2 एहुन्‍ना 1 - Kodaku

¹ इंञ सपायँड़ हनवरी नआँ चिट्ठी भगवान चुनो केडिया कोड़ीहोन अवुर हेंय रेनकू बाल बच्‍चाकू लगाडिंञ लिखो यडा, नेकू इंञ सही मेतेंञ परेम कुआ, अवुर इंञ भर मेने, बल्कि सत कू पपाड़िआ हेंकू सींड़कू हो नेकू सुदा परेम कू रखोआ।

² हेना सत अबू थरे बनो बगी कोआ, अवुर हमेसा अबू थरे दोहोना।

³ भगवान अपा, अवुर हेंय होपोन ईसु मसीह हनवरी किरपा अवुर दया अवुर सान्ति, सत अवुर परेम घलय अबू सुदा दोहोना।

सत अवुर परेम

⁴ अबू अपाबू हनवरी ञँमेना, हेना हुकूम राः अनुसार ते अमाःकू कुछ चोंडिजकू सत तेकू सेनियाडा, हेना ञेंलकेते इंञ अखीर खुसी एनाञूँ।

⁵ अब ओ कोड़ीहोन, इंञ अम लगड कनारा नवाआँ हुकूम मेने, लेकिन हे-ना जो सुरू रे अले थरे दोहो एना, हेनांञ लिखो यडा, अवुर अम थरे ईञाः अरजी हवे, कि अबू आपस रेबू परेम ओड़ेंगू।

⁶ परेम नआँ हवे कि अबू हेंय राः हुकूम राः अनुसार तेबू से-ने; नआँ अम सुरू वरिम अँजोम केडा, हे-ना हुकूम हवे, अवुर नआँ ते अम चलेक हो चही।

⁷ कहेकि संसार रे अखीर भभड़कोकू उडूंग केना, हेंकू नआँ मेने कू मनोवेआ, कि ईसु मसीह मनवाँ राः रूप तेय मेजेना; भभड़कोकू अवुर मसीह बिरोधिकू ने-न कू हवे।

⁸ अपन बिसेय ते सँवचेती तेपे दोहोनू, ताकि अले जो ले मेहनत केडा, हेना अपे अलोपे गँवोंवे, बल्कि हेना राः सींड़ मँजुरी पे ञाँमू।

⁹ कनय हो मसीहा राः सिक्छा रे थीर ते मेनेय दोहोना, अवुर हेना रे मेनेय बनो बगी कोआ, हेंय थरे भगवान कोवाया; कनय हो हेंय राः सिक्छा रे थीर तेय दोहोना, हेंय थरे भगवान अपा अवुर होपोन तू हो इदानियाँ।

¹⁰ अगर कनय अपे थरेय मेजुऊ, अवुर ने-ना सिक्छा मेनेय लाये रेदो, हेंय घियाअय न दो ओड़ाः रेपे रगेयू अवुर न दोपे जोहार वयू।

¹¹ कहेकि कनय हो न घियाः कुय जोहार वआ, हेंय हें-नी राः बुरा काम रेय मेड़वा जोमा।

अखरी जोहार

¹² इंञ अखीर टेबोः अम लगड लिलिखो इदाना, लेकिन कागद अवुर सियाही ते लिलिखो मेनेंञ चहोः तना, लेकिन ईञाः असरा हवे, अपे थरेंञ मेजुआ, अवुर समना-समनी रेंञ टेबोः रे अपे राः खुसी पूराऊ।

¹³ अम चुनो केडिया बेहिन रेनकू चोंडिजकू अम जोहार मेनते कू कहनी वम तना। आमेन।