Titus 1 - Kutsingken Ira Rimam ti Saen Kyag

¹ Kutsingken wune ru uwog-m, Bulus ti si upyi Rimam, u si atom Yesu Kristi ikyaen ande ti Rimam tsitsab, ti m na ndeya ba yi fengo Rimam u kwen na ba ira ti kubenti ti ku ye bom ande yi fengo Rimam,

² ikyaen ti a na sa uwae tsi risu unyang ti tsi kukunn, ti nee Rimam ti ku yer-wu rifen be yer unju risu-yi ti kucang akwen.

³ Tine, ti kiye wu nde pu wu, awu Rimam ti nwangru ti mbubta ira-wu ayi paenine uwae Ira Tinyang né awu sa faesi m kujwo baa, ame na sa tsag te ande.

⁴ Ame bae ira yine ku na fu Titus, unyin-m ti kubenti uwae fengo Rimam ti ati ku putsa tetso. Ayibrisi ti kujimshwur Rimam Itse, ti Yesu Kristi unde ti nwangru ti ā te fu som tetso.

Itso Ande ti A u Tsab Ikyaen Wande na Ande Ndufu

⁵ Ame ya fu ta uwae uten Kirete ikyaen ti fu na kyaenyang iken ti ati nde tag-ti ayi be, ti fu na tsab ande ndufu na ande Rimam tsi uwae uten titini pangma ti ame nda fu unju ti kucang.

⁶ Unde ndufu ti afu a ku tsab, awu ā si unde ti a tu-ba wu te riraen be. Awu ā mbe nyang unda kinjo amam. Anyisu-wu ā si anyisu ti ku ru kubenti uwog Rimam. Aba ā si-ba anyisu ti ande nung ba, aba si anyisu ti ku bom risu ku kyang ku nde ufunn be.

⁷ Unde ti uwe ande na Rimam si unde ti ta risu wande Rimam. Ikyaen yine, awu ā si unde ti a tu-ba wu te riraen be. Awu ā si-wu unde ti ku sae ru ande be. Awu ā si-wu unde ti ku tso rinae ti ritsen be. Awu ā si-wu unde ti ku ngwa ku shishaen be. Awu ā si-wu unde ti tsi-wu tsi be ku byinn unde be. Awu ā si-wu unde ti ijaen aser be.

⁸ Awu ā si unde ti ku kyangte rikyen uwae kununn-wu te utob titsen. Awu ā si unde ti sa uwae-wu tsi risu iken ti tinyang. Awu ā si unde ti ku ye su risu-wu u ku kab ira ti tinyang u ku som usom ti sisaen. Awu ā si unde ti ku nde iken-wu sku sku.

⁹ Awu ā tsi ti ribom uwae iken ti kwen ti kubenti ti a kwen na wu. Asiti awu a tsi ti ribom titawe awu u nde tu ti wu kwen na ande ti tsitsi iken ti kwen ti kubenti. Cwucwo, awu u nde tu ti wu tatso ande ti ku pyir riraen-ba pyir.

¹⁰ Ande ta atang yang akwen ti kpag risu, u ku ri ira ti ukaen, u ku kyaefa ariki. Ande ti ku nde iken yine siskeb si Mbayawuda ti tsikunn ti ku putsa icwe-ba ti tikyi.

¹¹ Fwan ba kubyag baa, a na bwe tag, ikyaen ti, aba ku kyirunn tag anunn ande yi fengo na iken ti kwen-ba ti nyang-yi ti a u kwen na ande be. Aba sa uwae-ba tsi risu aser amam. Ayi si iken ti ku wae rukwae.

¹² I si si unde ti uten Kirete atang, kinjo uwae ande ndufu-ba, ti ri ti kucang baa, ande ti Kirete na si ande ti ku wer kob rifen. Aba na si ibye anyi titibi. Aba si ande ti uyáng, ande ti rimenn imbyi.

¹³ Unde wu ri pang atang! Ikyaen yine, ame ku ri te fu, fwan kang ba kibyag ti ribom-fu, titawe aba u putsa ira Rimam yi fengo ti pang atang.

¹⁴ Ri te ba ti a na fxae ira ti tikyi ti Mbayawuda ku tsag, ama ti a na putsa-ba icwe na ande ti kafe isim ta ira ti kubenti be.

¹⁵ Ande ti sisaen, meme iken tsi sisaen uwog-ba, amaa, uwog ande ti isor ti ru-ba kubenti be, iken meme ku txi iyib ikyaen ti, utob-ba ti ira ti kab-ba.

¹⁶ Aba ku ri baa, aba na nung Rimam, amaa, wande ajwo-ba tso-yi ahan be. Aba si iken ti ku txi iyib. Aba si ande ti kpag risu u ku fxen-ba ira be, u nyang-ba nyang na wande iki ti tinyang be.