Timote dɔlɔɔ 4 - Bible

Pɔ̂ɔ è núu da-ni kula-mɛni ƃò naa-laai ma nàa túɛ

¹ Mɔ̂leŋ a mò a zu ponoɔ a gɛ́ɛ tãi da káa pâi núu da-ni da pâi díyee kulâi naa-lai su dí díwoli tɔ́ɔ nuu-pɛlɛ-mɔleŋ-ŋa dîa da nyînaŋ nyɔ́mɔɔ-ŋa dísɛŋ-lɛɛ,

² kiri-lɛɛ kɛ-ƃela sârai nyíi-ŋai díkili-ŋa-siai saâi.

³ Ǹûai ŋí dísɛŋ-lɛɛi su da nɛ̀ a gɛ́ɛ tûa-laa fé kɛ̀ ɣele ma, díkɛ nɛ a gɛ́ɛ nûa dífe mii-sɛŋ-sii da-ni mii, nyíi-ŋai Ɣâla e díkpɛ̂tɛ a gɛ́ɛ diai laa-la káa díyêei dí ƃo a dɔ̃yâi kɔ́lɔŋɔɔ̂i dí zɔlɔ ƃó a sɛɣɛi-féi.

⁴ Kpɛ́ni fêi, sɛŋ kélee Ɣâla e gbɛ̀tɛi, ǹɛ́lɛɛ̂i. Kúfe kúyee kùla Ɣâla-kpɛtɛ-sɛŋ da kélee mu à kɛ̀ ku zɔlɔ ƃo a sɛɣɛi-féi;

⁵ kpɛ́ni fêi, gɛ̀ ní maa waai a Ɣâla ŋɔwooi da Ɣâla fɛliɛ.

Zîsɛ Kôrai ŋɔtíi kɛ́-nuu lɛ́lɛɛi

⁶ À kɛ̀ yà mɛni-ŋai ŋí pu kúƃarâai ŋɛi, gɛ̀ ní ya pâi kɛ̂i a Zîsɛ Kôrai ŋɔtii-kɛ-nuu lɛ́lɛɛ, gɛ̀ ní naa-laai maa-wooi a pâi kɛ̂i a íkɔnɔŋ da zɛŋ-lɛɛ lɛ́lɛɛi í pîlaŋɔɔi bôlui.

⁷ Ífe íwoli tɔ̀ɔ ƃoo-lɛɛ-mɛni pɔlɔ-ŋa dia. Dímaa fé waa ni. Íkpîŋ mɛi káa Ɣâla-mɛni su;

⁸ kpɛ́ni fêi, berei núu kpono mɛi-kaa lɛ́lɛɛ̂i lai, bere nɔ́ ƃe Ɣâla-mɛni lɛ́lɛɛ̂i la pere-sii kélee su máŋ, kpɛ́ni fêi, a kono-tèe kɛ̀ vulu-laai ŋí mɛni ma da vulu-laai pâi pâi máŋ.

⁹ Mɛnii ŋí kaa a tɔ̃yâ, maa nɛ̃ɛ a gɛ́ɛ fɛ̂ɛ ku kúyee sée mu kpɔ́ a gbanaŋɔɔ.

¹⁰ Nyíŋi mɛni ma kúkaa tíi kɛ̂i kúkɛ kɔ kpɔ́ a gbanaŋɔɔ, kpɛ́ni fêi, kwa kúkili-kɛ-zui pu gɛ-ɣele-ma-Ɣalai ma, nyíi gáa a núu kélee Ƃalo-nuui, é tela kɛ́ kpɔ́ a diai laa-la káa díyêei.

¹¹ Mɛni-ŋai ŋí ƃó í dílɛ.

¹² Ífe ǹɛɛ naa núu fé ŋɛi naɣîŋ ímɛi a gɛ́ɛ íkaa a lôloŋ, kɛ́lɛ, naa-la-ƃelai lɛ́ a mɛni-kɔɔŋ-maa ílono-woo su, ítûa-pere su, wɛli-kɛ-maa su, laa-la su, da maa-waa-laa su.

¹³ Ŋâla-kɔlɔi lóno kpɔŋ su, í Ɣâla-woo ƃó, í sɛŋ lɛ́ é lɛ́ɛ la zu ŋá pá.

¹⁴ Tíi kɛ́ a zama-sɛŋ gáa íyeêi, nyíi dí dɛ̀ɛ ípɔ ímaa-mɛni-ƃoɔ nàa tuɛ sârai tãi ǹúu-pɔlɔ-ŋai dí díyee pɛ̀lɛ la yâi.

¹⁵ Mɛni-ŋai ŋí maa kɔ́ri, í íkpîŋ tɛɛ dípɔ a gɛ́ɛ núu kélee dí gáa berei íkaa liî la tuɛ-perei.

¹⁶ Íkpîŋ mɛi káa da ísɛŋ lɛɛi; nyíti é kɛ́ a íkɛ-mɛni, kpɛ́ni fêi, yà gɛ̀ ti, gɛ̀ ní ya pâi íkpîŋ ƃálôi da íwoo mɛni-ƃela.