मरकुस 1 - Kodaku

बतिस्मा ए-मय एहुन्‍ना राः परचार

¹ भगवान होपोन, ईसु मसीह राः बढ़ियाँः खभेर राः बोंहड़ित न घयते होयाआ।

² एसायाह भविस्यवक्‍ता लिखो केड हेना पोथी रे इदाना, “अँजोम मी, ईञाअय दूत अम वरी मड़ंग तेंञ कुलियाडिया, हेंय अम लगड होरिय तयारा।

³ सुनहर ओत रे मियाँहोड़ होड़ गोहार यडा, परभु लगड होर पे तयारू, हेंय राः होर पे सोझ साझू।”

⁴ नेय खभेरिया बतिस्मा ए-मय एहुन्‍ना दोहो एना। नेय सुनहर ओत रे दोहो कोःतेय लाय वकू दोहो एनु कि सींड़कू पाप वरी मन पे मिड़ाऊ, हेंडे भगवान माफिय ओवा पेआ। अवुर पाप वरी मानिय मिड़ाः केडा मेनाआँ, सींड़कू पपाड़ी लगड बतिस्मा पे तिला, मेनतेय परचार तेडा।

⁵ गोटा एहूदी देस रेनकू अवुर एरुसलेम रे दोहोनकू सींड़कू हेंय थरे कू मेजेना। अवुर हेंय राः टेबोः अँजोम केते अपन अपन पाप कू मनो दोहो एनु, अवुर हेंकू जरदन जोड़ रे हेंय वरी बतिस्मा कू तिला तेडा।

⁶ हेंय राः कपड़ा ऊँट रोंवा राः दोहो एना। अवुर मयंग तुरे खाल राः बेलाटिय तोल दोहो एनु, अवुर हेंय फंफा फीरियाकू अवुर मधरासिय जोम दोहो एनु।

⁷ हेंय न याःतेय परचारे दोहो एनु, “इंञ तयोम तेय मेजुः तन हेनी, इंञ वरी अखीर सक्‍तिसाली गिआयू; इंञ दो हेंय राः जुता रसी लड़ा लायिक हो कोवाञाँ।

⁸ इंञ दो दाः ते बतिस्मांञ ओवापे तना, लेकिन हेंय पवितर आत्मा ते बतिस्माय ओवा पेआ।”

ईसु राः बतिस्मा अवुर परिक्छा

⁹ हेना वरी एक दिन राः दिन रे ईसु गलील जिला राः नसरेत सहर वरी मेजकेन ते जरदन जोड़ रे एहुन्‍ना वरी बतिस्माय तिला तेडा।

¹⁰ अवुर दाः वरिय उडूंग एना, तहाँ तुरेत्ते अगस जीजुः तोलोग अवुर पवितर आत्मा परेवाँ घयते अनेज थरे अगड़ुः तोलोगिय ञेंलवाडा।

¹¹ अवुर अगस वरी न याःते आवाज मेजेना, “अम ईञाअय दुलारय कोड़ा होपोनींञ हवे, इंञ अम थरे अखीर खुस इदानिञाँ।”

¹² हेना वरी तुरेत्ते ईसु पवितर आत्मा सुनहर ओत हनते कुलतेडिया।

¹³ अवुर हेंय सुनहर ओत रे चालीस दिन अँगम सयतान परिक्छा तेडिया; अवुर जंगली जानवरकू सुदाय दोहोन दोहो एनु, अवुर सरगदूतकू मेजकेन तेकू सेवा तेडिया।

ईसु सेसेवाय बोंहड़ी तेडा

¹⁴ अवुर हेरोदेस अंतीपास राजा, एहुन्‍नाय पकड़ो तेडा, तहाँ ईसु भगवान राः बढ़ियाँः खभेर लाय लगड गलील जिलाय सेनेना।

