इबरानी 1 - Kodaku

भगवान अबू सुदा अनेज होपोन राः दोवारा तेय टेबोः केना

¹ भगवान पहिल जुग रे दादी पुरखाकू सुदा, केयनो एस अवुर अलग अलग तरिका ते भविस्यवक्‍ताकू राः दोवारा तेय टेबोः एना।

² अब अन्तिम दिन रे अबू सुदा, होपोन तू राः दोवारा तेय टेबोः केना, नेय सींड़ चीज राः हँकदारिय बनो केडिया, भगवान ने-नी राः दोवारा ते गोटा अगस अवुर दुनिया, अवुर जो कुछ हेना रे इदाना, हेना सगोरिय सिरजो केडा।

³ नेय भगवान राः महिमा राः चमक अवुर डिटोह हेंय राः स्वभाव राः रूप हवे, अवुर ने-नी गोटा चीज अनेज राः बचन तेय सम्भरो वेआ, जोकि हेना रे सक्‍ति इदाना। अवुर नेय अनेज राः बलिदान ते अबू राः पापिय साफ केते आदर अवुर अधिकार राः जघा रे महिमामय भगवान वरी जोम गतर रेय दुड़ूब केना।

⁴ हेनाते भगवान होपोन सरगदूतकू वरी होय बडे गिआ; कहेकि भगवान नेय ञुमुय ओवाडिया हेना ञुमू सरगदूत कुय ओवाडा ञुमू वरी हो महान गिआ।

भगवान होपोन सरगदूतकू वरी हो एकदम बढ़ियाँ गिआयू

⁵ कहेकि भगवान कनय सरगदूत थरे हो कबोह नआँ घयते बेगारिय कहनिआ, कहेकि धरमग्रंथ रे कभी कनय थरे नआँ घयते बेगारिय कहनिआँ, “अम इंञाअय होपोन हवे, तेसिंञ अम इंञ होपोन हवे मेनते सगोर कुंञ लाय वडकुआ।” भगवान न याःते होय कहनी केडा, “इंञ हेंय रेनिय अपातिंञ बनोआ, अवुर हेंय ईञाअय होपोनिंञ होयाआ।”

⁶ अवुर जब हेंय अगुल बेटा नआँ दुनिया रेय कुलतेडिया, तहाँय कहनिया, “भगवान रेनकू सींड़ सरगदूतकू हेंय कू आराधनाया।”

⁷ अवुर सरगदूतकू राः बिसेय ते नआँ घयतेय कहनिया, “हेंय अनेज रेनकू सरगदूतकू हो-यिय बनो कुआ, अवुर अनेज रेनकू सेवेखियाकू दिलकोआ सेंगेलिय बनो कुआ।”

⁸ लेकिन होपोन तू राः बिसेय तेय कहनिया, “ए भगवान अमाः सिहासन जुग जुग दोहोना, अमाः राज राः सासन सही सही गिआ।”

⁹ “अम धरम सुदा परेम अवुर अधर्म सुदा बयेर मी रखो तेडा; हेनाते भगवान, अमाअय भगवान, अमाःकू गतिकू वरी बगरा बहाली राः सुनूम ते आँमिय अभिसेक केडा।”

¹⁰ भगवान नआँ घयते होय कहनिया कि “ए परभु, तेह दिन रे धरतिम सिरजो तेडा, अवुर सरग अम ती राः कारीगरी हवे।

¹¹ नेंदोरा चीज दो नासुआ; लेकिन अम जुग जुग मेनतेम दोहोना, अवुर नआँ सींड़ कपड़ा घयते मरिआ।

¹² अम हेना चादर घयतेम मोरो वेआ। हेना जेयसे कपड़ा कू बदलोआ हेन घयतेम बदलो वेआ, लेकिन अम हें-नी हवे, अवुर अम जुग जुग मेनतेम दोहोना।”

¹³ भगवान कबोह कनय सरगदूत थरे नआँ घयते बेगारिय कहनिआ, “इंञ अमाःकू मुदेयकू, अम कटा पेंदी राः चवकी अनायीनिंञ बनो कू मेन दिन, अम ईञाः जोम गतर रेम दुड़ूबु।”

¹⁴ हेनाते सरगदूतकू सीरिफ सेसेवाकू आत्मा कू न लगे किदो? जोकि उबारुः हेंकू सेवा लगड भगवान कुल कुआ?