John 1 - Kwak'wala 4 Gospels Acts and Selections 1897

¹ Lāḵī da gālābā yūtla qātlilā mūtlī da wātldum, kapetla mūtl wīsī da wātldum glū God, wa hī um ḵa ā wīs God tī da wātldum.

² Hīmīs lāḵī da gālābā yūtla kapetla glū God.

³ Uḵā yūtlūḵ da nāhwēḵ sī, wa kū kīyosū, kīs lāḵs wūtl tūḵ uḵā yūḵ da lūtlīḵ uḵāya.

⁴ Hīum qilātlā gītlī, wa yiḵī da qilātla gītl hīum nāqātlās bagwānum.

⁵ Lā tī da nāqātlā qukātla ḵā pudikilā, kīs tī da pudikilā āyūsilāk.

⁶ ¶ Gāḵ wūtlī da numūq wūtla bagwānum yālākum gēh‐īd lāḵ God, ḵā glīkādūtlas John.

⁷ Hī mīs gāḵ wūtl kā zikyātlilā, kās zikyātlilī sa nāqātlē, kās ūqisītlī sa nāhwāḵ.

⁸ Kīs wūtlī hī dī da nāqātlē, lūtl glā tī gāḵā matsū kās zikyātlilī sa nāqātlē.

⁹ Ḵā aulē nāqātla yiḵā nāqātlā masāḵ nāhwā bagwānum gāḵ lāḵwā awīnāgwīsīḵ.

¹⁰ Gīgilīsilūtlī lāḵwā awīnāgwīsīḵ, uḵā yūtlūḵ da awīnagwīsāḵ sī, kīs wūtl tūḵ da awīnāgwīsīḵ mātltela kī.

¹¹ Gāḵā ūtla lāḵūs uḵīḵ, kīs wūtl tūḵ uḵaḵsī dādālā kī.

¹² Wa yiḵ wāḵā ā sā sa dādālē kī, hī mīs la sāsumh īdā matsū sī lāḵ God, yiḵī da nāhwē ūqisāḵ glīkuma sī.

¹³ Yiḵā māyūglum, kīs ulqā zis, kīs ḵād īāḵī sa uldsī, kīs ḵād īāḵīs bagwānum, God zisa ā glākl.

¹⁴ Wa lūtl tī da wātldum gāḵ uldsuh īda, gāḵ wūtlī gīgilkī gāḵunts, lūtlinūh dūqilāḵ qīxdum kyās ausī, qīxdum kyās ausā numūq mā ḵwanūq sa Umpa, kūtēk ēgālazī glū aula.

¹⁵ ¶ Zikyātlil ūtlī John ūtlas, hāsil nīkyā, yūmun qayū wūtlūḵ yiḵ gin nīkīg, yiḵā gāḵlā ātlākāwī klin, lī gālākumd gāḵun, kā īḵs gālākāwāyā ūtlin.

¹⁶ Kā kūtā īnāyāsī lunts nāhwā um lokla, hīmīs egālazī kā egālazī.

¹⁷ Kā ī da law zawya ūtl gāḵunts lāk Moses wūtla, lāglā tī da egālazī gla wa aula gāḵ gāḵunts lāḵ Jesus Christ.

¹⁸ Kīyos bagwānum la um dūḵ wā klilū yaulāḵ God, ḵā numūq mā Kwanūqa, yiḵī da he lī ūnūdsiyā sa Umpā nītlā sī.

¹⁹ ¶ Wa ga um ūtlts John āḵs lā ūtlī da Jews yālākā sa priests gla wa levites gēh īd lāḵ Jerusalem wūklāk, Ungwās?

²⁰ La mīs nītlā, kīs hāyāmā au um nītlā, kīs nūgwī da Christ‐ā.

²¹ Lāk dāḵw wūklāk, Mās wīs glās? Sū ma Elijah sa? La nīkyā, kīs nūgwa. Sū ma ī da propheta ā? Lāḵa ā nānāḵmī, kī.

²² Wa lāḵ dāḵw nīk yik, ungwā zau wīs glas? kunūh wātldumkl ḵā yālākum nūqa unūh, māsīs wātlduma ūs kās baqīnā yūs.

²³ La nīkya, nūgwā mī da nīkyālē lāḵā lūblabīs, nukulā masla ḵā dihyilē sa Gīkumāya lāḵ wātldum ūtlas Isaiah ḵā prophet.

²⁴ Gāyūtl dāḵw tī da yālākum lāḵā Pharisees.

²⁵ Lāk dāḵw wūklāk nīk yik, mā zau tīs baptize gītla, kāsū kīs sū dī da Christā, glū kīs sū wī Elijah, glū kīs ḵād sū wī da prophetā?

²⁶ Lī John nānāḵmīk, nīkyā, baptize un klā sa wāp; lā tūḵ da numūqāk gloqī lāk dāḵwūkl, ḵūs kīs dāḵwā kūs kauglitlā.

²⁷ Hī um gāḵīgī‐kl gāḵun, ḵun kīsā hītla wās lāḵ qītlū dēḵ nīnīgātl tsīzā yas tībāyau sī.

²⁸ Hayūtlūk lī Bethany lāḵ qīsāyas Jordan, lāḵ baptize zas wūtlas John.

