कुलु 1 - Kodaku

¹ इंञ पवलुस भगवान राः इक्छा ते ईसु मसीह रेनिय परेरित हवे अवुर इंञ तीमुथियुस भाई सुदा

² कुलुस्सी सहर रे दोहोनकू मसीह रे पवितर अवुर बिसवासी भाईकू लगड नआँ चिट्ठिलिंञ लिखो यडा। अबू रेनिय भगवान अपा राः किरपा अवुर सान्ति अपे ञँमुः महल रे दोहोनू।

धन्यवाद अवुर बिनती

³ अपे लगड रोज दिन लिंञ बिनतिआ, हेना तोलोग परभु ईसु मसीह अपत मतलोब भगवान धन्यवाद लिंञ ओवाया।

⁴ कहेकि मसीह ईसु थरे पे बिसवास केड हेना, अवुर सींड़ पवितर होड़कू पे मया वआ, हेनालिंञ अँजोम केडा।

⁵ नआँ भगवान अपे लगड सरग रे दोहो केडा, हेना असरा राः चलते ते ना याःते होया केना, न राः बारे ते अपे बढ़ियाँः खभेर राः सत टेबोः रेपे अँजोम केडा।

⁶ नआँ बढ़ियाँः खभेर पे अँजोम तेड तोलोग भगवान राः किरपा राः बारे ते अपे सही मेते पे जेर तेडा, अवुर अपे राः जीवन बदलो केडा, अवुर मिरीज चलो एना, हेन घयते गोटा चँवदीस रे काम यडा, अवुर मिरीज चलोः तना।

⁷ ने-ना राः सिक्छा अपे अलिंञ सहेताय ओवा लिञाँ इपफरास गतिलिंञ वरी पे ञँमकेडा। हेंय अलिंञ अखीर लिंञ मया वया, अवुर नेय अपे थरे अलिंञ कुलकेडिया, नेय ईमानदारी ते मसीहा राः सेवाय सेवा यडा।

⁸ पवितर आत्मा राः सहेता ते एटाःकू पे परेम हेनाय लाय वडलिञाँ।

⁹ हेनाते नआँ जे चेका लिंञ अँजोम केडा, अपे पवितर आत्मा राः सहेता ते ञँमुआँ भगवान राः गियान, अवुर हेंय राः मरजी जे-रे लगड अवुर बुद्ही ञँमुः लगड हमेसा लिंञ अरजी बिनतीः तना।

¹⁰ ताकि अपे राः चाल बेवहार परभु बेसवा लायिक दोहोनू, अवुर हेंय सगोर याःते खुस पे रखोवियू, अवुर अपे जे-निरीता बढ़ियाँः काम पे कामू। अवुर भगवान राः गियान रेपे बढ़ो चलोऊ।

¹¹ अवुर हेंय राः महिमा राः सक्‍ति राः अनुसार ते जे-निरीता बल तेपे बढ़ो चलोऊ, ताकि अपे बिपेत मेजुः रे खुसी ते धीरज पे सबता, अवुर सगोर टेबोःपे सहो सकोऊ,

¹² अवुर हमेसा अपा धन्यवाद पे ओवाया। हें-नी अबू सरग राः इंजोत रे पवितर होड़कू सुदा हँक ञँमुः लायीकिय बनो केडबुआ।

¹³ ने-नी अबू सयतान राः कब्जा वरिय छडो केडबुते, अनेज रेनिय दुलर कोड़ा होपोन राः राज रेय इदी केडबुआ।

¹⁴ ने-नी राः चलते ते अबू छडो केना, मतलोब पाप राः माफी ञँमकेना।

मसीहा सींड़कू वरिय बडे गिआ

¹⁵ नेय दो मेने ञेंलुअय भगवान राः रूप हवे अवुर सींड़ चीज सिरजो केड वरी मड़ंगाअय हवे, अवुर सींड़ चीज राः हँकदार इदानिया।

¹⁶ कहेकि ने-नी राः दोवारा ते सींड़ चीज सिरजो केना, सरग राः चहे चँवदीस राः, ञेंलुआ चहे मेने ञेंलुआ, राजेःकू, अधिकारिकू, सींड़ चीज ने-नी राः चलते ते अवुर ने-नी लगाडिय सिरजो केडा।

