2 Timoti 1 - Kutsingken Ira Rimam ti Saen Kyag

¹ Ame Blus, unde ti Rimam tsab ti ame na si unde ti atom na Yesu Kristi, u tom m ru ti m na ya iskin risu unyang ti tsi kukunn, nee Rimam yer unju baa, awu na u nda ande ti ren risu te Yesu Kristi. Kutsingken wune ru uwog-m

² ba ku na fu Timoti, uyin-m ti utob-m. Rinyangwae, ti ayibrisi, ti kujimshwur ā ru uwog Rimam Itse, ti uwog Yesu Kristi si ba risu-fu.

³ Ko kiye titini, utitang ti usirtaen, ti ame a tangsom te fu, u ku jwam Rimam risu-fu, ame ku nde kob fxaefa na Rimam, awu ti ame ku fen wu pangma ti abitse-m nde, ti utob ti nae riben.

⁴ Ame ku tangsom te ira ti jwub-fu u ku sha ti m sae kang ayib-fu, ikyaen ti utob ti tsen-m ā mumunn.

⁵ Ame ku tangsom baa, afu na ku ru kubenti uwog Yesu ti uwae kinjo rikaen, itso uwae kinjo ti Lowis iya kuko-fu site yi ti kucang akwen, itso uwae kinjo ti iya-fu Afiniki site yi ama. Ame nung pu m baa, tine ayi ta ti uwae-fu ama.

⁶ Ikyaen yine, ame ku tangsom na fu ti fu na ye nwunn rinyangwae ti Rimam nda fu kiye ti ame pu ajwo cwutsa fu risu.

⁷ Ikyaen ti, Kusung ti Rimam nda ti si-wu Kusung ti ku nda ande ikyenricwu be, awu si Kusung ti ku nda ande kpakang, ti ure, ti risu ti ye.

⁸ Ikyaen na yine, wae-fu rukwae ti fu tsag ira Itsekuru-ti te ande be. Ame ama ti a ye m cwunnkyi ikyaen Itsekuru-ti, wae-fu rukwae m be. Sa ijwe-fu konje kuko na Rimam ama ti sang fa me uwae rikaen na wande na ira Rimam ti ti tsag te ande.

⁹ Rimam nwangru ti u kunn ti baa, ati na som usom ti sisaen. Ayi si-yi ikyaen iken iki ti ati nde be, ayi si ikyaen itimyae ti awu myae tsi ti rinyangwae-wu. Rinyangwae na Rimam ne, awu nda ti ti kiye ti awu kyae-wu utense khika be, yi fengo na Yesu Kristi.

¹⁰ Amaa, tine rinyangwae yine tso pu yi risu-yi uwae itiba na Yesu Kristi, unde ti nwangru ti. Awu twenji pu wu ribom iticwu, ama tatso ande paenine baa, ande ti a ru kubenti uwog-wu u tu unyang ti tsi kukunn, yi uwae Ira-wu ti tinyang.

¹¹ Ayi si ikyaen Ira Tinyang na Yesu né Rimam tsab sa m ti m na si unde ti atom ti unde ti ku kwen iken, ti m na ya iskin Ira Tinyang yi.

¹² Ayine si iken ti nde nee ame ku ngwa rikaen tine. Amaa, ame ku wae-m rukwae be, ikyaen ti, ame nung pu m unde wu ti ame ku ru kubenti uwog-wu. Ame nung pu m baa, awu na nde tu ti wu nungkyi iken ti ame nda wu kujwo ru ka fob ti Usir ti ricwunnkyi.

¹³ Ye su ira ti kubenti ti afu fxen uwog-m nyinyang. Som usom-fu ti uwae kinjo ti ure ti Yesu Kristi nda fu.

¹⁴ Ti kuko na Kusung ti Sisaen ti ta utob-ti, nungkyi iken ti tinyang ti Rimam nda fu kujwo nyinyang.

¹⁵ Afu nung pu fu baa, ande ti ta te m uten ti Asiya kucang, ter ya m ta pu ba, fa ti aba Figelus ti Hermogene.

¹⁶ Itsekuru-ti Rimam ā sae ayibrisi-wu ru ba kununn Onesiforu, ikyaen ti, awu ri jim kob m utob. Awu wae-wu rukwae ti ame ta uwae pursuna be.

¹⁷ Amaa, ti awu ru ba sang uten ti Roma ike, awu kwab u sha rifab-m, se ti awu tu m titawe.

¹⁸ Itsekuru-ti ā nda wu ti awu ā tu ayibrisi uwae usir ti ricwunnkyi. Afu nung pu fu ben ben itindeya ti awu ndeya m uwae uten ti Afisa.