²⁹ ¶ La tlunsā lī John dūqilāḵ Jesus qāsūtlil lāk, la nīkyā dūqātlāla gāḵ Lāmādūs God, ḵā uḵūdēḵ yēkīnāyāḵ sa awīnāgwīsīḵ.

³⁰ Yū mun gayū wūḵ yiḵ gin nīkīg lāḵā ātlākāwī kla un gāḵ klī da bagwānumā, yiḵā lē gālākumd gāḵun, kā īḵs gālākāwā ya ūtlin.

³¹ Wa kīs din kauklilāk; wa kā nīlumī sik lāḵūḵ Israelḵ hī mun gāḵītl baptize, yisā wāp.

³² Lūtl tī John ūtla zikyātlil nīkya, duqilāh īdun kla ḵā Spirit gāḵāḵul, hī qīx pīpāklūmasā gāyā nāqil lāḵā īkī, gāḵ uḵāklilā lāk.

³³ Wā kīs din kauklilāk, lūtl glā tī da yālākum nūqā un kun baptize ī sa wāp, nīk wūtl gāḵun, yiḵī da dūqitl kla ūs lāskum dāla sūkl tsa Spirit, hī um baptize kla sa Holy Spirit.

³⁴ Lamūtl wīsin dūqila, la um ḵa ā wīsin zikyātlilāḵs ga mā ī Ḵwanūqs God.

³⁵ ¶ Wa ītīd ḵā lā tlinsā glāwīsī John, gla wa mālūq lāḵīs disciples.

³⁶ La dūḵwīduk Jesusāḵs kēnāqilā ī, la nīkyā, doḵ Lāmādos God!

³⁷ Lī da mālūq disciples wūklilā kīḵs nīkyā ī, lāk dāḵw lāskumīḵ Jesus.

³⁸ Lī Jesus mulīḵglā la dūqila kīḵs lēgīh dāḵwa‐āk, la nīk yik māsīs uḵsūq dāḵwā? Lāk dāḵw nīk yik Rabbī (ḵā nīk yāḵs lā ī ayūzūdāyau Gī) wī das gāḵ lī?

³⁹ La nīk yuk, kīlagā kās dūqila ūs, wa gāḵ dāḵw la dūqilāk dāḵwuḵ uḵ‐āsas, hīksēk dāḵw mīs gla wī ḵā nāla, ḵā lā mū zā kīl qātl nakēlā.

⁴⁰ Ḵā numūq lāḵā mālūq lāskumēk wūglākuḵs dīh dēḵ John, hīd Andrew ī zāyēs Simon Peter.

⁴¹ Hī tā gil khā ḵīs nūla yiḵ Simon, la nīk yik, lamunūh khā ḵā Messiah, ḵā nīk yāḵs ayūzūdayau ī Christ.

⁴² Gāḵīs lāḵ Jesus: lī Jesus dūḵ wī duk, kās nīkī, sū um Simons yiḵ ḵwanūqas Jona: la ums Cephas klā‐kl, ḵā nīk yāḵs ayūzūdayau ī, tīsum.

⁴³ ¶ Ḵī da la tlinsā, la nīkī Jesus kās lē lāḵ Galilee, la khāḵ Philip la nīk yuk, kīla lēgīla gāḵun.

⁴⁴ Gāyūtl tī Philip lāḵ Bethsaida, gūqila sas Andrew glū Peter.

⁴⁵ Lī Philip khāḵ Nathanael la nīk yuk, la munūh khāḵ gā qayū wūtl gās Moses wūtla lāḵā law kyātīdāyū wūtl ḵa ā sa prophets, Jesus sas Nazareth yiḵ ḵwanūqas Joseph.

⁴⁶ Lī Nathanael nīk yuk, gāḵ uka wā zau las um lā ḵā īs ekya ī Nazareth? Lī Philip nīk yuk, kīlāga dūḵ wī duḵ.

⁴⁷ Lī Jesus dūqilāḵ Nathanael qāsūtlil lāk, la nīkya doḵwā aulāḵ Israelite, ḵwā kīyosīḵ yāksum lāq.

⁴⁸ Lī Nathanael nīk yuk, wīzīs kauklilāh dumā ūs gāḵun? Lī Jesus nīk yuk, yiḵs kīs mīh dūḵ Philip īḵ klīl gātl lūkl āḵs qāḵglā‐līs mīh dē kūsā ḵā fig mis, hī mun dūqilāh dum ūkl.

⁴⁹ Lī Nathanael nīk yuk, Rabbi, sū um Ḵwanūqs God, sū um Gīkumīs Israel.

⁵⁰ Lī Jesus nānāḵmīk kās nīk yīk, hī umḵ gin nīkī gūkl, dūqilun klūkl lāḵ ūḵglāyā sa fig mis ūqis māsa? dūqilākl tsīḵ awīlā‐kāwī kla sīk.

⁵¹ La nīk yuk, aulin nīk yūkl, dūqilākl tsī ḵā īkī ukulīs‐kl, hī mī sa bībagwānum as God īkyū tlila banū tlila um ḵād lāḵ ḵwanūqā sa bagwānum.