3 एहुन्‍ना 1 - Kodaku

परिचय

¹ इंञ कलीसिया रेनिय सयाँहोड़ प्यारा गयुस लगड नआँ चिट्ठींञ लिखो यडा। नेय इंञ सीरित्तेंञ परेमियाँ।

² एगा प्यारा गयुस, ईञाः बिनती हवे कि जेयसे अम आत्मिक जीवन रेम बड़होः तना, हेन घयते हर बात रेम बड़हो चलोऊ अवुर भला चंगा तेम दोहोनू।

³ कुछ मसीही भाईकू मेजकेन ते अम सत ते सही मेतेम सेन यडा, हेना गोवाहकू एमतेडा, तहाँ अखीर जीविंञ बहल यनु।

⁴ नआँ वरी बड़कर इंञ लगड खुसी राः बात कनर एरो होया सको एना, इंञ नअँञ अँजोमा कि ईञाःकू चोंडिजकू सत तेकू सेन यडा।

एहुन्‍ना गयुसिय बडेय वआ

⁵ एगा प्यारा गयुस, जो कुछ अम अनजान भाईकू लगड मी करो यडा, हेना अम ईमानदारी तेम करो यडा।

⁶ नेकू कलीसिया रेनकू राः मड़ंग रे अम परेम तेडकुआ, हेना राः गोवाहिकू एमतेडा, जेयसे भगवान रेनकू होड़कू लगड जरूरी इदाना, हेन घयते अम बिदा कू रेदो ठिकेम करो यडा।

⁷ कहेकि नेकू मसीहा राः सेवा लगड कू उडूंग केना, अवुर आनजातकू वरी कनर मेने कू तिलाआ।

⁸ हेनाते नेकू घियाःकू आदर इजेत करेक चही, ताकि अबू हो भगवान राः सत टेबोः लगड मियाँ तेबू काम सकोऊ।

दियुतिरिफेस अवुर दियुतिरियुस

⁹ इंञ कलीसिया लगड कनारांञ लिखो तडा, लेकिन दियुतिरिफेस हेंकू वरी बडेअय बनोः मेनतेय चहोः दोहो एनु, हेंय अले राः टेबोः मेनेय मनोवेआ।

¹⁰ हेनाते इंञ मेजुः रे हेंय जे कामिय काम यडा हेनांञ कनाहनी वया। हेंय अबू राः बिसेय ते अलतु फलतू टेबोईय उडूंग यडा, अवुर नआँ टेबोः रेहो मेनेय सन्तोक गनते, हेंय भाईकू मेनेय अपनो कुआ। अवुर जे भाईकू भाई कुकू अपनो मेनते कू चहोआ, हेंकू होय मँदा कुआ, अवुर हेंकू कलीसिया वरिय उडूंग गोत्ते कुआ।

¹¹ एगा प्यारा गयुस, बुराई अलो भलाई काम मी नकालू; जे होड़ भलाई कामिय कामा, हेंय भगवान हनवरिया, लेकिन जे बुराई कामिय कामा, हेंय भगवान बेगारिय ञें-ला।

¹² दियुतिरियुस राः बिसेय ते सींड़कू, अवुर भगवान राः सत हो गोवाही एमकेडा, अवुर अले हो गोवाहिले एमियाडा, अवुर अम पपाड़िआ कि अले राः गोवाही सीरित गिआ।

अखरी जोहार

¹³ इंञ अम लगड लिखेक दो बहुत कुछ दोहो एना, लेकिन सियाही अवुर कलम ते लिखेक मेनेंञ चहोः तना।

¹⁴ लेकिन ईञाः असरा हवे कि अम सुदा हलीतेंञ जुमोआ, तहाँ अलंग समना-समनी रे लंग टेबोआ।

¹⁵ अमाः मन रे सान्ति दोहोनू। नआँ रेनकू गतिकू अम जोहार मेनते कू कहनी वम तना। हेना रेनकू गतिकू ञुमू ञुमू ते जोहार मेनतेम कहनी वकू।