¹⁵ अवुर हेंय परचार तेडा, “समय पुरो यना, अवुर भगवान राः राज बँदे रे मेजियाना। मन पे मिड़ाऊ अवुर नआँ बढ़ियाँः खभेर रेपे बिसवासे।”

ईसु हकु ञेंड कुय राःतेडा

¹⁶ एक दिन राः दिन रे ईसु गलील राः समुन्धर अड़ी तेय चलोः दोहो एनु, तहाँ सिमोन बोहोत अन्दिरयास, नेकींञ बना होड़ मगिया समुन्धर रे जाल कींञ एनेज तोलोगिय ञेंल ञँम किञाँ; कहेकि हेंकींञ हकु ञेंड कींञ दोहो एना।

¹⁷ अवुर ईसु हेंकींञ थरेय कहनी तेडा, “इंञ तयोम तेबा मेजुऊ; इंञ अबा भगवान थरे होड़कू अग लगाडिंञ चेडबाआ।”

¹⁸ तहाँ हेंकींञ तुरेत्ते जाल चिली बगी वते हेंय तयोम तेकींञ सेनतेडा।

¹⁹ हेना वरी ईसु दमभर मड़ंग हनते तोरा केनते जबदी कोड़ा होपोन कींञ एकूब अवुर एहुन्‍ना, डोंगा रे जाल तँग तुँगो तोलोगिय ञेंल ञँमतेड किञाँ।

²⁰ तहाँ तुरेत्ते हेंकींञ होय राःतेड किञाँ। अवुर हेंकींञ बना होड़ अपत कींञ जबदी बबानिकू थरे डोंगा रेकींञ अटु तेडिया। अवुर अकींञ ईसु तयोम तेकींञ चलो एना।

ईसु मियाँहोड़ वरी भूतिय उडूंग तेडा

²¹ तहाँ ईसु चेलाकू सुदा कफरनहूम सहर कू सेनेना, अवुर तुरेत्ते हेंय सब्द राः दिन रे ईसु आराधना ओड़ाः रे भगवान राः टेबोईय चेडकू दोहो एनु।

²² अवुर होड़कू ईसु राः टेबोः अँजोम केतेकू अहचरज यनु। कहेकि हेंय एहूदी नियम चेचेडकू घयते मेने, लेकिन अधिकार राः साथ तेय चेडकू दोहो एनु।

²³ हेन तोलोग हेंकू राः आराधना ओड़ाः रे मियाँहोड़ होड़ दोहो एना, हेंय थरे भूत लगो तना, हेंय अहीज केनतेय कहनी तेडा,

²⁴ “ए नसरेत रेनिय ईसु, अम अले ची लगड मी सताप यडलेआ (अले राः अम थरे ची काम इदाना), अम अले नास ले लगड मी मेजकेना किदो? इंञ पपाड़ी तना अम ईया हवे, अम भगवान रेनिय पवितर होड़ हवे!”

²⁵ तहाँ ईसु दबेट केडिय तेय कहनी तेडा, “जपनो कोःमी; अवुर नेय वरिम उडूंग चलोऊ।”

²⁶ तहाँ भूत हेंय हिलो केडिय ते हेंय वरी अच्छा ते अहीज केनतेय उडूंग यनु।

²⁷ होड़कू ञेंलकेय तेकू अहचरज यनु। अवुर अनाकू अनाकू कहनी यडू, “न का घियाः टेबोः हवे? न दो नवाँः सिक्छा हवे! अधिकार राः साथ तेय कहनियाँ अवुर भूतकू हो नेय राः टेबो कू मनोवेआ।”

²⁸ अवुर तुरेत्ते ईसु राः चरचा सींड़ गलील जिला राः धरी कगर रे मिरीज यनु।

ईसु अखीर बेमारिया कुय चिकन तेडा

²⁹ हेना वरी ईसु तुरेत्ते आराधना ओड़ाः वरी उडूंग केनते एकूब अवुर एहुन्‍ना सुदा सिमोन अवुर अन्दिरयास ओड़ाः रेकू सेनेना।

