दरसन 1 - Kodakuपरिचय 1 नआँ पोथी रे ईसु मसीह राः प्रकासन राः टेबोः हवे। नआँ अनेज रेनकू सेवेखियाकू हलिते होयाआ घटना तिःवाकू लगड भगवान तिःवड कुआ। अवुर हेंय अनेज रेनिय सरगदूत राः दोवारा ते खभेर कुलकेते नआँ प्रकासन अनेज रेनिय सेवेखिया एहुन्नाय लाय वडा। 2 एहुन्ना भगवान राः बचन राः बारे ते अवुर ईसु मसीह राः गोवाही, मतलोब जो कुछिय ञेंलतेडा, हेना राः गोवाहिय एमतेडा। 3 आसीसिय ञँमकेडा हेंयू जे नआँ भविस्यवाड़ी राः टेबोईय पड़होआ, अवुर हेंकू जे अँजोमेआँ कू, अवुर नआँ रे लिखो केडा टेबोः कू मनोआँ; कहेकि समय आय लिघियो यना। सातो गोटंग कलीसिया लगड संदेस 4 इंञ एहुन्ना हवे, इंञ आसिया परदेस राः सात गोटंग कलीसिया रेनकू लगड जोहार मेनते कहनी केपे तेंञ लिखो यडा। जो इदानिया, अवुरिय दोहो एना, अवुरिय मेजुः मेनते हेनी हनवरी अवुर हेंय राः सिहासन राः मड़ंग रे हाजिर दोहोना सात गोटंग आत्मा हनवरी, 5 अवुर ईसु मसीह हनवरी अपे किरपा अवुर सान्ति ञँमुऊ, हेंय बिसवास वय लायिक गोवाही, अवुर गोजकेनकू मेंडे रे पहिल ते जियो रिमकेनय, अवुर चँवदीस रेनकू राजाकू उपर रे राजेअय हवे। हेंय अबुय परेम बुआ, अवुर हेंय अनेज राः लोहू ते अबू पाप वरिय छडो केडबुआ। 6 अवुर अबू राजा, अवुर अनेज अपत भगवान लगड आजककू होय बनो केडबुआ; हें-नी राः महिमा अवुर सक्ति जुग जुग मेनते दोहोनू! आमेन। 7 अँजोम पे, हेंय लिंबिर सुदाय मेजुः मेनते, अवुर हेंय सगोर कुकू ञेंलेया, अवुर जे जे हेंय कू सोबोः तेडिया, हेंकू होकू ञेंलेया, अवुर चँवदीस रेनकू सींड़ जातकू हेंय राः चलते ते कुड़म तुकुकू गीला। सही मेते नेन घयते होयाआ। आमेन। 8 परभु भगवान, जो इदानिया, अवुरिय दोहो एना, अवुर मेजुः मेनाअय, अवुर जो सर्वसक्तिमान गिआयू; हेंय कहनी यडा, “ईनिंञ अल्फा अवुर ओमेगा हवे।” एहुन्ना मसीह दरसन रेय ञेंलतेडिया 9 इंञ एहुन्ना, जो अपे रेनिय भाई हवे, अवुर ईसु राः संकट, अवुर हेंय राः राज, अवुर धीरज राः साथ ते सहोवे लगड अपे सुदा सामिल इदानिञाँ; भगवान राः बचन अवुर ईसु मसीह राः गोवाही राः चलते ते इंञ पतमुस मेनते कू कहनी वआ टापू रेंञ दोहो एना। 10 इंञ परभु राः दिन रे पवितर आत्मा रेंञ मेजियानू, अवुर इंञ तयोम हँडे तुरही राः आवाज घयते बडे ते न याःतेंञ अँजो वडा, 11 “जो कुछ अम ञेंलियाडा, हेना पोथी रेम लिखो केते इफिसुस, इसमुरना, पिरगमुन, थुआतीरा, सरदीस, फिलेदिलफिया, अवुर लवदीकिया, नआँ सातों गोटंग कलीसिया तेम कूल गोत्ते।” 12 अवुर इंञ सुदाय टेबोः दोहो एनु, हेंय ञेंलेय मेनते तयोम हनिंञ तेरेज तेडा; अवुर मुँहियों केनते सोना राः सात गोटंग दीवाटिंञ ञेंलवाडा। 13 अवुर हेना दीवट मँझर रे होड़ होपोन घियाअय मियाँहोड़, कोड़ाहोनिंञ ञेंलवाडा, हेंय कटत अँगम मेनते जोंगोरा कपड़ाय तुसिंञ तडा, अवुर कुड़म तुरे सोना राः पट्टाय तोल तडा। 14 हेंय भोः अवुर उबतू पुँडिआ ऊन अवुर बरफ घयते फक फक पुँडी दोहो एना; अवुर मेडतू दिलकोआ सेंगेल घयते दोहो एना। 15 अवुर कटत सेंगेल वरी कू गरो उडूंग केडा पितल घयते चमकोः दोहो एनु; अवुर हेंय राः आवाज अखीर हड़हड़ोआ दाः घयते अँजोम एना। 16 अवुर जोम हन तीत रे सात गोटंग इपिल कुय सब तडा, अवुर अहत वरी बनर गतर धरवाना लसेरा तरवार घयते उडूंगुः दोहो एनु; अवुर भरेभर तीकिन कोःरे बेर तुतूरेड घयते आँख-मुरथन तू तुतूरेड दोहो एनु। 17 इंञ हेंयिंञ ञेंलतेड दो, कटत बँदेर रेंञ गोज लोजोर यनु, अवुर हेंय जोम हँडाः तीत ते छुवों केडिंञ तेय कहनी तेडा, “अलोम बो-रू; इंञ बोंहड़ित अवुर अखरित अवुर जिवाताय हवे; 18 इंञ गोजियान दोहो एनिञूँ, अब ञेंलेंञ मी, जुग जुग मेनते जीवातिंञ दोहोना; अवुर मिरतू अवुर अधोलोक राः खोलनी ईनिंञ थरेआ। 19 हेनाते जे टेबोः मी ञेंलकेडा, अवुर जे टेबोः होयाः तना; अवुर नआँ वरी तयोम ते होयाआ, हेना सींड़ मी लिखोता। 20 सात गोटंग इपिलकू जोम हन तींञ रेम ञेंलवड कुआ, अवुर सोना राः सात गोटंग दीवट मी ञेंलवाडा, हेना राः मतलोब हवे, सात गोटंग इपिलकू सातो कलीसिया रेनकू दूतकू हवे, अवुर सात गोटंग दीवट सात गोटंग कलीसिया हवे।” |
© 2022, Wycliffe India. All rights reserved.
Wycliffe Bible Translators, Inc.