Kɔlɔnikɔ Veerɛi 13 - Bible

Aƃiza da Zɛroboaŋ dí kɔ́kɔ̀

¹ Gâloŋ Zɛroboaŋ kɛ́ɛ a Kâloŋ Eezuɛ mɛni mai, ŋɔkóraŋ puu káo lɔ́ɔlu mɛi saaƃai su ƃé Aƃiza è kɛ̀ la a kâloŋ Zuda lɔii su.

² Aƃiza è kóraŋ saaƃa kɛ̀ Zerusâlɛŋ gâloŋ-laai su. Ǹee láa ƃé wɔ́lɔ kɛ̀ a Maaka nyíi kɛ̀ a Giƃia nuui Uriɛ ǹóŋ nɛnii. Naa kɛ́ɛ tíi, kɔ́ è tòo Aƃiza da Zɛroboaŋ díloai.

³ Aƃiza kɛ́ɛ liî gɔ́i mai, è kɔkûluƃa wála ŋuŋ náaŋ (400,000) sìɣe a gɛ́ɛ é pɛ́lɛ Zɛroboaŋ ma. Zɛroboaŋ ŋɔkɔkûluƃai è kɛ̀ a wála ŋuŋ lɔ́ɔlu mɛi saaƃa (800,000).

⁴ Nya ƃe gɔ-kûluƃa kpulu feerɛi ŋí dí kɔ̃yɛŋ ǹyée lɔii su nyíi kɛ̀ Ifiraŋ-lɔii sui. Gɛ́ɛ tí, Aƃiza è tɛ̀ Zemaraiŋ Yee kɛ́tɛi tôŋ su ǹyɛɛi, “Zɛroboaŋ, ka Eezuɛ-ƃela kélee ka ŋ́oo mɛ́ni!

⁵ Káfe gɔ́lɔŋ a gɛ́ɛ Yâwɛɛ nyíi gáa a Eezuɛ Ŋɔɣâlai a wɔ́lɔ Eezuɛ-kaloŋ-laai ŋí tɛ́ɛ Deeƃé pɔ́ da ŋɔsuui wɔ́lɔ-wɔlɔ da wɔ́lɔ-wɔlɔ a kpânaŋ-woo nyíi gɔyɛŋ fé mai?

⁶ É máŋ kɛ́ tí, Zɛroboaŋ nyíi gáa a Neƃa ǹóŋ nyíi kɛ̀ a Deeƃé ǹóŋ Saloma ŋɔtí kɛ́-nuu kɛ́tɛi è tɔ̀ɔ ŋɔmɛi-nuui ma.

⁷ Gɛ́ɛ tí, pilaŋ gɔ́ɔ-ma-ƃela nyii-ŋai kɛ̂i fí dîai, dí pà dítɔɔ bôlu a gɛ́ɛ é kɔ́ pɛ́lɛ Saloma ǹóŋ Leoboaŋ ma a tãi è wɔ́lɔ kɛ̀ la a nyáŋkpa va pɔ̂ri tíi kɛ̂i a gbɔ́ɔi kili-ŋa-siai, dɔɔ̂i fé kɛ́ ní a gbanaŋɔɔ a gɛ́ɛ é kɔ́ dípɔ.

⁸ Ǹyaŋ yaâ gbɛ̀tɛ íkili ŋá a gɛ́ɛ í tɔ́ɔ gâloŋ-laai ma nyíi Yâwɛɛ è wɔ́lɔ dɛ̀ɛ Deeƃé da ŋɔsuui dípɔi. Tɔ̃yâ ma kákaa a kɔkuluƃa kpulu kɛ́tɛ, gôo niŋa-lonii-ŋai Zɛroboaŋ è gbɛ̀tɛ gɛ́ ƃò káyêei a káɣâla-ŋai.

⁹ Káfe Yâwɛɛ ŋɔsâla láa-soŋ-ƃelai nyii-ŋai díkaa a Eelɔŋ ǹônii-sinaai da Liiva-ŋai kpɛ́ ní ká kákpɔɔi sala láa-soŋ-ƃela siɣe kánûai-ŋai sáma yɛ̂ɛ lɔi da kpɛ́ni su-ƃela? Núui nyíi kélee a gbîŋ maa wâa a niŋa-loŋ da ƃála-sirɛ lɔ́ɔlu mɛi-feerɛ a kɛ nɔ́ a sâla láa-soŋ-nuu zɛŋ mɛni ma nyíi vé a ɣâla-ŋai.

¹⁰ “Mɛni a kpera kûa, Yâwɛɛ ƃa Kúɣâlai. Kúfe niî kúyee kula ní mù. Zâla láa-soŋ-ƃelai da tíi kɛ̀ Yâwɛɛ mii, díkaa a Eelɔŋ ǹônii-sinaai. Liiva-ŋai díkaa kpɔŋ mâaa tɛɛ̂i dípɔ.

