फिलि 1 - Kodaku

¹ फिलिप्पी सहर रेनकू ईसु मसीह रे इदान कुआ हेंकू सगोर पवितर होड़कू, कलीसिया रेनकू अघुवाकू अवुर सेवेखियाकू, इंञ पवलुस ईसु मसीह रेनिय सेवेखिया, अवुर तीमुथियुस हनवरी नआँ चिट्ठी अपे लगाडिंञ लिखो यडा।

² अबू रेनिय भगवान अपा अवुर परभु ईसु मसीह राः किरपा अवुर सान्ति अपे ञँमुः महल रे दोहोनू।

पवलुस राः बिनती अवुर धन्यवाद

³ इंञ अपेंञ उहयर पे गँड़ी, ईञाअय भगवान धन्यावादिंञ ओवाया।

⁴ अवुर जब न अपे लगाडिंञ बिनतीआ दो हमेसा खुसी राः साथ तेंञ बिनतीआ।

⁵ हेनाते अपे भगवान राः बढ़ियाँः खभेर पे अँजोम तेड वरी, अबोह ले मेनते बढ़ियाँः खभेर मिरीज लगड पे गती वडिञाँ।

⁶ अवुर नआँ टेबोः रे ईञाः भरोसा इदाना, कि जे अपे थरे न बढ़ियाँ कामिय बोंहड़ी केडा, हें-नी ईसु मसीह मेजुआ हेना मेन दिन रेय पूराया।

⁷ अपे सींड़कू राः बारे ते ईञाः नआँ सोच सही गिआ, कहेकि अपे ईञाः मन रेपे बसो यना, जेहेल रेंञ रेहो भगवान दया वंञ तना, हेना रेपे गति वंञ तना, नें-डे भर मेने, बल्कि बढ़ियाँः खभेर लगड जबाब अवुर सबूत एम लगड, अपे भगवान दया वडिञाँ, हेना रेपे गति वंञ तना।

⁸ भगवान पपाड़िआ कि ईसु मसीह घयते अपे सींड़ कुंञ मया वपेआ। हेनाते ञेंल गिसन यडिञाँ।

⁹ ईञाः बिनती नआँ हवे कि अपे राः मया, गियान अवुर हरेक प्रकार राः समझ राः सँगे साँथ ते अवुर बढ़ो चलोऊ।

¹⁰ ताकि अपे राः एकदम बढ़ियाँ गिआ, हेना टेबोःपे जेर सकोऊ, अवुर मसीहा राः दिन अँगम सुद्ध पे दोहोनू, अवुर भगवान अवुर होड़कू अपे थरे कनर अलोकू दोस सकोऊ।

¹¹ अवुर भगवान राः महिमा अवुर बड़ाई होयाः महल रे दोहोन लगड, ईसु मसीह राः दोवारा ते ञँमुआ, हेना धरमी जीवन रेपे बढ़ो चलोऊ।

बढ़ियाँः खभेर अवुर मिरीजुआ ते पवलुस खुसीआ

¹² एगा भाईकू, इंञ चहोः तना कि अपे नआँ पे पपाड़िकोऊ, कि जो इंञ थरे बितो केना, हेना राः चलते ते बढ़ियाँः खभेर अनावुर मिरीज केना।

¹³ इंञ मसीहा राः चलते ते जेहेल रेञाँ, हेना कयसर राः गढ़ी रेनकू गोटा पलटनकू थरे अवुर एटाःकू थरे हो नआँ टेबोः मिरीज यना,

¹⁴ हेनाते अखीर भाईकू बल कू ञँमकेडा, हेंकू परभु थरे भरोसा केते भगवान राः बचन हिम्मत केते, निडर ते अवुर कू लाय यडा।

¹⁵ कुछ होड़कू एठेठ अवुर उपरा चड़ही ते मसीहा राःकू परचार यडा, लेकिन कुछ होड़कू बढ़ियाँ सोच तेकू परचार यडा।

