2 पतरस 1 - Kodaku

परिचय

¹ इंञ सिमोन पतरस ईसु मसीह रेनिय सेवेखिया अवुर परेरित हवे, नआँ चिट्ठी अपे लगाडिंञ लिखो यडा, अपे हो अले घयते ईसु मसीह थरे बिसवासेः हेना, किमतिआ बिसवास पे ञँमकेडा। नआँ बिसवास अपे ञँमकेना, नआँ अबू रेनिय भगवान, अवुर बबंचोवय ईसु मसीह अपे बिसवासे लगाडिय सहेता वडपेआ, हेनाते नआँ बिसवास पे ञँमकेडा। नेय धरमी अवुर पवितर गिआयू।

² अपे भगवान अवुर अबू रेनिय परभु ईसु मसीह पे पपाड़ी यना, हेनाते किरपा अवुर सान्ति अखीर ते ञँमुः महल रे दोहोनू।

भगवान राः बुलाहट

³ ईसु मसीह थरे भगवान राः सक्‍ति इदाना, हेंय भगवान राः सक्‍ति ते नआँ दुनिया रे अबू बढ़ियाँ अवुर सुद्ध जीवन जियोः लगड ची ची जरूरत इदाना, हेना सींड़ चीजिय ओवड बुआ, नआँ हेंय बू पपाड़िआ ते होया केना। हें-नी राः महिमा अवुर चाल बेहवार रे हिसा ञँम लगाडिय राःकेड बुआ।

⁴ ने-ना राः दोवारा ते अबू किमतिआ बरदान ओवा बुआ मेनतेय जबान केडा, अवुर नआँ बरदान ञँमुः राः बाद रे नआँ दुनियाँ राः बुरा ललसा वरी अवुर खराब बात वरी पे बंचोआ, अवुर भगवान राः स्वभाव घयतेपे बनोआ।

⁵ हेनाते अपे सगोर याःते नआँ आसीस ञँम लगड पे कोसीसे कि अपे राः बिसवास राः सँगे साँथ ते धरामुः लगड पे कोसीसे; अवुर धरम काम राः सँगे साँथ ते भगवान पपाड़ीः हेना गियान रेपे बढ़ोऊ;

⁶ अवुर गियान राः सँगे साथ ते अपन आप कब्जा रेपे रखोवे लगड पे बढ़ोऊ; अवुर अपन आप कब्जा रेपे रखो राः सँगे साँथ ते सगोर टेबोः ससाहो राः सक्‍ति रेपे बढ़ोऊ अवुर ससाहो राः सक्‍ति राः सँगे साँथ ते भक्ति रेपे बढ़ोऊ;

⁷ अवुर भक्ति राः सँगे साँथ ते भाई बंधुकू सुदा मया मिलन ते दोहोन लगड पे बढ़ोऊ, अवुर मया मिलन राः सँगे साँथ ते भगवान घयते सगोरकू सुदा मया मिलन ते दोहोन लगड पे बढ़ोऊ।

⁸ कहेकि अपे नआँ सगोर चाल बेहवार दोहोनू, अवुर बढ़ो चलोः रेदो, अपे अबू रेनिय परभु ईसु मसीह जेर लगड बे-कमा अवुर असफल एरो पे होया एना।

⁹ लेकिन जे थरे नआँ सगोर चाल बेहवार कोवाआ, हेंय अंद्हा गिआयू, अवुर धुंधरा धुंधरा तेय ञेंञेंल तना, अवुर हेंय अनेज राः पहीलआ पाप वरी, उम मयदन केडिया हेनाय लीड़िंञ गोत्तेडा।

¹⁰ हेनाते ईञाःकू भाईकू, अपे सही मेतेय राःकेड पेआ हेना, अवुरिय चुनो केडपेआ हेना, पक्‍काय लगड अखीर तेपे कोसिसे, अगर न घयतेपे करोवे रेदो, अपे बिसवास वरी कभी एरो पे लोजोर एना।