¹¹ Ɣele-wala da ɣele-wulii kélee da kéreŋ sala da sɛŋ kúŋ-nɛ̃ɛ sala kùla Yâwɛɛ ma. Da gbóloi làa teƃelei ŋá nyíi maa waai yɛ̂ɛ berei ǹûai tûa-perei káa lai. Díkɛ laŋpoi tɔ̀ɔ nyii-ŋai díkaa laŋpo see-wurii-ŋai a ɣele-wulii kélee. Mɛnii kélee Yâwɛɛ nyíi gáa a Kúɣâlai a mò kûai kwa gɛ̀. Kɛ́lɛ ka kápôlu tɔɔ mà.

¹² Ɣâla káa kúkɔlɛ. Nya ƃe gáa a kúlaa-tuɛ-nuu. Ŋɔsâla láa-soŋ-ƃelai díkaa ƃɛ́ díturii kɛ́ ƃò díyêei a gɛ́ɛ dí gɔ́-tee turii fɛ́ɛ. Eezuɛ-ƃela, káfe kɔ́ pɛ̀lɛ kánâŋ-ni Díɣâlai Yâwɛɛ mà, kpɛ́ni fêi káyee fé pâi lɔ̂ii.”

¹³ Tãi Leoboaŋ è kɛ̀ lônoi la, Zɛroboaŋ è ŋɔkɔ-kuluƃa-ŋai gbulu tɔnɔ tɛ̀ɛ Zuda-ƃelai pôlu pere a gɛ́ɛ dí gbã tée dípôlu-pere, Zɛroboaŋ da gɔ-kuluƃai gbulu gbéli díkɛ ƃò Zuda-ƃelai ŋɛ́i-tuɛ-pere.

¹⁴ Zuda-ƃelai kɛ́ɛ da tínaŋ, dí gàa a gɛ́ɛ Zɛroboaŋ da ŋɔkɔ-kuluƃa-ŋai díkɛ̀ kɔ̂i dípɔ dípôlu da dítuɛ-pere. Nya ƃe díwɔ̀lɔ Yâwɛɛ ma. Gɛ́ɛ tí, Zâla-laa soŋ-ƃelai dí nâa díturu-ŋai fɛ̂ɛ,

¹⁵ nya ƃe Zuda kɔkuluƃa-ŋai dí làɣi a gɔ́i maa fɛ́ɛ-woo. Tãi dí gɔ́i maa fɛ̀ɛ lai, Ɣâla è Zɛroboaŋ da Eezuɛ-ŋai same têe dímu Aƃiza da Zuda-ƃelai ŋɛ́i tuɛ.

¹⁶ Nya ƃe Eezuɛ-ŋai dípù Zuda-ƃelai yêei, kɛ́lɛ Ɣâla è dítɛ̀ɛ Zuda-ƃelai pɔ.

¹⁷ Aƃiza da ŋɔkɔ-kuluƃa-ŋai dí Eezuɛ-ŋai dámaa ɣele pàa. Diai dí dípàai díkɛ̀ a núu wála ŋuŋ lɔ́ɔlu (500,000). Ǹûai ŋí díkɛ a Eezuɛ kɔ̀kɔ́-ƃela tɔɔ̂i kpanaŋɔɔ

¹⁸ Maa ɣelei tí, Eezuɛ-ŋai díwala-wala-laai su è sàa, kɛ́lɛ Zuda-ŋai dí Eezuɛ-ŋai yée mɛi ɣâle kpɛ́ni fêi, Zuda-ŋai dí díkili tɔ̀ɔ dínâŋ-ni Díɣâlai Yâwɛɛ ma.

¹⁹ Nya ƃe Aƃiza è Zɛroboaŋ kpɛ̀ é daa-ŋai ŋí sóŋ ǹyêei: Daa-ŋai kpîŋ ƃa: Bɛtɛ, Zɛsana, da Ɛfoŋ é pɛ́lɛ díkɔlɛ ma kpanaŋ-ŋai dîa.

²⁰ Zɛroboaŋ fé ŋɔ́nɔ wɔ́lɔ pɔri ní tɔɔ̂i Aƃiza ŋɛ́i a tãi è kɛ̀ la a kâloŋ. Nya ƃe Yâwɛɛ è Zɛroboaŋ lòkwa é sáa.

²¹ Kɛ́lɛ Aƃiza tɔɔ̂i è kpànaŋ a ŋánaa. È nɛnî puu-káo náaŋ kùla. Ǹônii-sinaai díkɛ̀ buu feerɛ káo-feerɛ. Nɛyâa-ŋai díkɛ ƃò puu káo lɔ́ɔlu mɛi-da

²² M̀ɛni-ŋai nyíi Aƃiza è wɔ́lɔ gɛ̀i, kpaa máŋ é mói, díkelee díkaa Ɣâla ŋɔlóno kɛ́-nuui Ido ŋɔmɛni-pɔlɔi su.