तीतुस 1 - Kodaku

तीतुस लगड पवलुस लिखो तेडा चिट्ठी

¹ इंञ पवलुस, ईसु मसीह रेनिय परेरित हवे, अवुर भगवान रेनिय सेवेखिया हवे। इंञ नआँ चिट्ठी तीतुस, अम लगाडिंञ लिखो यडा, भगवान चुनो केडकुआ हेंकू बिसवास रे मजबूत कू लगड अवुर ईसु मसीह राः सत बढ़ियाँ तेम चेडकू लगड नआँ चिट्ठींञ लिखो यडा। हेंडे सत कू चेड कोःते भगवान राः मन घयतेकू जियो सकोआ।

² नआँ सत चेडूः रे बिसवासिकू अनन्त जीवन राः असरा रेकू दोहोना, कभी मेने जलियाः हेनी भगवान धरतिय बनो तेड वरी पहील ते अनन्त जीवन एमेय लगाडिय जबान केडा।

³ भगवान अनेज राः सही समय रे अनेज राः बढ़ियाँ खभेर ईञाः परचार राः दोवारा तेय देखर तेडा। अवुर हेना खभेर परचारे लगड अबू रेनिय उऊबराय भगवान राः हुकूम राः अनुसार ते ईंञिय जिमा वडा।

⁴ नआँ चिट्ठी तीतुस अम लगाडिंञ लिखो यडा, अलँग बना होड़ परभु ईसु मसीह थरे लंग बिसवास यडा, हेनाते अम ईञाअय अपन कोड़ा होपोन घयतेंञ मनो यडमिआँ। तीतुस भगवान अपा अवुर अबू रेनिय मसीह ईसु हनवरी अम लगड किरपा अवुर सान्ति ञँमुः महल रे दोहोनू।

केरेते रे तीतुस राः काम

⁵ बंचो केना काम मी पूरा लगड, अवुर सहर सहर राः कलीसिया ते, जेयसे इंञ लाय वडमिआँ, हेनेन घयते मुखियाकू चुनो लगड केरेते सहर रेंञ अटूड मिआँ।

⁶ चुनो कुआ हेंकू मुखियाकू कनय अलो बदी सकोः घियाःकू दोहोनू, कन्याँतकू हो मिनियेंड होड़कू दोहोनू, अवुर चोंडिजकू तकू हो ईसु थरे बिसवासेःकू दोहोनू, इंग आप राः टेबोः मनोकू दोहोनू, अवुर हेंकू लुच्‍चा लफंगा अलोकू दोहोनू।

⁷ अवुर अध्यछ भगवान राः सेवा लगड जिमेदार इदाना, हेनाते हेंय थरे कनर दोस अलो दोहोनू। अपन मन-मनी ते कामेअयू, हलिते धकोअयू, मतवाड़िअयू, ञेंञेंडयू, अवुर गलती काम केते पेयसा कामय लगड लोभियाअयू अलोय दोहोनू।

⁸ हेंय पार पोहनाकू मान मरजादयू, अवुर भला काम करेक चहोअयू, अवुर अपन हाथ गोड़ सकुर ते दोहो नयू, सही सोंच रखोअयू, अवुर हेंय पवितरायू, अवुर समझदारय दोहोनू।

⁹ हेंय ईसु मसीह राः बारे ते लाय वडिया हेना बढ़ियाँः खभेर रे बढ़ियाँ ते बिसवासेः हेनी दोहोनू, हेंडे हेंय एटाःकू हो सही सिक्छाय एमके कुतेय लाय बहालिकुआ, गलत सिक्छा एम हेंकू राः गलती लाय केते टेबोः जपनो कुआ हेनी दोहोनू।

¹⁰ कहेकि अखीर होड़कू सही सिक्छा राः बिरोध हेंकू, अवुर बहस उड़ो कू, अवुर एटाः कुकू लाय बहकोआ हेंकू इदान कुआ, खासकर नेकू खतनाःकू मधे हवे।

¹¹ नेकू घियाःकू गलत सिक्छा चेचेड अलोपे इकावाकू। कहेकि नेकू सीरिफ पेयसा कमाय लगड गलत सिक्छा लाय केकुते, सींड़ ओड़ाः ओड़ाः भर रेनकू बिसवास वरी कू बहको गोत्ते कुआ।

¹² केरेते रे दोहो एनय हेंकू रेनिय मियाँहोड़ कनहुनाय हें-डे दोहो एनकू होड़कू राः बारे तेय लाय तेडा, कि “नआँ रेनकू हरदम जलिया तेकू टेबोआ, अवुर नेकू बवुड़ केनकू जानवरकू घयते कनारा सही गलत मेने कू बुझोआ, कोढ़ियाअकू अवुर नेकू हरहाअकू।”

¹³ अवुर नआँ टेबोः सही मेते सीरित गिआ। हेनाते नेकू घियाःकू सही बिसवास वरी अलोकू बहकोः लगड कड़ाई ते डटो कू महल रेम दोहोनू,

¹⁴ नेकू एहूदिकू राः कथा कहानी रे धियान अलोकू लगोवे। अवुर ईसु मसीह राः सत वरी बहको केनकू राः टेबोः रेहो अलोकू धियाने।

¹⁵ भगवान राः नँजेर रे सोच बिचार तकू सुद्ध गिआ, हेंकू लगड कनारा चीज असुद्ध कोवाआ। जे जे बढ़ियाँः खभेर रे मेने बिसवासेःकू अवुर बेलूर होड़कू लगड सींड़ असुद्ध गिआ। कहेकि नेकू राः सोच बिचार पाप ते भरो केना, अवुर सही काम अवुर गलत काम मेने कू चिन्हो सकोआ।

¹⁶ हेंकू कहनियाँ भगवान दोले पपाड़िआ, लेकिन हेंकू राः चाले बेहवार तेकू पता जोमा। नेकू भगवान मेने कू पपाड़िआ। अवुर हेंकू मेरंग वआ काम कू कामा, अवुर नेकू भगवान राः टेबोः मेने चे-डेःकू हवे, नेकू कनारा बढ़ियाँ काम कारे लायिक कोवा कुआ।