¹¹ अवुर नेन याःते अपे, अबू रेनिय परभु अवुर बबंचोवय ईसु मसीह राः जुग जूगा राज रे आदर इजेत राः साथ तेपे सेन सकोआ।

पतरस राः अखरी समय

¹² भलेना न टेबोःपे पपाड़ी तनू, अवुर जे सत पे ञँमकेडा, हेना रेपे मजबूत गिआ, हेंडे रेहो इंञ न टेबोईंञ एर उहयर पे लगड हमेसा तयारिंञ दोहोना।

¹³ इंञ पसींद यडा, इंञ लगड न बढ़ियाँ गिआ कि जीवातिंञ दोहोन मेन दिन एर उहयर केपे तेंञ एर जोसियो पे।

¹⁴ कहेकि इंञ पपाड़ी तनाञूँ, ईञाः गोजुः राः समय हलिते मेज बंचो केना, जे घयते अबू रेनिय परभु ईसु मसीह लाय वडिञाँ।

¹⁵ हेनाते इंञ गोज चलोः रेहो, अपे न टेबोः हमेसा पे उहयारे लगड नआँ याःतेंञ कोसिस यडा।

मसीहा राः महिमा अपन मेड ते ञेंलकेड हेना गोवाही

¹⁶ अले, अबू रेनिय परभु ईसु मसीह थरे तीमिन सक्‍ति इदाना, अवुर मेजेना हेना राः बारे तेले लाय तेडा, अवुर नआँ टेबोः अले, होड़कू तीमिन चलहाँकी तेकू बनो वेआ कतह घयते बनो केते मेने ले लाय गडपेआ, लेकिन अले ईसु मसीह तीमिन बडेगिअय हेना, अपन मेड तेले ञेंलकेडा, हेना ले लाय वपे तना।

¹⁷ नआँ टेबोः अले सही मेते ले पपाड़ी तना, कहेकि भगवान अपा आदर इजेत तेडियायू, अवुर बडेआ महिमाय ओवाडिया। अवुर हेना तोलोग सरग वरी अखीर महिमा ते भरो केनाय भगवान हेंय राः बारे ते नआँ घयतेय कहनी तेडा, “नेय ईञाअय दुलर कोड़ा होपोन हवे, इंञ नेय थरे खुस इदानिञाँ।”

¹⁸ अले हेंय सुदा पवितर बुरू रेले दोहोएन रे सरग वरी ने-ना आवाज सही मेते ले अँजो वडा।

¹⁹ अवुर अबू भविस्यवक्‍ताकू राः टेबोः रे बिसवास इदाना, अवुर नआँ टेबोः अले मसीहा राः बारे तेले लाय वडपेआ हेना मिलोआ। नेकू राः टेबोः अपे बढ़ियाँ तेपे अँजोम यड रेदो बढ़ियाँ गिआ। कहेकि नआँ टेबोः दीया घयगिआ, अवुर नआँ अंधरा ओत रे मरसालेआ, अवुर नआँ एतना मरसालेआ कि मसीहा मिड़ाः मेजकोःते अनायीनिय समझो पे मेन दिन मरसाले महल रे दोहोना। ईसु मसीह राः मरसल अंगा इपिल मरसालेआ घयते अपे राः कोठी कया रे मरसालेआ।

²⁰ कहेकि नआँ बढ़ियाँ तेपे पपाड़िकोऊ, धरमग्रंथ रे लिखल इदाना, कनारा भविस्यवाड़ी कनय होड़ अपन मन ते बेगारिय कहनिआँ।

²¹ कहेकि कनारा भविस्यवाड़ी होड़ राः मन ते मेने होयाआ, लेकिन भविस्यवक्‍ताकू पवितर आत्मा राः सहेता ते भगवान हनवरी कू टेबोः दोहो एनु।