Kɔlɔnikɔ Veerɛi 12 - Bible

Ize kaloŋ è kɔ́ pɛ̀lɛ Zuda ma

¹ Leoboaŋ kɛ́ɛ naa ŋɔkâloŋ-laai a nâa sîŋ sòŋ, da Eezuɛ-ƃelai kélee dí díyee kùla Yâwɛɛ ŋɔtɔ̂ŋ-ŋai mu.

² Tãi Leoboaŋ è kɛ̀ la gâloŋ-laai su a kóraŋ lɔ́ɔlui, maa tãi tí Ize kaloŋ Sisaki è pà é kɔ́ pɛ́lɛ Leoboaŋ ma, kpɛ́ni fêi Leoboaŋ da ŋɔnûai dí díyee kùla Yâwɛɛ mu.

³ Sisaki è pà a kɔ́ kɔ́-keleŋ wála tɔnɔ pôlu ŋuŋ-feerɛ (1,200) é pɛ́lɛ soo kɔkɔ́-ƃela wála buu lɔ́ɔlu mɛi da (60,000) ma da kɔ́ɔ-ŋa kɔkɔ-ƃela nyíi núu fa pɔ̂ri dí lônoi. Da dîa-ni díkula Lebia, Suki, da Itiopia lɔii-ŋai su. Sisaki da gɔ-kuluƃa-ŋai ŋí díkùla Ize.

⁴ Daa-ŋai kpɔ́ ziɣãŋ è kɛ̀ a dínaŋɔɔ ma Zuda lɔi sui, Sisaki è gélee kpɔ́ kùla yêei kɛ̀ é lɛ́ɛ la zu é seri Zerusâlɛŋ taa-lêei kɔlɛ ma.

⁵ Nya ƃe Ɣâla ŋɔlóno kɛ́-nuui Semaiya è pà Leoboaŋ da Eezuɛ láa túɛ-ƃelai pɔ́-naa a tãi dí díŋa tɛ̀ la ma Zerusâlɛŋ kpɛ́ni fêi díkɛ̀ yaôi Sisaki mai, è mò dîa ǹyɛɛi, “Yâwɛɛ è mò ǹyɛɛi, ‘Ka káyee kúla ḿû, mɛni ma ŋâa ńyee kúla ká mu Sisaki yêei.’ ”

⁶ Nya ƃe Eezuɛ núu kpaya-kpayai da gâloŋ ni dí dílii pène dí mó dîyɛɛi, “Yâwɛɛ teniŋ ƃôɔɔi.”

⁷ Tãi Yâwɛɛ è gàa la a gɛ́ɛ ǹûai da dílii pènei, Yâwɛɛ è lòno Semaiya pɔ́ ǹyɛɛ mai, “Tãi nɔ́ daâ dílii ma fáleŋ, ḿve pâi dísu kalai, kɛ́lɛ ŋa pâi ŋuŋ-ma ƃo loŋ tɛɛi dípɔ. Ḿve pâi ŋálii ŋwânai tɛɛ̂i Sisaki kponoi a gɛ́ɛ é Zerusâlɛŋ kula-maa kɛ.

⁸ À kɛ̀ Sisaki a kɔ́ pɛ̀lɛ Zerusâlɛŋ ma, gɛ̀ ní ŋa pâi nɛɛ̂i naa é Zerusâlɛŋ yée mɛi ɣále ǹaa ƃela díkɛ a ǹyée mu-ƃela. A kɛ̀ tí, Zerusâlɛŋ ƃela da pâi núu kɛ́ɛ kâloŋ da kpɛ́ni yée mu lɔii da kpɛ́ni su tua kɔlɔni é tɛ́ɛ núu kɛ́ɛ ǹyée mu ma.”