³⁰ सिमोन हनहार जार लेनता डिया, अवुर होड़कू हेंय राः बारे ते तुरेत्ते ईसु थरे कू कहनी तेडा।

³¹ तहाँ ईसु हेंय बँदे रे सेनकेनते तीत रे सब केडिय तेय रिमतेडिया; अवुर हेंय राः जार अगड़ू यनु, अवुर हेंय रिमकेनते आदर भोजन कू लगाडिय भिड़ो यनु।

³² बेर डुबोः तोलोग होड़कू केय प्रकार ते हसु तनकू अवुर जे थरे भूतकू लगो तनकू, हेंय थरे कू अगतेड कुआ।

³³ अवुर सहर रेनकू सींड़कू राच रेकू जवार यनु।

³⁴ हेंय अखीर होड़कू जे-निरीत्ते हसु तनकुय चिकन तेडा। अवुर भूतकू लगोतन हेंकुय उडूंग तेडा, अवुर भूतकू मेनेय इकम टेबोः गडकुआ, कहेकि हेंय कू चिन्होंविय दोहो एनु।

मियाँहोड़ ते ईसु बिनती एना

³⁵ ईसु भिंसार तेय रिमेना, अवुर हेंय सुनहर ओत रे सेनकेन तेय बिनती एना।

³⁶ तहाँ सिमोन अवुर हेंय गतिकू हेंय छपा लगड कू उडूंग एना।

³⁷ हेंय कू ञँमतेडिया, तहाँ हेंय थरे कू कहनी तेडा, “सींड़कू अम कू छपा यडा।”

³⁸ तहाँ हेंय हेंकू थरेय कहनी तेडा, “दाऊ; अबू आस पास तआ बस्ती तेबू सेनुऊ, इंञ हेना तेहोंञ परचारेआ, कहेकि इंञ नेन लगाडिंञ मेजकेना।”

³⁹ हेना वरी हेंय सींड़ गलील जिला रे हेंकू राः आराधना ओड़ाः ते सेनकेन तेय परचारे अवुर भूतकुय उडूंग दोहो एनु।

ईसु कुड़गा रोगियाय चिकन तेडा

⁴⁰ मियाँहोड़ कुड़गा तनय ईसु थरेय मेजेना, अवुर हेंय थरे गोड़िय गिरो केनतेय अरजी एना, “अगर अम चहोः रेदो, इंञ मी सुद्ध सकोआ।”

⁴¹ हेना वरी हेंय थरे दया केनते तीतिय सुहरू तेडा, अवुर हेंय छुयों केडिय तेय कहनी तेडा, “इंञ चहोः तना, अम सूधुः मी।”

⁴² हेना वरी हेंय राः कुड़गा रोग तुरेत्ते छुटो यनु, अवुरिय चिकन तेडिया।

⁴³ तहाँ हेंय चेतवन केडिय ते, तुरेत्तेय कुलतेडिया।

⁴⁴ अवुर हेंय थरेय कहनी तेडा, “अँजोम मी, कनय थरे कनर मेनते अलोम लाय बेड़ायू, सींड़कू मड़ंग रे सखिया गोवाह होयाः लगड सेनकोःते आजक मी तिःवा। कुड़गा वरी चिकानुअय लगड भगवान मूसा थरे नियामिय एमतेडा, हेना राः अनुसार ते पुजम ए-मू।”

⁴⁵ लेकिन हेंय बहेर हँडे सेनकेनते नआँ टेबोः अखीरिय परचार तेडा, अवुर एतना मिरीज एना कि फेर ईसु सहर रेनकू होड़कू राः देखता देखती ते मेनेय सेन सको गना, हेनाते हेंय बहेर हनताः भदेड़ी तेय दोहो एना; अवुर चारियो खुट वरी होड़कू हेंय थरे कू मेजेना।