Kɔlɔnikɔ Veerɛi 10 - Bible

Yá-ŋua pere sii-ŋai dítɔɔ Leoboaŋ ma

¹ Nya ƃe Leoboaŋ è lì Sɛkɛŋ ƃɛ́i Eezuɛ-ŋai kélee dí díŋa tɛ̀ naa gîe ma a gɛ́ɛ dí zee a kâloŋ.

² Tãi Zɛroboaŋ nyíi kɛ̀ a Naba ǹóŋ è mɛ̀ni lai, ì kùla Ize è pa Sɛkɛŋ. Zɛroboaŋ è wɔ́lɔ yào Saloma ma é pú é lí Ize.

³ Dí Zɛroboaŋ worɛ̂ tɛ̀ɛ é pá da Eezuɛ-ŋai kélee dí lí Leoboaŋ pɔ́ dîyɛɛ mai,

⁴ “Ínâŋ è wɔ́lɔ kpîri wiyɛɛ làa kúŋûa. Mɛni ma, ye gbírii ŋí da mɛni kpɔ̂lui ŋí kúla kúŋâ, gɛ̀ ní kwa pâi kɛ̂i a íyee mu-ƃela.”

⁵ Nya ƃe Leoboaŋ è díwo su tòo ǹyɛɛi, “Ka lí fólo saaƃa à tɛ̀ɛ ká pá pôlu.” Gɛ́ɛ tí, ǹûai dí lène pôlu.

⁶ Ǹûai kɛ́ɛ da lii, Leoboaŋ è lì é ǹúu-pɔlɔ-ŋai da ǹâŋ-ni díwɔlɔ kɛ̀ tíi kɛ̂i marê kɛ́ ǹyɛɛi, “Lé lia-woo ƃé ká lá é pîlaŋ mɛnii ŋí mai?”

⁷ Dí ŋ̀óo su tòo dîyɛɛ, “À kɛ̀ ya tùa a ǹɛ́lɛɛ a ǹûai, í dínîa-mɛni kɛ́, í díwɛli, gɛ̀ ní da pâi kɛ̂i a íyee mu-ƃela.”

⁸ Kɛ́lɛ Leoboaŋ fé ǹyée sèe ní ǹúu-pɔlɔ-ŋai dília-wooi mu. È lì é m̀arâŋ ǹyaŋkpa-ŋai nyii-ŋai da dîa-ni díkɛ̀ a dípɔriɛɛ díkɛ tíi kɛ̀ mìi maré kɛ́.

⁹ È mò dîa ǹyɛɛ, “Lé lia-woo ƃé kálái? Lé ƃé kwa pɔ̂ri môi ǹûai ŋí marê kɛ̀ dîɛ, ‘Gbîri-wuyɛɛi ŋí ínâŋ è nàa kúŋûai gula kúŋûa.’ ”

¹⁰ Ǹyaŋkpaŋ-ŋai da dîa-ni dísìɣe a tãi tɔnɔi dí ŋ̀óo su too dîyɛɛi, “Mó ǹûai tí dîa nyii-ŋai kɛ̀ yâ gbîri-wuyɛi ínâŋ è nàa kúŋûai gula kúŋûa, yɛ̂ɛ dîai, ‘Ńyee-gbua guro-tei kpono kɛ́tɛi é tɛ́ɛ ǹâŋ leŋei ma.’

¹¹ Mó dîa yɛ̂ɛi, ‘Ǹâŋ è kpîri-wuyɛɛ làa káŋûa, kɛ́lɛ ŋa pâi kpîri-wuyɛɛ ŋánaa lâai káŋûa. Ǹâŋ è ká lòkwa a fáa, kɛ́lɛ ŋa pâi kálokwai a gbàtu-ŋa.’ ”

¹² Ŋele-kuu saaƃai tɛɛi, Zɛroboaŋ da Eezuɛ-ŋai kélee dí pà pôlu Leoboaŋ pɔ́-naa yɛ̂ɛ berei gâloŋ è mò la, “Ka pá pôlu ḿbɔ naa fólo saaƃa a tɛ̀ɛ.”

¹³ Gâloŋ è díwoo su tòo a ŋ̀ɛ́i tɛ́ɛ ɣelêi. È ǹyée kùla ǹúu-pɔlɔ-ŋai dília-wooi mu,

¹⁴ é ǹyée sée ǹyaŋkpa-ŋai díwɔ̂i mu, ǹyɛɛi, “Ńâŋ è kpîri-wuyɛɛ làa káŋûa, kɛ́lɛ ŋa pâi kpîri wuyɛɛ ŋánaa lâai káŋûa. Ńâŋ è ká lòkwa a fáa, kɛ́lɛ ŋa pâi ká lôkwai a gbàtu-ŋa.”

¹⁵ Gâloŋ fé ŋ̀óli tɔɔ ní ǹûai dîa. Ɣâla è gɛ̀ tí a gɛ́ɛ mɛnii Yâwɛɛ è wɔ́lɔ mò é Naba ǹóŋ Zɛroboaŋ ma Aiza sarâi nyíi kɛ̀ a Siloi ǹúui ŋa sèe é kɛ.

¹⁶ Tãi Eezuɛ-ŋai dí gàa la a gɛ́ɛ gâloŋ fé ŋ̀óli tɔ̀ɔ ní dîai, dí ŋ̀óo su tòo dîyɛɛi, “Lé ƃé kwa pâi gulâi Deeƃé da ŋɔsuui yêei? Lé ƃé Zɛse ǹóŋ a gɛ́ kûɛi? Eezuɛ-ƃela, kwaa lí kúpɛrɛ-ŋai la! Tɔɔ Deeƃé é gbɔ́ɔi pɛrɛi mɛi kaa!” Nya ƃe Eezuɛ-ŋai dí lì pôlu dípɛrɛ-ŋai la.

¹⁷ Kɛ́lɛ Eezuɛ-ŋai nyii-ŋai kɛ̀ daa-ŋai su Zudai, Leoboaŋ è kɛ̀ a díkâloŋ.

¹⁸ Naa kɛ́ɛ tíi, Gâloŋ Leoboaŋ è Adoniraŋ nyíi kɛ̀ díi-kɛ-ƃelai mɛi, tɛ̀ɛ Eezuɛ-ŋai pɔ́-naa a gɛ́ɛ dítii kɛ́, kɛ́lɛ dízɔ̀ɔ a kɔni dí bàa. Nya ƃe Gâloŋ Leoboaŋ è tɛ̀ ŋɔkɔ́ kɔ́-keleŋ su é pú é lí Zerusâlɛŋ.

¹⁹ É síɣe tãi tí ma é tóo gɔlɔi ŋí pɔ̃yɛ tãi ma, Eezuɛ-ŋai díkɛ̀ a dítɔɔ Deeƃé ŋɔsuui ma.