2 थिस्स 1 - Kodaku

पवलुस राः जोहार

¹ इंञ पवलुस अवुर सिलवानुस अवुर तीमुथियुस अले हनवरी थिस्सलुनी सहर राः कलीसिया लगड जे अबू रेनिय भगवान अपाबू अवुर परभु ईसु मसीह थरे बिसवास केड हेंकू लगड नआँ चिट्ठी ले लिखो यडा।

² अबू रेनिय भगवान अपाबू अवुर परभु ईसु मसीह राः किरपा अवुर सान्ति अपे ञँमुः महल रे दोहोनू।

न्याय राः दिन

³ एगा भाईकू, अपे राः बारे ते अले भगवान कनर घय तोलोग धन्यवाद देहेक चही। अवुर नआँ जरूरी इदाना, कहेकि अपे राः बिसवास अखीर बड़होः तना, अवुर अपे राः मेल परेम हो आपस रे अखीर बड़होः तना।

⁴ हेनाते अले भगवान राः कलीसिया रे अपे राः बारे तेले सयाँड़ा। कहेकि अपे सतो पे रेहो दुख तकलीफ पे सहो यडा। नआँ सींड़ होयाएन रेहो अपे सहो तेडा, अपे राः बिसवास ञेंलुः तना।

⁵ अपे दुख तकलीफ पे सहो एनेज तन हेना, नआँ सींड़ भगवान बढ़ियाँ तेय न्यायेः हेना राः सबूत हवे, अपे भगवान राः राज राः लायिक पे बनोऊ।

⁶ भगवान न्यायी हवे। कनय हो अपे दुख ओवा पेः हेंकू, हेना राः बदला ते हेंकू सजाय ओवा कुआ।

⁷ परभु ईसु अनेज रेनकू अखीर सक्‍ति इदान हेंकू सरगदूतकू सुदा लहरोः हेना सेंगेल सुदा सरग वरिय देखारुः तोलोग अपे तकलीफ सहो यड हेंकू, अले सुदा अपे आराम पे ञाँमा।

⁸ हेना तोलोग कनय हो भगवान मेने कू अपनो गड हेंकू, अवुर अबू रेनिय परभु ईसु राः बढ़ियाँः खभेर अँजोम केते मेने कू अपनो गड हेंकू, हेना तोलोग भगवान सजाय ओवा कुआ।

⁹ परभु राः सक्‍ति अवुर मान मरजाद ञँमुः हेना वरी अलग कोःते अनन्त सजा कू ञाँमा।

¹⁰ नआँ हेन देवह होयाआ, हेंय अनेज रेनकू पवितर होड़कू थरे बड़ाई ञँम लगड अवुर सींड़ कुबू बिसवास केडकू थरे आदर ञँम लगाडिय मेजुआ। हेना रे अपे होपे मेसा केना। कहेकि अपे अले लाय तेडा हेना गोवाही रेपे बिसवास तेडा।

¹¹ अपे बिसवास राः चलते ते सींड़ भला काम करोवे लगड पे चहोः तना, नआँ सींड़ करोवे लगड अपे सक्‍तिय ओवापे लगड ले बिनती तना।

¹² अवुर अबू रेनिय परभु ईसु मसीह अपे राः दोवारा ते आदारिय ञाँमा। अवुर अपे हेंय राः दोवारा ते आदर पे ञाँमा। नआँ सींड़ अबू रेनिय भगवान अवुर ईसु मसीह राः किरपा ते होयाआ।