एकूब 1 - Kodakuएकूब राः जोहार 1 इंञ भगवान अवुर परभु ईसु मसीह रेनिय सेवेखिया एकूब जोहार मेनतेंञ कहनी केपे ते नआँ चिट्ठी जतकतो केनकू, बारहो गोति रेनकू लगाडिंञ लिखो यडा। बिसवास अवुर बुद्धिमानी 2 एगा ईञाःकू भाईकू, अपे जे-निरीता परिक्छा रेपे पड़ोः रेदो, नआँ पूरा हँसी खुसी राः बात पे मनो, 3 कहेकि अपे नआँ पे पपाड़ी तना कि अपे राः बिसवास राः परख होयाः रे धीरज पयदाआ। 4 लेकिन धीरज दो अपन काम पे इकम पूरावा, ताकि अपे पूराऊ अवुर पक्काः पे, अवुर अपे थरे कनर टेबोः राः घटी अलो दोहोनू। 5 अगर अपे मेंडे कनय बुदही राः कमी इदान रेदो, हेंय भगवान थरेय असियू, अवुर हेंयिय ओवाया, हेंय बेगर दबदिबो ते सींड़कू हरग दिल तेय ओवा कुआ। 6 लेकिन हेंय बिसवास केतेय असियू, अवुर कनर अलोय संखायू, कहेकि संखाय हेंय जतकत हनते होय ते तूआ अवुर उछलोआ समुन्धर राः लहर घयगिअयू। 7 न घियाअय होड़ परभु कनाराय ओवाञाँ मेनते अलोय अँड़ीगू। 8 हेंय दुभेदिया होड़ हवे, अवुर अनेज राः गोटा जीवन रे डवाँडोलिय दोहोना। गरीब अवुर धनमान 9 जे बिसवासी भाई गरीब गिआ, हेंय नआँ टेबोः रेय सयाँड़ू कि भगवान राः नँजेर रेय धनी गिआ। 10 अवुर जे बिसवासी भाई धनमान गिआ, हेंय नम्रता ते दोहोन लगड खुसी तेय दोहोनू; कहेकि हेंय अवुर हेना धन बीर बहा घयते झड़ो जोमा। 11 कहेकि बेर उगो कोःते अखीर सीतोंग पड़ोः रे बीर गोज्जोमा, अवुर बहत हो झड़ो जोमा, अवुर हेना राः सोबहत हो उजड़ जोमा। हेन घयते धनमान हो अनेज राः होर ते से-ने से-ने ते धुड़ी रेय मिलोआ। लोभ अवुर परिक्छा 12 कनय बिसवासी परिक्छा रेय पड़ोः रे हेंय थीर तेय दोहोन रेदो, हेंय आसीसिय ञँमकेडा, कहेकि हेंय परिक्छा वरी खँडा कोःते परभु अनेज सुदा परेम रखो कुय जबान वडा, हेंय हेना जीवन राः मुकुटिय ञाँमा। 13 अवुर कनय होड़ पाप रे लोजोरुः राः परिक्छा मेजुः रे अलोय कहनियू कि भगवान हनवरिआ मेनते; कहेकि बुरा टेबोः ते भगवान राः परिक्छा मेने मेजुआ, अवुर न भगवान खुद कनाय नआँ घयतेय परिक्छा कुआ। 14 लेकिन सींड़ होड़कू अनाकू राः गलत इक्छा ओर गोःकुआ, अवुर परिक्छा रेकू पड़ो जोमा। 15 अवुर मोंह असापति कोःते पाप पयदाआ, अवुर हेना अखीर पाप बड़हो कोःते मिरतू पयदा गोत्तेआ। 16 हेनाते एगा ईञाःकू प्यारा भाईकू, अलोपे भोरुऊ। 17 जे-निरीता बढ़ियाँः बरदान अवुर सींड़ वरी बढ़ियाँः दान सरग हनवरी ञँमुआ, अवुर बेर, बँगो, इपिल कू बनो केडाय भगवान अपा हनवरी मेजुआ, अवुर हेना मेने बदलो बेड़ाआ, अवुर न अदल बदल राः चलते ते छहरा परोआ। 18 हेंय अनेज राः इक्छा ते अबू सत टेबोः राः दोवारा ते नवाँः जिनगिय ओवड बुआ, ताकि अबू भगवान बनो केडा सींड़ चीज वरि पहला फल बू होयाऊ। अँजोम केते पे करोवे 19 एगा ईञाःकू प्यारा भाईकू, अपे नआँ टेबोःपे पपाड़िकोऊ हरेक होड़कू अँजोमे लगड तयार पे दोहोनू, अवुर तवड़ ते अलोपे टेबोऊ, अवुर हलिते अलोपे धकोऊ। 20 कहेकि जो कुछ भगवान राः नँजेर रे ठीक गिआ, हेना सगोर अमाः खिसकट ते एरोम करो सको एना। 21 हेनाते सींड़ अपन जीव राः कचरा अवुर बयेर भाव राः बढ़ती बगी वते, भगवान राः हेना टेबोः नम्रता राः साथ तेपे अपनोवे, जोकि अपे राः हिरदेय रेकू मेर केडा, अवुर अपे राः आत्मा बंचो सकोआ। 22 लेकिन अपे हेना टेबोः ते से-नेःकू पे बनोऊ, सीरिफ अअँजोमकू बनो कोःते अपन आप अलोपे धोखाऊ। 23 कहेकि कनय होड़ भगवान राः टेबोईय अँजोमू, अवुर हेन घयते मेनेय से-ने रेदो, हेंय होड़, अनेज राः आँख मुँह अईना रेय ञें-लेआ, हेंय होड़ घयगी अयू। 24 हेंय अनानेज ञेंलके तेय चलो जोमा, तहाँ हेंय तुरेत्तेय लीड़िंञ गोत्तेआ कि इंञ काःतेंञ ञेंलुः दोहो एनु। 25 लेकिन कनय होड़ आजादी ए-मा पक्काआ धरम नियम रे धियाने महल रेय दोहोना, हेंय अनेज राः काम रे आसीसिय ञाँमा, कहेकि अँजोम केते मेनेय लिड़ीञेआँ, लेकिन हेन घयतेय करो वेआ। 26 अगर कनय अनानेज धरमी गिअंञ मेनतेय पसींदे, अवुर अनेज अलंग कब्जा रे मेनेय रखोवे रेदो, हेंय अपन मानिय धोखा यडा, हेंय राः भक्ति बेकार गिआ। 27 अबू रेनिय भगवान अपाबू राः मड़ंग रे सुद्ध अवुर निर्मल भक्ति नआँ हवे, कि अबू टुवर केनकू अवुर एकल केनकू दुख बिपेत रे सहेता बू ओवाकू, अवुर अपन आप संसार वरी निस्कलंक तेबू रखोऊ। |
© 2022, Wycliffe India. All rights reserved.
Wycliffe Bible Translators, Inc.