¹⁷ नेय सींड़ चीज सिरजो तेड वरी पहील तेय दोहो एना, अवुर ने-नी राः सक्‍ति ते सींड़ चीज टेको केना।

¹⁸ अवुर ने-नी राः देंह मतलोब कलीसिया राः भोः हवे, ने-नी बोंहड़ित हवे, अवुर गोजकेनकू मेंडे रे पहील तेय जियो रिमकेना, ताकि सींड़ टेबोः रे ने-नी मुखिया बनोऊ।

¹⁹ कहेकि ने-नी थरे सींड़ भरपूरी दोहोन लगड अपा बेस वडिया।

²⁰ अवुर नेय कुरूस रेय बोहो तेडा लोहू ते मेल मिलाप केते, सींड़ चीज ने-नी राः चलते ते भगवान अनेज सुदाय मेल मिलाप गोत्तेडा, चहे सरग राः चहे चँवदीस राः।

²¹ अपे पहील भगवान वरी पे अलग यन दोहो एनु, अवुर खराब काम अवुर खराब सोंच राः चलते ते हेंय रेनकू मुदेय कुपे दोहो एना।

²² भगवान अपे अनेज बँदे रे पवितर अवुर बिना दाग, अवुर निरदोस बनो केपे तेय अगपे मेनते दो, अब मसीहा राः देंह राः मिरतू राः चलते ते अपे होय मेल केडपेआ।

²³ अगर अपे बिसवास राः नेंव रेपे बनो बगी कोऊ, अवुर अपे बढ़ियाँः खभेर पे अँजोम केडतेपे असरा एना, हेना असरा अलोपे बगीवा, हेना राः परचार अगस राः पेंदी रे इदान कुआ हेंकू थरेंञ परचार तेडा, अवुर इंञ पवलुस हेना बढ़ियाँः खभेर रेनिय सेवेखियांञ बनो केना।

कलीसिया लगड पवलुस राः बुता

²⁴ अब इंञ अपे लगड दूखिंञ रिमियाडा, हेना राः चलते ते बहालिंञ मनो यडा, अवुर मसीहा राः देंह मतलोब कलीसिया लगड, मसीहा जो कुछ कलेसिय सहो तेडा, हेन घयते इंञ हो हेना कलेस रे रोज दीनिंञ मेसाः तना।

²⁵ अवुर इंञ भगवान राः इक्छा राः अनुसार ते, अपे लगाडिय जिमा वडिञाँ, हेना बढ़ियाँः खभेर रेनिय सेवेखियांञ बनो केना, ताकि इंञ भगवान राः टेबोः पूरा पूरांञ परचारे।

²⁶ नआँ भेद केय जुग वरी अवुर केय पिढ़ी रेनकू वरी उकू तना, लेकिन अब हेंय अनेज रेनकू पवितर होड़कू थरेय देखर केडा।

²⁷ नआँ भगवान अनेज रेनकू होड़कू थरेय देखारे लगाडिय चहोः दोहो एनु, हेना भेद राः सत तीमिन गहीर गिआ। नआँ भेद गयेर एहूदिकू लगड हो हवे। अवुर हेना भेद न हवे, मसीहा अपे थरेय दोहोना, अवुर भगवान राः महिमा बू ञाँमा, हे-ना अबू राः मियाँटंग असरा इदाना।

²⁸ अले सींड़ होड़कू मसीहा सुदा मियाँटंग यन हेंकू, भगवान थरे पक्‍का केकू ते हजीर कू लगड, ने-नी मसीहा राः ले परचार केते सगोर होड़कू ले चेतवन कुआ, अवुर अले ञँमकेडा बुद्ही ते सींड़ होड़कू ले चेडकुआ।

²⁹ हेनाते इंञ पूरा बल लगो केतेंञ मेहने तेआ, अवुरिंञ कोसिसेआ, अवुर नआँ बल मसीहा वरिंञ ञाँमेआँ, अवुर ईंञिय बहालिञाँ।