⁹ Tãi Ize kaloŋ Sisaki è kɔ́ pɛ̀lɛ la Zerusâlɛŋ mai, è díyee mɛi ɣale é Zerusâlɛŋ siɣe. Nya ƃe è Yâwɛɛ ŋɔpɛ́rɛi mu laai-kɛ sãai kélee kpúŋ sìɣe é pɛ́lɛ gâloŋ ŋɔpɛ́rɛi mu sãai kélee dîa. È zãai kélee kpúŋ sìɣe é pɛ́lɛ gbála ŋá-ɣale kɔli-kalaŋ-ŋai nyíi Saloma è wɔ́lɔ gbɛ̀tɛ a gôoi.

¹⁰ Nya ƃe Gâloŋ Lioboeŋ è gôo è kpála ŋá-ɣale kɔli-kalaŋ-ŋai bɔɔ tòo kpɛ̀tɛ a ƃara-ŋa é dítɛɛ gɔ-kuluƃa-ŋai mɛi-ƃelai pɔ́-naa nyii-ŋai kɛ̀ tíi kɛ̂i gâloŋ pɛrɛi lai.

¹¹ Tãi gâloŋ a kâa kɛ̀ liî la Yâwɛɛ ŋɔpɛ́rɛi mui, gɔkûluƃa-ŋai da kâa lɛ̀ɛ bôlu dí lí gbála ŋá-ɣale kɔli-kalaŋ-ŋai dí kɛ́ ƃò díyêei. Tãi da kâa kpɛ̀ɛ lai, gɔ-kuluƃa-ŋai da kâa gbála ŋá-ɣale kɔli-kalaŋ-ŋai tɛ̀ɛ pôlu ǹâai kɛ́ kwaai ma.

¹² Leoboaŋ kɛ́ɛ a ǹíi maa fáleŋ, Yâwɛɛ è ŋɔlii-wanai su sàa vé Leoboaŋ kula maa kɛ́ ní. Kpɛ́ni fêi è mɛni lɛ́lɛɛ-loŋ kɛ̀ Zuda a maa tãi tí.

M̀ɛni-ŋûŋ-ŋai kɛ̀ Leoboaŋ ŋɔkâloŋ-laai sui

¹³ Gâloŋ Leoboaŋ ŋɔkâloŋ-laai kɔ́ɔ è nâa pìlaŋ kpɔ́ Zerusâlɛŋ a gbanaŋɔɔ é lɛ́ɛ naa a kâloŋ. È kɛ̀ a kóraŋ buu náaŋ káo tɔnɔ é lɛ́ɛ pâi kɛ̂i a kâloŋ. Nya ƃe è kóraŋ puu káo lɔ́ɔlu mɛi-feerɛ kɛ̀ gâloŋ-laai su Zerusâlɛŋ. Zerusâlɛŋ ƃé gáa a daa-lêei nyíi Yâwɛɛ è wɔ́lɔ zìɣe zu Eezuɛ sii-ŋai kélee sáma a gɛ́ɛ a pâi kɛ̂i a ŋɔtaai. Leoboaŋ ǹee láa ƃé kɛ̀ a Naama. Naama ǹyaŋ è wɔ́lɔ kɛ̀ a Amɔŋ taa-lêei su nɛnî.

¹⁴ Leoboaŋ è mɛni nyɔ́mɔɔ kɛ̀, kpɛ́ni fêi vé gíli tɔɔ ní Yâwɛɛ ŋɔtûa-perei ma.

¹⁵ M̀ɛni-ŋai nyíi kélee Leoboaŋ è wɔ́lɔ gɛ̀i, é síɣe ŋɔtíi kɔ́ɔ pîlanii é tóo gbɛɛ-ŋai ma káa Ɣâla ŋɔlóno kɛ́-nuui Semaiya ŋɔmɛni-pɔlɔ kɔlɔi su. Ŋɔsuui maa mɛni-pɔlɔi káa máŋ Ido ŋɔmɛni-pɔlɔ kɔlɔi su. Kɔ́ fé wɔ́lɔ kpɛɛ ní Leoboaŋ da Zɛroboaŋ díloai.

¹⁶ Leoboaŋ è sàa dí ǹoo Deeƃé ŋɔtaa-lêei su. Ǹóŋ Aƃiza è lɛ̀ɛ bɔ́ɔ-ŋa a kâloŋ.