Kɔlɔnikɔ Veerɛi 14 - Bible

Asa è Itiopia-ŋai yée mɛi ɣâle

¹ Gâloŋ Aƃiza è sàa dí noo ǹâŋ-ni kɔlɛ Deeƃé ŋɔtaa-lêei su. Gɛ́ɛ tí, ǹóŋ Asa è lɛ̀ɛ bɔ́ɔ-ŋa a kâloŋ. Asa kɛ́ɛ a kâloŋ, ǹɔii è kɛ̀ lii-see su a kóraŋ puu.

² Asa tûa-pere è kɛ̀ a ǹɛ́lɛɛ Ŋɔɣâlai Yâwɛɛ ŋɛi.

³ È ŋ̀âla-teƃele da kpɛ́ni-ŋai kélee wòlo é díkula ǹɔii su. È ŋ̀âla-pɔkɔɔŋ-ŋai da gɔni maa-waa-ŋai wolo. É ŋ̀úrui pɔ̂ŋ nyíi da kâa Asitora fɛli mui.

⁴ È mò Zuda-ƃelai dîa a gɛ́ɛ dí dínâŋ-ni Díɣâlai Yâwɛɛ fɛli dí ŋɔtɔ̂ŋ-ŋai mɛi kaa.

⁵ Tãi è ŋ̀âla da kpɛ́ni-ŋai kùla la ǹɔii su é pɛ́lɛ díkuŋ-sãai kéreŋ ɣala teƃele-ŋai dîai, daa-ŋai kɛ̀ Zudai da gâloŋ-laai díkɛ̀ lii-see su ŋɔkâloŋ-laai yée mu.

⁶ È siɣãŋ tìnaŋ Zuda taa-lêe-ŋai dîa, kpɛ́ni, ǹɔii líi è kɛ̀ a zeɛɛ. Núu da fé kɔ́ pɛ̀lɛní ma. Kpɛ́ni fêi Yâwɛɛ è fii-tɔɔ tɛ̀ɛ bɔ́ góraŋ-ŋai tí yée mu.

⁷ Nya ƃe è mò Zuda-ƃelai dîa ǹyɛɛ, “Kwaa daa-ŋai ŋí tɔ́ɔ kúsiɣãŋ tínaŋ dîa. Kú yeŋkêŋ-ŋa tɔɔ. Kú kpôŋ-ŋa kpɛtɛ kúkɛ dílaa tɛ̀ la. Kúkɛ zɔ́ɔŋ tòo. Kwa pɔ̂ri ǹɔii mɛi kâai kpɛ́ni fêi kwa Yâwɛɛ Ɣâla nîa mɛni kɛ̂i, ǹyaŋ a lii-see tɛɛ kúpɔ ƃéla kélee ma.” Nya ƃe dí daa-ŋai tɔ̂ɔ dí ƃûu ƃó.

⁸ Gâloŋ Asa ŋɔkɔkûluƃa-ŋai wála ŋuŋ saaƃa (300,000) è kùla Zuda. Kpála ŋá-ɣale kɔli-kalaŋ kpaya-kpaya-ŋa da kpála-ŋa dí kɛ̀ díyêei. Gɔkûluƃa wála ŋuŋ feerɛ pôlu lɔ́ɔlu mɛi saaƃa (280,000) è kùla Bɛŋsimaŋ ŋɔsuui su. Kpála ŋá-ɣale kɔli-kalaŋ pɛlɛ-pɛlɛ-ŋa da kerâŋ é pɛ́lɛ tɔ̃a ma è kɛ̀ díyêei. Zuda da Bɛŋsima kɔkuluƃa-ŋai díkɛ a líi kpeleɛɛ.

⁹ Naa kɛ́ɛ tí, Itiopia naloŋ tɔnɔ nyíi da kɛ̂ ma Zera è pà a kɔkuluƃa kpulu kɛ́tɛ é kɔ́ pɛ́lɛ Asa da ŋɔnûai dîa. È pà a kɔ́ kɔ́-keleŋ 300 da kɔkuluƃa meeyɔ̃ŋ tɔnɔ nyii-ŋai kɛ̀ siai díkɔɔ-ŋai. Dí pà kpɔ́ é lɛ́ɛ la zu dí seri Marisa taa-lêei su.

¹⁰ Nya ƃe Asa è lì a gɛ́ɛ dí gɔ́i kɔ́. Dí kɔ̀yɛŋ Zefata tiŋ-tiŋ su Marisa kɔlɛ ma.

¹¹ Gɛ́ɛ tí, Asa è Ŋɔɣâlai Yâwɛɛ tòli ǹyɛɛi, “Yâwɛɛ, núu da fé naa gɛ́ tùa yɛ̂ɛ yá, gɛ́ kpɔŋ mâaa tɛ̀ɛ diai pɔ́ pɔri maa fé díyêei a gɛ́ɛ é kɔ́ ŋ̀wála-wala-ƃelai pɔ. Kpɔŋ kûa, Óo Yâwɛɛ Kúɣâlai, kpɛ́ni fêi yá nɔ́ ƃé kúkili káa yâ, ǹyaŋ kú pà a gɛ́ɛ kúkɔ gɔ́kuluƃa kpulu kɛ́tɛi ŋí pɔ́ ílaai su. Óo Yâwɛɛ, yá nɔ́ ƃa Kúɣâlai, ífe nɛ̀ɛ naa núu-kpune láa é tɛ́ɛ yâ.”

¹² Nya ƃe Yâwɛɛ è Itiopia-ŋai yée mɛi ɣâle Zuda da Asa díŋɛi-tuɛ. Itiopia-ŋai dí pù.

¹³ Kɛ́lɛ Asa da ŋɔkɔ-kuluƃa-ŋai dí lɛ̀ɛ kpɔ́ dípôlu é lɛ́ɛ la zu dí seri Gɛra. Dí Itiopia-ŋai díkɔ-kûluƃa-ŋai dámaa pàa pere fé kɛ́ ní díyêei a gɛ́ɛ da ŋɔ́nɔ pɔri kɔ̂i. Yâwɛɛ da ŋɔnûai dí Itiopia-ŋai yée mɛi ɣâle dí díkɔ̃liŋ kélee síɣe.

¹⁴ Zuda kɔkɔ-ƃelai dí Gɛra taa-lêei kɔlɛ ma kpanaŋ-ŋai kélee kpɔ́ su kàra. Kpɛni fêi Yâwɛɛ è gɛ Gɛra ƃelai díyao kpɔ́ a ŋanaa. Dí naa sãa kélee kpúŋ síɣe, kpɛ́ni fêi, sãa támaa è kɛ̀ naa.

¹⁵ Dí ŋɔ́nɔ lì dípɛlɛ mala-mɛi-kaa-ƃelai díƃûui ma dí ƃála-ŋa, ƃoli-ŋa, da soo-fáleŋ-ŋa támaa sóŋ naa dí lí la. Nya ƃe dí lène pôlu dí lí Zerusâlɛŋ.