गलातिकू लगड पवलुस परेरित लिखो केडा चिट्ठी 1 - Kodaku

पवलुस राः जोहार

¹ इंञ पवलुस परेरित अवुर इंञ सुदा इदान कुआ हेंकू सींड़ भाईकू हनवरी, नआँ चिट्ठी गलातिया राः कलीसिया रेनकू लगाडिंञ लिखो यडा।

² इंञ होड़कू हनवरी चहे होड़कू राः दोवारा ते बेगारिंञ मे-जा, लेकिन इंञ ईसु मसीह अवुर भगवान अपा हनवरिंञ मेजकेना, हेंय ईसु मसीह गोजतन वरिय जियो केडिया।

³ भगवान अपा अवुर अबू रेनिय परभु ईसु मसीह किरपा वपे अवुर सान्तिय ओवापे।

⁴ ने-नी परभु ईसु भगवान अपा राः इक्छा घयते, नआँ जुग रे पाप राः दुनिया रेबू दोहोन तना, हेना वरीय छडोबू मेनते दो, अबू राः पाप राः चलते ते अनेज राः जीविय एमतेडा।

⁵ भगवान राः स्तुति अवुर बड़ाई जुग जुग होयाऊ। आमेन।

बढ़ियाँः खभेर मिनियेंटंग गिआ

⁶ इंञ दोंञ अहचरज यना, जे अपे मसीहा राः किरपा तेय राःतेड पेआ, हेंय हलिते बगी वयते एनेट एटाः खभेर हनते पे चलोः तना।

⁷ सही मेते एटाआ बढ़ियाँः खभेर दो हय्ये कोवाआ। हे कुछ होड़कू इदान कुआ, हेंकू भरम रेकू डलो यडपेआ, अवुर मसीहा राः बढ़ियाँः खभेर उजाड़े मेनते कू चहोः तना।

⁸ जे अले बढ़ियाँ खभेर ले लाय वडपेआ, हेना छोड़ ते कनर एनेटाः खभेर कू लाय वपे रेदो, हेंकू भगवान सजाय ओवा कुआ, भले न अले चहे कनय सरगदूत दोहोनू।

⁹ जेयसे अले पहील तेले कहनी केडा, हेन घयते इंञ फेरिंञ कहनी यडा; जे बढ़ियाँः खभेर रेपे बिसवास केडा, अगर कनाय अवुर एनेट एनेटाआ खभेर कू लाय वपे रेदो, हेंकू भगवान सजाय ओवा कुआ।

¹⁰ अब इंञ भगवान खुस मेनतेंञ कोसीस यडा किदो होड़कू? इंञ भगवान खुस मेनतेंञ चहोः तना, होड़कू मेने। अगर इंञ निहों मेनते होड़कू खुस मेनतेंञ कोसीस यड रेदो, इंञ मसीह रेनिय हरवाह एरोंञ बनो एन मेनू।

पवलुस काःते परेरितिय बनो एना

¹¹ एगा भाईकू, इंञ लाय वडपेः हेना बढ़ियाँः खभेर होड़कू बनो केडा घयते कोवाआ, इंञ चहोः तना नआँ अपे पपाड़िकोःपे।

¹² नआँ इंञ कनय होड़ वरी बेगारिंञ ञाँमा, अवुर न कनय कू सिखो पड़हो केडिञाँ, लेकिन नआँ खुद ईसु मसीह वरिंञ ञँमकेडा।

¹³ पहील एहूदी धरम रे ईञाः जिनगी काःते दोहो एना, हेना राः बारे तेपे अँजोम केडा; इंञ ची घयते भगवान राः कलीसिया रेनकुंञ ससीत कू दोहो एनु, अवुरिंञ ञेंड गोजकू दोहो एनु।

¹⁴ इंञ उमेर कू एहूदिकू मेंडे, इंञ एहूदी धरम मनो लगड मड़ंग रेंञ दोहो एना, अवुर ईञाःकू पुरबुजकू राः रीति रिवाज मनो लगड अखीर ओसताजिंञ दोहो एना।

¹⁵ लेकिन भगवान, हेंय इंञ ईगंञ लाज वरिय चुनो केडिञाँ, अवुर अनेज राः किरपा तेय राःकेडिञाँ,

¹⁶ हेंय अनेज होपोन इंञ थरेय देखारिय लगड बढ़ियाँ वडिया, ताकि इंञ होपोन तू राः बढ़ियाँः खभेर अनजातकू राः बीच रेंञ परचारे; अवुर नआँ लगड इंञ कनय होड़कू थरे सलाह मेनेंञ असी गडा।

¹⁷ इंञ वरी मड़ंग ते परेरितकू बनो एना, हेंकू सुदा जुमोः लगड एरुसलेम हो मेनेंञ सेन गना, बल्कि इंञ तुरेत्ते अरब देस हनतेंञ चलो एना, हेना वरी फेर दमिस्क सहर रेंञ मिड़ाः मेजेना।

¹⁸ फेर इंञ तीन बरिस बितो केन रे केफा सुदा जुमोः लगड एरूसलेमिंञ सेनेना, अवुर हेंय सुदा इंञ पन्दरह दिन अँगामिंञ दोहो एना।

¹⁹ इंञ हेना रे कनय एटाः परेरितकू सुदा मेनेंञ जुमो गना, परभु बोहोत एकूब सुदा भरिंञ जुमो एना।

²⁰ इंञ जे-नांञ लिखो वपे तना, हेना रे कनर जलिया कोवाआ, इंञ भगवान ञेंलिया डिञाँयू।

²¹ हेना वरी तयोम ते इंञ सीरिया अवुर किलिकिया राः परदेस रेंञ सेनेना।

²² हेना तोलोग अहूदिया जिला राः कलीसिया रेनकू, मसीहा थरे कू बिसवास तड हेंकू, इंञ कबोह मेने कू ञेंलगाडिञाँ।

²³ लेकिन कू अँजोम ईरे दोहो एनु, कि जे होड़ पहीलिय ससीत बू दोहो एनु, अब हेंय हेनेन धरम राः बढ़ियाँः खभेरिय परचार यडा, हेंय मड़ंग ते नआँ मेटियोवे लगाडिय सँबह तना।

²⁴ अवुर हेंकू ईञाः चलते ते भगवान राःकू महिमा तेडा।