इफिसिकू लगड पवलुस परेरित लिखो केडा चिट्ठी 1 - Kodaku

पवलुस राः जोहार

¹ इंञ पवलुस हवे, भगवान राः इक्छा ते इंञ ईसु मसीह रेनिय परेरित हवे, इफिसुस सहर रे पवितर होड़कू इदान कुआ, नेकू ईसु मसीह थरे बिसवास केते हेंय तयोम तेकू से-नेआँ, हेंकू लगड नआँ चिट्ठींञ लिखो यडा।

² अपे लगड अबू रेनिय भगवान अपा अवुर परभु ईसु मसीह राः किरपा अवुर सान्ति ञँमुः महल रे दोहोनू।

मसीह रे आत्मिक आसीस

³ अबू रेनिय परभु ईसु मसीह अपत, भगवान राः धन्यवाद होयाऊ। हेंय अबू मसीहा राः दोवारा ते सरग राः जघा रे जे-निरीता आत्मिक आसीसिय ओवड बुआ।

⁴ जेयसे कि भगवान अबू चँवदीस बनोः वरी पनाहिल ते मसीहा सुदा मियाँटंगुः लगाडिय चुनो केडबुआ कि अबू हेंय राः नँजेर रे पवितर अवुर निरदोस बू दोहोनू। कहेकि भगवान अबुय परेम बुआ,

⁵ अवुर हेंय पसींद तडा कि अनेज राः मन ते ईसु मसीह राः दोवारा ते, अनेज रेनकू होपोन कुराआ रूप तेय अपनो बू लगड अखीर पहील तेय चुनो तडबुआ,

⁶ कि हेंय अखीरिय किरपा वडबुआ ते हेंय राः बू स्तुति, नआँ किरपा हेंय अबू अपन दुलारय होपोन तू राः चलते ते सेथिया तेय ओवड बुआ।

⁷ अबू मसीह रे हेंय राः लोहू राः दोवारा ते पाप वरिय छडो केडबुआ, मतलोब हें-नी राः किरपा राः धन राः अनुसार ते अबू राः पाप वरी माफी ञँमकेना।

⁸ हेंय अबू बगरा तेय दया वडबुआ, अवुर समझोः लगड सींड़ राः गियान अवुर बुद्धि बगरा तेय ओवड बुआ।

⁹ जेयसे कि मसीहा राः दोवारा ते अनेज राः भेद अबुय देखर वडबुआ।

¹⁰ भगवान राः पसींद, ए दोहो एना कि ठीक समय मेजुः रे सरग राः अवुर चँवदीस राः सींड़ चीज मसीहा राः हाँथ गाँथ रेय ए-मेआ।

¹¹ भगवान अनेज राः इक्छा राः निरलेय राः अनुसार ते सींड़ चीजिय करो वेआ, अबू हो हेंय पसींद तड घयते, मनाड़ंग ते ईसु मसीह राः चलते तेय चुनो केडबुअते, हेंय रेनकू होड़कू बनोः राः हँक बू ञँमकेडा,

¹² ताकि अले मड़ंग ते मसीहा थरे ले असरा केना, हेंकू हेंय राः महिमा राः स्तुति राः कारन ले बनोऊ।

¹³ अवुर मसीह रे अपे थरे हो जब अपे सत राः टेबोःपे अँजोम केडा, जो अपे उबारा बढ़ियाँः खभेर हवे, अवुर अपे हेना रेपे बिसवास केडा ते, जबान तडा पवितर आत्मा राः छाप लगो केना,

¹⁴ अवुर अनेज रेनकू पूरा पूरा छुटकारा अनायिन ञँमुः मेन दिन। नआँ पवितर आत्मा अबू हँकदार बनोः लगड बयाना राः रूप तेय ओवड बुआ। हेना राः चलते ते होड़कू हेंय राः महिमा राःकू स्तुतिआ।

इफिसि रेनकू लगड पवलुस राः बिनती

¹⁵ हेनाते जबले इंञ परभु ईसु थरे अपे राः बिसवास अवुर सींड़ पवितर होड़कू पे मया वाः हेनांञ अँजोम केडा,

¹⁶ इंञ अपे लगड भगवान हमेसांञ धन्यावाद वयताना, अवुर इंञ बिनतीः रे अपेंञ उहयर पेआ।

¹⁷ इंञ हमेसांञ बिनतीआ कि अबू रेनिय परभु ईसु मसीह रेनिय भगवान, महिमा रेनिय अपा अपे गियान अवुर परकास राः आत्माय ओवापे, ताकि अपे हेंय बढ़ियाँ तेपे पपाड़ी सकोऊ।

¹⁸ ईञाः बिनती हवे, कि अपे मन राः मेड जीजुऊ, अवुर अपे ची असरा तेय राःकेड पेआ, हेना पे पपाड़ी सकोऊ, अवुर अनेज रेनकू पवितर होड़कू हाँकिय ओवा कुआ, हेना महिमा राः धन तीमिन बडे गिआ हेना होपे पपाड़ी सकोऊ।

¹⁹ अवुर हेंय राः सक्‍ति अबू बिसवासेःकू लगड तीमिन बडे गिआ। नआँ सींड़ हेंय राः हेना सक्‍ति राः काम राः अनुसार तेआ,

²⁰ जोकि हेंय मसीह रेय पूरा केडा, जब भगवान हेंय गोजतन वरिय जियो केडिय ते अनेज वरी जोम गतर सरग राः जघा रे,

²¹ जे-निरीता नियम, हाँथ गाँथ, जँगड़, अवुर पद, अवुर सगोर ञुमू वरी उसुल गिआ, अवुर हेना नआँ जुग रे भर मेने, लेकिन मेजुः तना जुग रेहो कू ञुमूया, हेंयिय दुड़ूब केडिया।

²² अवुर भगवान सींड़ चीज हें-नी राः हाँथ गाँथ रेय एमकेडा, अवुर जेयसे भोः गोटा देंह चलो वेआ, हेन घयते सगोर चीज रे कलीसिया लगड मुखियाय चुनो केडिया,

²³ अवुर कलीसिया हेंय राः देंह हवे। अवुर नेय अनेज राः पूरा सक्‍ति ते कलीसियाय भरोआ, अवुर सीड़कू सगोर याःते जीवन ओवा कुअय ने-नी हवे।