मत्ती 1 - Kodaku

ईसु रेनकू खुटी खनदानकू

¹ ईसु मसीह रेनकू खुटी खनदानकू नेकू हवे, ईसु मसीह दाऊद खुटी खनदान रेनिय हवे, अवुर अबराहम खुटी खनदान रेनिय हवे।

² अबराहम कोड़ा होपोन इसहाक अवुर इसहाक कोड़ा होपोन एकूब, एकूब कोड़ा होपोन एहूदा अवुर हेंय रेनकू मगत अवुर बोहोत एडकू होकू दोहो एना,

³ एहूदा कोड़ा होपोन कींञ जोरह अवुर फिरिस दोहो एना, (इंगत कींञ ञुमू तामार मेनते दोहो एना) फिरिस कोड़ा होपोन हिस्तोरोन, अवुर हिस्तोरोन कोड़ा होपोन एराम,

⁴ एराम कोड़ा होपोन अम्मीनादाब, अम्मीनादाब कोड़ा होपोन नहसोन, नहसोन कोड़ा होपोन सलमोन,

⁵ सलमोन कोड़ा होपोन बोअज, नेय इंगत ञुमू राहब मेनते दोहो एना। बोअज कोड़ा होपोन ओबेद, नेय इंगत ञुमू रूत मेनते दोहो एना। अवुर ओबेद कोड़ा होपोन ईसेय,

⁶ ईसेय कोड़ा होपोन दाऊद, नेय तयोम ते राजाय बनो एना। अवुर दाऊद कोड़ा होपोन सुलेमान, सुलेमान इंगत पहील उरियाह कन्याँ दोहो एना,

⁷ सुलेमान कोड़ा होपोन रहबाम, रहबाम कोड़ा होपोन अबियाह, अबियाह कोड़ा होपोन आसा,

⁸ आसा कोड़ा होपोन एहोसापात, एहोसापात कोड़ा होपोन जोराम, अवुर जोराम कोड़ा होपोन उजियाह,

⁹ उजियाह कोड़ा होपोन ओताम, ओताम कोड़ा होपोन आहाज, आहाज कोड़ा होपोन हिजकियाह,

¹⁰ हिजकियाह कोड़ा होपोन मनस्सिह, मनस्सिह कोड़ा होपोन अमोन, अवुर अमोन कोड़ा होपोन ओसियाह;

¹¹ इसराएल रेनकू होड़कू गुलामी बनो केकू ते बेबीलोन रेनकू अकू राः देस बेबीलोन कू गोःकू तोलोग ओसियाह, अकुन्याह, अवुर हेंय रेनकू भाई बंधू कुरेनिय अजत दोहो एना।

¹² गुलामी बनो केडकू ते बेबीलोन इदी केडकुः राः बाद रे अकुन्याह कोड़ा होपोन सालतिएल जनम एना, अवुर सालतिएल कोड़ा होपोन जरूब्बाबिल,

¹³ जरूब्बाबिल कोड़ा होपोन अबीहूद, अबीहूद कोड़ा होपोन इल्याकीम, इल्याकीम कोड़ा होपोन अजोर,

¹⁴ अजोर कोड़ा होपोन सदोक, सदोक कोड़ा होपोन अखीम, अखीम कोड़ा होपोन इलीहूद,

¹⁵ इलीहूद कोड़ा होपोन इलियाजार, इलियाजार कोड़ा होपोन मत्तान, मत्तान कोड़ा होपोन एकूब,

¹⁶ अवुर एकूब कोड़ा होपोन उसुफ, नेय मरियोम अपत कू दोहो एना। अवुर मरियोम वरी ईसु जनम एना, नेय मसीहा मेनतेय कू कहनी वया।

¹⁷ नेन घयते अबराहम वरी दाऊद अँगम चेवदह पिढ़ी होया एना, अवुर दाऊद वरी बेबीलोन रे गुलामी बनो केकू तेकू इदी तेडकुआ, हेना अँगम चेवदह पिढ़ी, अवुर गुलामी केनते बेबीलोन कू इदी तेडकुः वरी मसीहा जनम एन अँगम चेवदह पिढ़ी होया एना।

ईसु जनम एन हेना

¹⁸ ईसु मसीह राः जनम न घयते होया एना। ईसु इंगत मरियोम राः मला मठी उसुफ सुदा होया एना, तहाँ हेंकीञ जवारुः वरी पहिल ते, हेंय पवितर आत्मा राः सक्‍ति तेय असापति एना, अवुर असापति केनाय मेनाआ होड़कू पपाड़ियन कू।

¹⁹ मरियोम उसुफ थरे कू असी तडिया, अवुर उसुफ धरमी हो-ड़िय दोहो एना, अवुर मरियोम बदनामिय लगड मेनेय चहोः दोहो एनु, तहाँ हेंय कलेकल ते बगिवय मेनते पसींद तडा।

²⁰ हेंय नआँ टेबोईय पनासींदे दोहो एनु कि हेंय गितीज यनु, तहाँ परभु रेनिय सरगदूत सपन रेय मेजकेन तेय कहनी वडियू, “ओ दाऊद खनदान रेनिय उसुफ! मरियोम अम थरे अगेय लगड अलोम बो-रू, कहेकि हेंय लाज रे जे इदानिया, हेंय पवितर आत्मा हनवरिया।

²¹ हेंय चोंडीजिय जनामा, अवुर अम हेंय ञुमू ईसु मेनतेम रखोवे, कहेकि हेंय अनेज रेनकू होड़कू, अनाकू राः पाप वरिय उबर कुआ।”

²² जे टेबोः परभु अनेज रेनकू भविस्यवक्‍ताकू राः दोवारा ते पहील तेय कहनी तडा, हेना पूरा होयाः लगड नआँ सींड़ होया एना। हेंय भविस्यवक्‍ता न याःतेय कहनी तेडा,

²³ “अँजोम पे, मियाँहोड़ कुँवारिअय असापतिआ, अवुर मियाँटंग चोंडीजिय जनामा, अवुर हेंय इम्मानवेल मेनते कू ञुमूया,” हेना राः मतलोब हवे, भगवान अबू सुदाया।

²⁴ तहाँ उसुफ गितीज तन वरिय जगो एना, अवुर जेयसे परभु रेनिय सरगदूत हुकूम वडिया, हेन घयते मरियोम अनेज ओड़ाः रेय अगतेडिया।

²⁵ अवुर मरियोम चोंडिज अनायीनिय हँबुडिय मेन दिन, उसुफ हेंय सुदा मेनेय गितीज गना, अवुर चोंडिज होया एना, तहाँ उसुफ, ईसु मेनतेय ञुमू तेडिया।