2 तीमुथि 1 - Kodaku

पवलुस राः जोहार

¹ इंञ पवलुस हवे, भगवान इंञ अनेज राः मरजी ते ईसु मसीह लगाडिय चुनो केडिञाँ। जे जे ईसु मसीह थरे कू बिसवासेआ, हेंकू जीवन ओवाकू लगड भगवान जबान केडा, हेना राः बारे ते होड़कू लाय वकू लगड भगवान ईंञिय कुलकेडा।

² तीमुथियुस ईञाअय दुलर बेटा घयगी अमू; अम लगड नआँ चिट्ठिंञ लिखो यडा। तीमुथियुसू, ईञाः अरजी हवे, कि भगवान अपा अवुर अबू रेनिय परभु ईसु मसीह हनवरी अम किरपा अवुर दया अवुर सान्ति ञँमुः महल रे दोहोनू।

धन्यवाद अवुर टेबोः बहल कुआ हेना

³ इंञ सेवा यडिया हेनी भगवान, जेयसे ईञाःकू दादी पुरखाकू सेवा तेडिया, हेन घयते इंञ हो सुद्ध मन तेंञ सेवा यडिया। इंञ कनर घय तोलोग बिनतीः रे आँमिंञ उहयर मिआँ अवुर भगवान धन्यवादिंञ ओवाया।

⁴ आँमिंञ अटु तोलोग अखीर मी ईयाम एना, हेना उहयर केते जुमोः मेनते दो सींञ ञींदिंञ उहयर यडमिआँ। कनर याःते जुमो एन रेदो जीविंञ बहल एन मेनू।

⁵ अम ईसु मसीह थरे बढ़ियाँ तेम बिसवास यडा, हेना इंञ उहयर यडा, अवुर इंञ पपाड़ी तना, जेयसे पहील लोईस ननीम अवुर अम इंगम उनिके बढ़ियाँ तेकींञ बिसवास तेडा, हेन घयते अब अम होम बिसवास यडा।

⁶ हेनाते अम उहयारे लगाडिंञ लाय वम तना, इंञ भोःमी रे छुवों केते बिनतीः तोलोग भगवान ओवड मिआँ हेना बरदान राः अनुसार ते बढ़ियाँ तेम कामू।

⁷ भगवान अबू बोर हेना आत्मा बेगारिय ओवा बुआ, बल्कि भगवान राः काम लगड आत्मा अबू सक्‍ति ओवा बुआ, अवुर एटाःकू सुदा मया मिलन ते दोहोन लगड सहेता ओवा बुआ। अवुर गलत काम वरी अपन आप बू सम्भरो लगड हो सहेता ओवा बुआ।

⁸ हेनाते अबू रेनिय परभु ईसु मसीह राः बारे ते एटाःकू लाय वकू लगड अलोम बो-रू, अबू रेनिय परभु ईसु मसीह राः चलते ते जेहेल रेञाँ, हेनाते ईञाः बारे ते अलोम गेवुऊ। भगवान राः बल ते बढ़ियाँ खभेर लाय लगड जेयसे इंञ दुख तकलीपिंञ सहो यडा, हेन घयते अम होम सहोवे।

⁹ भगवान अबू उबर केड बुआयू, अवुर पवितर जिनगी बितो लगाडिय राःकेड बुआ। नआँ अबू राः भला काम राः चलते ते बेगारिय राःबुआ, लेकिन अबू सोग वडबुते अनेज राः इच्छा पुरा लगाडिय राःकेड बुआ। कहेकि धरतिय बनो तेड वरी पहील ते अनेज राः किरपा तिब लगड ईसु मसीह राः दोवारा ते बंचो बू लगाडिय पसींद तेडा।

¹⁰ हेना किरपा अबू रेनिय उऊबरय ईसु मसीह धरती रेय मेजेना, हेंडे बू जेर तेडा। नेय मिरतू राः सक्‍तिय नास गोत्तेडा, अवुर जेतना होड़कू ईसु मसीह राः बढ़ियाँ खभेर कू अपनो केडा, हेंकू नवाँआ जीवन एमके कुते अनन्त जीवन ञँम लगड मोकाय ओवड कुआ।

¹¹ इंञ ने-ना बढ़ियाँः खभेर परचारे लगड अवुर परेरित बनो केंञते चेडकू लगाडिय कुलकेडिञाँ।

¹² हेनाते इंञ नआँ दुख तकलीपिंञ सहो यडा, लेकिन मेनेंञ बोरो गेवुआ, कहेकि इंञ जे भगवान थरेंञ बिसवास केडा, हेना इंञ बढ़ियाँ तेंञ पपाड़ी तना, इंञ थरेय एमकेड हेना बढ़ियाँः खभेर ईसु मसीह अनायीनिय मेजुः मेन दिन हेनाय सम्भरो वेआ।

¹³ इंञ सही टेबोईंञ चेडकेड मिआँ हेना सबतामू। अवुर ईसु मसीह थरे बिसवासेमू अवुर सींड़कू सुदा मेल परेम तेम दोहोनू।

¹⁴ अवुर अबू थरे इदान हेना, पवितर आत्मा राः दोवारा ते नआँ बढ़ियाँः खभेर जिमा वड मीः हेना बढ़ियाँ तेम सम्भरोवे।

¹⁵ अम पपाड़ी तना आसिया प्रदेस रेनकू सींड़ होड़कू इंञ बगी वते कू चलो यना। फूगिलुस अवुर हिरमुगिनेस होकींञ बगी अटुडिञाँ।

¹⁶ उनेसिफुरुस ओड़ाः रेनकू थरे परभु दयाऊ, कहेकि हेंकू अखीर एस कू टेबोः भरोस तेडिञाँ, अवुर इंञ जेहेल रेंञ दोहोएन तोलोग हो मेने कू बोरो गेवगाना।

¹⁷ नेय रोम देस रेय मेजेन तहाँ, अखीर लाटपाट ते छपा ञँमकेडींञ तेय जुमो एना।

¹⁸ ईसु मसीह मेजुः रे नेय थरे परभु दयाऊ। अवुर उनेसिफुरुस इफिसुस रे ईञिय सहेता वडा, हेना अम बढ़ियाँ तेम पपाड़िआ।