फिलेमोन 1 - Kodakuपरिचय 1 इंञ पवलुस हवे, इंञ ईसु मसीह राः खभेरिंञ लाय यडा ते जेहेल रेञाँ। अवुर तीमुथियुस भाई इंञ सुदाया, अलिंञ हनवरी नआँ चिट्ठी अले सहेता ओवा लेअय प्यारा फिलेमोन लगड लिंञ लिखो यडा। 2 अवुर अबू सुदा ईसु मसीह राः सेसेवाअय अरखिपुस, अवुर अफफिया बेहिन अवुर फिलेमोन ओड़ाः रेकू जवारुःआ कलीसिया रेनकू लगड होलिंञ लिखो यडा। 3 ईञाः अरजी हवे, भगवान अपाबू अवुर परभु ईसु मसीह राः किरपा अवुर सान्ति अपे ञँमुः महल रे दोहोनू। फिलेमोन राः परेम अवुर बिसवास 4 इंञ अम सींड़ पवितर होड़कू सुदा मेल परेम तेम दोहोन हेना अवुर अम ईसु मसीह थरेम बिसवास केडा, हेना चरचंञ अँजोम यडा। 5 हमेसा भगवान धन्यावादिंञ ओवाया, अवुर इंञ बिनतीः रे अम होंञ उहयर मिआँ। 6 कि अम बिसवास यडा हेना राः बारे ते लगन सेतेम लाये, ताकि मसीहा लगड अबू भला काम बू काम यडा हेना पूरा पूराम जे-रे। 7 कहेकि अमाः चलते ते पवितर होड़कू राः मन बहल यना, हेनाते फिलेमोन भाई, इंञ अमाः परेम राः चलते ते खुसी अवुर सान्ति अखीरिंञ ञँमकेडा। उनेसिमुस लगाडिय अरजिआ 8 हेनाते जो काम करेक इदाना, हेना अम करोवे लगड ककहनी इंञ ईसु मसीह रे पूरा हँक इदाना। 9 हेंडे रेहो इंञ अम थरे परेम सेतेंञ अरजीः तना, इंञ पवलुस हड़म यन रेहो ईसु मसीह राः चलते ते जेहेल रेञाँ। 10 जेहेल रे दोहोन तोलोग इंञ लाय वडिया, हेना खभेर रे उनेसिमुस बिसवास केडा, उनेसिमुस ईञाअय अपन कोड़ा होपोन घयगी अयू, हे-नी लगड ईञाः अम थरे अरजी हवे। 11 हेंय पहील अमाः कनर काम रेनिय मेनेय दोहो गना, लेकिन अब नेय अलँग बना होड़ लगड अखीर काम रेय मेजुआ। 12 उनेसिमुस ईञाः दिल राः टुटका घयगी अयू, नेय अम थरे फे-रिंञ कुलियाडिया। 13 इंञ बढ़ियाँः खभेर लाय राः चलते ते जेहेल रेञाँ, नेय अमाः बदला ते ईंञिय मददवा लगड इंञ सुदा रखोय मेनतेंञ चहोः दोहो एनु। 14 लेकिन इंञ अमाः इक्छा बिगर कनारा हो करोवे लगड मेनेंञ चहो गना, अवुर ईञाः जबर जस्ती ते अलो, लेकिन हँसी खुसी तेम दयाऊ। 15 कोई ठेकन दोहो एना, उनेसिमुस हमेसा अनाम सुदाय दोहोन लगड कुछ दिन अम वरिय अड़ी एना जहानू। 16 लेकिन अब वरी हरवाह राः रूप ते मेने, नेय हरवाह वरी हो एकदम बढ़ियाँअय भाई घयतेय दोहोनू, नेय इंञ दोंञ पनारेमिया, लेकिन अम अब वरी नेय अवुर मी परेमिया, कहेकि अब वरी अमाअय हरवाह भर न लगे, अमाअय भाई हवे। 17 सही मेते अम इंञ अपन गतिम मी मनो यडिंञ रेदो, नेंय हो अपन गति घयतेम मनोवियू। 18 अगर नेय अमाः कनाराय नोकसान केडू चहे कनारा मिमीड़ाः इदान रेदो, ईञाः ञुमू रेम रकब गोत्ते। 19 इंञ पवलुस अपन ती तेंञ लिखो यडा, नेय राः करजा इंञ एम गोत्तेआ; लेकिन न याःते कहेक जरूरी कोवाआ, ईञाः करजा अम उपर रे इदाना, हेना अनम हवे। 20 ए भाई, नआँ खुसी इंञ परभु रे अम हनवरी ञँमुऊ, मसीह रे ईञाः जीव मी हरा भरा। 21 इंञ अम थरे भरोसा केतेंञ लिखो यडा, ईञाः मी मनोवेआ अवुर इंञ पपाड़ी तना, जो कुछ करोवे लगाडिंञ कहनी वम तना, हेना वरी हो अम बगरा तेम करो वेआ। 22 अवुर मियाँटंग टेबोः इदाना, इंञ दोहोन लगड जघाम तयार हताड़ू। ईञाः असरा इदाना कि अपे राः बिनती अँजोम केते भगवान अपे थरेय अगेञाँ। अखरी जोहार 23 इपफरास, ईसु मसीय सेवा यडा ते इंञ सुदा जेहेल रेया। हेंय हनवरी अम लगड जोहार। 24 इंञ गति काम करता कू मरकुस, अरिस्तरखुस अवुर देमास अवुर लूका नेकू हनवरी हो अम लगड जोहार। 25 अबू रेनिय परभु ईसु मसीह राः किरपा अपे सींड़कू थरे दोहोनू। आमेन। |
© 2022, Wycliffe India. All rights reserved.
Wycliffe Bible Translators, Inc.