¹⁶ नेकू पपाड़िआ कि इंञ बढ़ियाँः खभेर राः जबाब एम लगड जेहेल रेञाँ मेनाःते, मयाय तेकू परचारेआ।

¹⁷ लेकिन इंञ जेहेल रेञाँ ते अवुर बिपेत बू बड़होवय मेनते कू पसींद केते, कुछ होड़कू बडेंञ बनोः मेनते पसींद केते, मसीहा राः एठेड अवुर उपरा चड़ही तेकू परचारेआ, सही सोच ते मेने।

¹⁸ कनर घयू! बहाना ते चहे सही सही ते कनर घयते मसीहा राः ता परचारूः तनू। नआँ राः चलते ते इंञ खुस इदानिञाँ, अवुर इंञ खुस तेंञ दोनोहोना।

मसीह लगड जियोऊ

¹⁹ कहेकि इंञ पपाड़ी तना कि अपे राः बिनती राः दोवारा ते अवुर ईसु मसीह राः आत्मा राः सहेता तेंञ बंचोआ।

²⁰ नेन याःते ईञाः भरोसा अवुर असरा इदाना, कनर टेबोः रे एरोंञ लजियो एना, इंञ जीवातिंञ दोहोनू चहेंञ गोजुऊ, ईञाः देंह ते हमेसा मसीहा राः मान मरजाद होयाआ।

²¹ कहेकि इंञ जियोः रेदो मसीहा लगाडिंञ जियोआ, अवुरिंञ गोजुः रेदो फयदा गिआ।

²² अगर इंञ जीवातिंञ दोहोन रेदो, परभु राः बुता लगड फयदा इदाना, हेनाते इंञ मेनेंञ पपाड़ी तना करा हनिंञ पाँजेआ,

²³ ईञाः जीव दो बार भंग यना, मियाँ जीव दो चलोः मेनते लगोः तना, मसीहा सुदांञ सेनतन मेनू, कहेकि नआँ एकदम बढ़ियाँ गिआ।

²⁴ लेकिन जीवातिंञ दोहोन हेना, अपे लगड अखीर जरूरी इदाना।

²⁵ ईञाः पूरा भरोसा इदाना, इंञ जीवत तेंञ दोहोना, अवुर अपे सींड़कू सुदांञ दोहोना, ताकि अपे बिसवास रेपे मजबूतुऊ, अवुर बिसवास रे हँसी खुसी तेपे दोहोनू।

²⁶ इंञ अपे थरे फे-रिंञ मेजुः रे, ईञाः बारे ते मसीह ईसु थरे अवुर पे सयाँड़ुआ।

²⁷ कनर घयू अपे राः चाल बेहवार ईसु मसीह राः बढ़ियाँः खभेर राः लायिक दोहोनू, चहे इंञ मेजकोः तेंञ ञेंल पे चहे अलोंञ मेजुऊ, इंञ अपे राः बारे ते बस एहिंञ अँजोमे कि अपे एक मन ते अवुर एक गूट कोःते भगवान राः बढ़ियाँः खभेर एटाःकू बिसवासे लगड अखीर पे मेहनेत यडा मेनते।

²⁸ अवुर अपेकू बिरोध हेंकू मेने पे बोरो वकुआ, नआँ दो नेकू लगड नासुआ, अवुर अपे लगड बंचोअराः अगम हवे, नआँ भगवान हनवरी होयाआ।

²⁹ अपे मसीहा थरे बिसवासे लगड भर मेने, बल्कि हेंय राः चलते ते दुख सहो लगड हो बरदान ञँमकेना।

³⁰ अवुर जेयसे इंञ पे ञेंलवाडिञाँ, हेन घयते अपे होपे मेहनेते, अवुर हेनेन घयतेंञ मेहनेत यडा, हेना अबोह लेपे अँनाजोम यडा।