ɛ a mɛnii ŋí mɛ́nii, è ǹíi ŋwàna kpɔ́ Ɣâla ŋɔlóno kɛ́-nuui ma a ŋánaa é bili kpini-pɛrɛ mu. Maa tãi tɔnɔi tí yée mu, Asa è wana-lɔɔ tua kɛ̀ a ǹûai dámaa.

Asa ŋɔkâloŋ-laai gbɛɛ-ŋai

¹¹ Mɛni-ŋai kélee Asa è wɔ́lɔ gɛ̀ ŋɔkâloŋ-laai su é síɣe gɔ́ɔ pîlanii é seri gbɛɛ-ŋai mai, bɔ̃yɛ̂ɛi Zuda da Eezuɛ kaloŋ-ŋai dímɛni pɔ̂lɔi su.

¹² Asa kɛ́ɛ gâloŋ-laai su ŋɔkóraŋ buu saaƃa káo lɔ́ɔlu mɛi naaŋ su, kɔ́ɔ kɔlɔ-fela è pɛ̀lɛ ma. Kɛ́lɛ berei máŋ gɔlɔ-felai è kpala la ǹái, vé gíli tɔɔ-ni Yâwɛɛ ma a gɛ́ɛ é kpɔŋ maa tɛɛ bɔ. È wɔ́lɔ gíli kélee tɔ̀ɔ nɔ́ sále tii kɛ́-ƃela dîa.

¹³ Asa kɛ́ɛ a gɛ́ gâloŋ-laai su a kóraŋ buu-naaŋ káo tɔnɔi, è nâa lì ŋɔnûa pɔlɔ-ŋai pɔnaa pere.

¹⁴ Nya ƃe dínòo molôŋ su nyíi ǹyaa kpîŋ è wɔ́lɔ dèe Deeƃé ŋɔtaa-lêei sui. Dí nàa zaa-laa sɛŋ ma dí wulɔ kúŋ-nɛ̃ɛ da wúru-ya kúŋ-nɛ̃ɛ pú boma ma. Nya ƃe dí ŋɔ̂ŋ kɛ́tɛ tòo dízaa mãa-seê kɛ́ naa.